როგორც “გურია ნიუსს” პატრიარქის მდივანმა, დეკანოზმა მიქაელ ბოტკოველმა განუცხადა, საპატრიარქოს პოზიცია ამ საკითხთან დაკავშირებით სავარაუდოდ, ხვალ ან ზეგ გახდება ცნობილი.
“ზოგადად, საპატრიარქო, რა თქმა უნდა, თანახმა იქნება ამ ინიციატივის, რადგან სასულიერო პირებიც და რელიგიური მოღვაწეებიც საზოგადოების ნაწილნი არიან და მათაც ისევე სჭირდებათ დაცვა, როგორც სხვა საზოგადოებრივი ფენის წარმომადგენლებს.
ზოგადად, ამასთან დაკავშირებით ჩვენ, რა თქმა უნდა, დადებითი პოზიცია გვექნება. ამ თემის შესახებ გაფართოებული შეხვედრა ხვალ გვაქვს და საპატრიარქო სავარაუდოდ საკუთარი პოზიციის შესახებ განცხადებასაც გამოაქვეყნებს.
შეკრების მიზანია, რომ რაღაც-რაღაცები დაზუსტდეს,“ _ განუცხადა ბოტკოველმა “გურია ნიუსს”.
მისივე თქმით, საკითხთან დაკავშირებით საპატრიარქო კონსულტაციებს საქართველოს სხვა რელიგიურ ჯგუფებთანაც გეგმავს.
შეგახსენებთ, რომ შს სამინისტროს ინიციატივით, “ადმინისტრაციულ სამართალდარღვეთა კოდექსს” სპეციალური მუხლი ემატება, რომელიც ადამიანის რწმენისა და აღმსარებლობისთვის ხელის შეშლას ეხება და ასეთ, ქმედებაზე ადმინისტრაციული ჯარიმის დაკისრებას ითვალისწინებს.
საზოგადოებრივი დავის საგანი ამ მუხლის პირველი პუნქტი გახდა, რომლის მიხედვითაც, დარღვევად დაკვალიფიცირდება “რელიგიური სიწმინდეების, რელიგიური ორგანიზაციის, ღვთისმსახურის ან მორწმუნის მიმართ სიძულვილის საჯაროდ გამოხატვა ან/და სხვაგვარი დამამცირებელი ქმედება, რაც მიზნად ისახავს მორწმუნეთა რელიგიური გრძნობების შეურაცხყოფას”.
ცვლილებების პროექტის მიხედვით, ამ მუხლის დარღვევა გამოიწვევს დაჯარიმებას 300-დან 500 ლარამდე, ხოლო აღნიშნული პუნქტით გათვალისწინებული ქმედება, ჩადენილი განმეორებით წლის განმავლობაში გამოიწვევს დაჯარიმებას 1000-დან 1500 ლარამდე ან/და ადმინისტრაციულ პატიმრობას 15 დღემდე ვადით.
აღნიშნული ჩანაწერის შესახებ საზოგადოებრივმა ორგანიზაციებმა პარლამენტს საპროტესტო წერილით მიმართეს. ცვლილების წინააღმდეგ გამოდიან ასევე, საქართველოს რელიგიური უმცირესობების წარმომადგენლებიც.
ამავე თემაზე:
