სწორედ ეს საკითხი იყო, რასაც გამგეობის თანამშრომლები აპროტესტებენ. ისინი “გურია ნიუსთან” ამბობენ, რომ კონკურსი აუცილებელია და უნდა ჩატარდეს, მაგრამ მისი ორგანიზება და საკონკურსო- საკვალიფიკაციო მოთხოვნების დადგენა არ უნდა მოახდინონ იმ ადამიანებმა, ვინც “ნაციონალების” პერიოდში თავად არღვევდნენ კანონს.
სხდომის დაწყებიდან ცოტა ხანში დარბაზში შემოვიდა იმ ადამიანთა ჯგუფი, ვინც ამ პირობებში კონკურსის დანიშვნას აპროტესტებენ. ხმაურის შემდეგ საკრებულოს თავმჯდომარე ამირან გიგინეიშვილმა წესრიგის დასამყარებლად პოლიცია გამოიძახა და დარბაზი დატოვა, რის გამოც სხდომა დროებით გადაიდო.
სხდომის დარბაზის კართან მრავლად იყვნენ სოფლის რწმუნებულები და გამგეობის სხვა თანამშრომლები.
ნუგზარ ცინცაძე, რომელიც განსაკუთრებული აქტიურობით გამოირჩეოდა, აცხადებს, ის არ აპროტესტებს იმ მოთხოვნას, რაც მთავრობის დადგენილია, აუცილებელია კონკურსის დანიშვნა და მისი გავლა, თუმცა მიიჩნევს, რომ უნდა მოხდეს საკრებულოს სხდომაზე საკითხის განხილვა სხვა დროს, მაშინ, როცა უკვე ეცოდინებათ თბილისში შეხვედრიდან დაბრუნებულ გამგებლის მოვალეობის შემსრულებელსა და საკრებულოს თავმჯდომარეს ჩატარდება თუ არა საერთოდ კონკურსი.
“არც ოზურგეთში, არც ჩოხატაურში არ იციან ჩატარდება თუ არა კონკურსი, გვქონდა მათთან საუბარი. ორშაბათს არიან დაბარებული თბილისში, მაგრამ აქ ყველაფერი სხვანაირადაა, თავისი 16 კაციანი ჯგუფი რომ ყავს გია გოგუაძეს “ნაცბანდის” სახით, სწორედ იმათი წამოწყებულია ეს, რატომ ჩქარობენ და აკეთებენ ამას, ყველასთვის გასაგებია, ადგილობრივი არჩევნებისთვის ემზადებიან, პრაქტიკაგამოვლილი ხალხია, 9 წლის განმავლობაში სისხლს წოვდნენ ხალხს. ამირან გიგინეიშვილთან უშუალოდ არანაირი პრეტენზიები არ გამაჩნია ამასაც ვაღიარებ, რადგან გიგინეიშვილი და ზაზა ურუშაძე ბეწვის ხიდზე ყავთ ამათ დაყენებული, ყოველ დღე ემუქრებიან იმპიჩმენტს მოგიწყობთო, აი ეს ხდება დღეს ლანჩხუთში და ვეწინააღმდეგები ამას,” _ ამბობს ცინცაძე, რასაც გამგეობის თითქმის ყველა თანამშრომელი ეთანხმება.
სხდომა ერთი საათის შემდეგ ისევ განახლდა, სადაც საკრებულოს თავმჯდომარე ამირან გიგინეიშვილმა განაცხადა, რომ საჯარო თანამდებობათა დასაკავებლად საკვალიფიკაციო მოთხოვნების დამტკიცება გადაიდო, რის მიზეზებზეც სხვა საკითხების წარდგენის შემდეგ ისაუბრა.
“2013 წლის 29 ივნისს საქართველოს პარლამენტმა შეიტანა ცვლილება კანონში საჯარო სამსახურის შესახებ, ამ ცვლილების თანახმად ყველა სადაც დასაქმებულია მოვალეობის შემსრულებლები, უქმდება 1 იანვარს და ამ შტატში უნდა იჯდეს კონკურსგავლილი ადამიანი, ეს არის საფუძველი იმისა, რაც ხდება არა ლანჩხუთში, არამედ კიდევ 64 მუნიციპალიტეტში, ამას არ წყვეტს ჩვენი საკრებულო, ეს გადაწყვიტა საქართველოს პარლამენტმა. მე თუ მკითხავთ, ის გადაწყვეტილება, რაც პარლამენტმა მიიღო არჩევნებამდე რამდენიმე თვით ადრე, არ მიმაჩნია მართებულად, თუმცა, მე არ ვარ პარლამენტის წევრი და და გადაწყვეტილებას ვერ ვიღებ. ჩემი მოსაზრება მივწერე კიდეც პარლამენტის თავმჯდომარესა და ლანჩხუთის დეპუტატს, რომ ეს კონკურსი უნდა გადაიდოს, მინდა გითხრათ, რომ საკრებულოს 26 წევრი ვართ ამავე აზრზე. დღევანდელი დილის ინცინდენტიდან გამომდინარე მინდა ვთქვა, რომ კომისიის თავმჯდომარე სანამ არის ამირან გიგინეიშვილი ვამბობ, რომ არც ერთი ლანჩხუთელი კომისიაში არ იქნება, არც გარედან მოწვეული და არც საკრებულოს წევრი, ესაა ჩემი პოზიცია. რაც შეეხება იმას, თუ რატომ გადაიდო ამ საკითხის განხილვა, მერჩივნა ეს დღეს მომხდარიყო და გეტყვით რატომ, მოწოდებული გვაქვს ინფრასტრუქტურისა და რეგიონალური განვითარების სამინისტროს მიერ ფორმა, თუ რა უნდა იყოს საკვალიფიკაციო მოთხოვნები და რა უნდა იცოდეს კონკურსანტმა. ორჯერ საკითხის ჩავარდნისა და მსჯელობის შემდეგ მივაღწიეთ იმას, რომ გავამარტივეთ მოთხოვნები კონკურსანტისათვის, ამას თუ დღეს მივიღებდით უმჯობესი იქნებოდა, შესაძლებელია მე იმპერატიულად გამომატანონ თბილისიდან მოთხოვნა, რაც მერწმუნეთ ბევრად უფრო რთული იქნება,” _ განაცხადა გიგინეიშვილმა.
მომხდარ ფაქტს აფასებს გამგებლის მოვალეობის შემსრულებელი და ამბობს, რომ ყველა კანონს უნდა დაემორჩილოს.
“ის, რაც მოხდა არასწორია, მაგრამ ხალხი აღელვებულია, თუ სახელმწიფო გადაწყვეტს, რომ ეს კონკურსი უნდა ჩატარდეს, ჩატარდება კიდეც. დღეს აღელვებული ხალხის შემოჭრის მიზეზი არასწორი ინფორმაციის მიტანა გახდა, არ იყვნენ საქმის კურსში თუ რა ხდებოდა, სამშაბათს უკვე გვეცოდინება ყველაფერი, რასაც ორშაბათს მე და საკრებულოს თავმჯდომარე გავიგებთ და შევეცდებით, ყველას გავაცნოთ. ჯერ-ჯერობით, მე როგორც ვიცი, გადაწყვეტილება მთლიანობაში მიღებული არაა – გამოცხადდეს თუ არა კონკურსი. ვფიქრობ, ახლა კონკურსის ჩატარება არასწორია, რადგან 4 თვეში იცვლება ადმინისტრაციული მოწყობა. გაცილებით ადრე რომ ჩატარებულიყო და არ მიეტანათ ახალ წლამდე, უმჯობესი იქნებოდა. მაისში არჩევნებია, ახლა კონკურსი გაიაროს ადამიანმა და სამი თვის მერე რომ ეტყვი სახლში წადიო, უარესი არაა? მით უმეტეს მე როგორც ვიცი შემცირებებსაც აპირებენ. ვნახოთ, ორშაბათის შეხვედრაზე გაირკვევა ყველაფერი,” _ უთხრა “გურია ნიუსს” ზაზა ურუშაძემ.
