_ საკმაოდ სოლიდური თანხა გაურკვეველი შტატების და უცნობი თანამშრომლების ხელფასებით უზრუნველყოფას ხმარდება.
ოზურგეთის მუნიციპალიტეტის ბიუჯეტიდან არასამეწარმეო არაკომერციული იურიდიული პირების დაფინანსებისთვის ყოველთვიურად 450 384 ლარი იხარჯება.
ა(ა)იპ სტადიონის დირექტორი მურთაზ აბაშიძე “გურია ნიუსთან” ამბობს, რომ შტატები საკმაოდ გაბერილია და არჩევნების შემდეგ შემცირებები მოხდება. მისი თქმით, აღნიშნულთან დაკავშირებით “ნაციონალებს” უნდა მოვკითხოთ.
ოფიციალური დოკუმენტების საფუძველზე ა(ა)იპ ოზურგეთის მუნიციპალიტეტის სტადიონზე 15 თანამშრომელია დასაქმებული.
მურთაზ აბაშიძე, დირექტორი _ 550 ლარი; ჯუმბერ კალანდაძე, მოადგილე _ 535 ლარი; ბესარიონ კაშია, მოადგილე _ 420 ლარი; იური გოგოტიშვილი, დირექტორის თანაშემწე _ 420 ლარი; ლია ანდღულაძე, ბუღალტერი _ 450 ლარი; ჰამლეტ მალაზონია, მთავარი სპეციალისტი _ 300 ლარი; ბიძინა როინიშვილი, მთავარი სპეციალისტი _ 300 ლარი; ბიჭიკო ხელაძე, ოპერატორი _130 ლარი; ამირან რამიშვილი, დარაჯი _ 250 ლარი; დავით ჯაველიძე, ცეცხლფარეში _ 250 ლარი; გელა ინწკირველი, მინდვრის მუშა _ 150 ლარი;, ალექსანდრე დემურიძე, დარაჯი _ 250 ლარი; მაია ინწკირველი, დამლაგებელი _ 100 ლარი; მერაბ ხომერიკი, მთავარი სპეციალისტი _ 300 ლარი; კახაბერ ასათიანი, მთავარი სპეციალისტი _ 300 ლარი.
მურთაზ აბაშიძე, სტადიონი დირექტორი: _ გვყავს 15 თანამშრომელი. უკვე 6 თვეა, სტადიონის დირექტორი ვარ და პირდაპირ გეტყვით _ დამხვდა “ნაციონალებისგან” გაბერილი შტატები.
_ თუმცა, როგორც ვიცი, არც არაფერი შეცვლილა არჩევნების შემდეგ.
_ გეთანხმებით, არაფერი არაა შეცვლილი, გარდა იმისა, რომ დავალაგე შტატები და ყველას მივუჩინე საკუთარი ადგილი. მოსვლის დღესვე ვკითხე თანამშრომლებს, ხელფასს რაში იღებთ, იცით თუ არა, რა მოვალეობა გაკისრიათ,-მეთქი? ვერ მპასუხობდნენ, აქედან გამომდინარე, რამდენიმე პიროვნებას სახლში წასვლა მოუწია.
_ თუმცა, თქვენ შტატები არ გაგიუქმებიათ, გათავისუფლებული თანამშრომლები სხვა პიროვნებებით ჩაანაცვლეთ.
_ კი, ახალი მოვიყვანე.
_ რამდენად არის საჭირო, გყავდეთ ორი მოადგილე, ასევე, დირექტორის თანაშემწე…
_ მე რომ მოვედი, სამი თუ ოთხი მოადგილე ჰყავდა დირექტორს. ნამდვილად სამარცხვინოა, 15 თანამშრომელში გყავდეს 2 და 3 მოადგილე, ამიტომ მე ახლა მყავს ერთი მოადგილე.
_ ჩვენ გვაქვს საკრებულოდან გამოთხოვილი ოფიციალური დოკუმენტი, სადაც წერია, რომ თქვენ გყავთ ორი მოადგილე…
_ არაა სწორი. ეტყობა, ან შეეშალათ, ან ძველი მონაცემები მოგაწოდეს…
_ რა მოვალეობა აკისრია დირექტორის თანაშემწეს?
_ იგივე ფუნქცია აქვს, რაც მე. თუ სტადიონზე არ ვარ, ასრულებს იგივე მოვალეობას რასაც მე… არჩევნების შემდეგ დაიხვეწება შტატები და თავიდან მოგიწევთ მასალის გაკეთება. მე არ მჭირდება სპეციალისტები, მე მჭირდება მუშები.
_ ბატონო მურთაზ, თქვენი აზრით, გაბერილი არის თუ არა შტატები?
_ იყო. სამი კაცი გავუშვი, ერთი გუბერნატორის ბიძა გახლდათ.
_ რატომ გაუშვით?
_ არ ისურვა მუშაობა და იმიტომ. ტყუილად უნდა მიმეცა ხელფასი?
_ თქვენ ამბობთ, რომ არჩევნების შემდეგ მოხდება შემცირებები. რატომ?
_ არაა ამდენი შტატი საჭირო და იმიტომ.
_ ბატონო მურთაზ, თუ ამდენი შტატი არ იყო საჭირო, აქამდე რატომ არ გააუქმეთ?
_ მოჰკითხეთ “ნაციონალებს”.
_ არჩევნებიდან გავიდა ერთი წელი. რატომ არ შეცვალეთ ამ ხნის მანძილზე თქვენ არაფერი? თუ თვლით, რომ შტატები გაბერილია, რატომ არ აყენებთ მათი გაუქმების საკითხს?
_ მე 6 თვეა, რაც დანიშნული ვარ. არჩევნების შემდეგ მიდით და ნახეთ სტადიონი როგორი იყო ადრე და ახლა როგორია. სტადიონის 80 პროცენტი ამორტიზირებულია, ბარემ ისიც დაწერეთ, რომ სტადიონის შენობები გაურკვეველ სიტუაციაშია, შემოსავლების სამსახურის ვალი გვაქვს 60 000 ლარი. ბოლო წლების განმავლობაში საგადასახადოში არანაირი თანხები არაა შეტანილი. დარბაზი ინგრევა, ავარიულ მდგომარეობაშია, რომ ჩამოინგრეს, პასუხს მე მომთხოვენ. მე თუ მკითხავთ, საერთოდ არაა საჭირო სტადიონის ტაბლო, რომელიც სტადიონზეა, ქარში ისე მოძრაობს, შეიძლება, გადმოვარდეს და ვინმეს თავში დაეცეს.
8 თებერვალს, დემოკრატიული ჩართულობის ცენტრში, გაბერილ შტატებთან დაკავშირებით, თანამდებობაზე ერთი თვის დანიშნულმა კოტე შარაშენიძემ განაცხადა: _ რაც შეეხება ა(ა)იპ ორგანიზაციებს, ეს არის ძალიან სერიოზული თემა. პირდაპირ მინდა გითხრათ, რომ მთელი მუნიციპალიტეტის ბიუჯეტი, რომელიც 10-მილიონიანია, იხარჯება აიპი-ების აბსურდულ შტატებში, სადაც საქმე არ კეთდება. მე ვნახე შტატები _ მაყურებელთა მეკავშირე, მედია ოფიცერი, ცეცხლფარეში, მინდვრის მუშა, ზედამხედველის მოადგილე და ასე შემდეგ. ასეთ დღეში იყო ჩვენი ბიუჯეტი. კი, ბატონო, ხალხი დასაქმებულია, მაგრამ არ არის ეს სწორი დასაქმება. ეს არის დათვური სამსახური. ამ თანხის დახარჯვის მიზნობრიობა არ ჩანს. მე მზად ვარ, ნებისმიერ სიტუაციაში, საზოგადოებასთან ერთად ჩავერთო ამ პროცესებში და მივიღო რეკომენდაციები. ახლა არ არის იმის დრო, ვარჩიოთ, ეს კარგი იყო თუ ცუდი. ახლა უნდა დავიწყოთ ახლის შენება და კეთება. ბიუჯეტი არ არის საქველმოქმედო ფონდი, _ თქვა მაშინ შარაშენიძემ.
