მიზეზად კი ცერემონიალის არაპომპეზურობა სახელდება. უკვე ცნობილია, რომ ცერემონიის დროს რუსთაველის გამზირზე ტრანსპორტის მოძრაობა ჩვეულ რიტმში გაგრძელდება და გზები არ გადაიკეტება.
ამ ინფორმაციას გამოხმაურება მოჰყვა პოლიტიკოსების მხრიდან. “ახალი მემარჯვენეების” ლიდერმა, ფიქრია ჩიხრაძემ დღეს ჟურნალისტებთან საუბრისას აღნიშნა, რომ ინაუგურაცია სახელმწიფო მნიშვნელობის მოვლენაა და მას მოქალაქეები უნდა ესწრებოდნენ. რაც შეეხებათ “ახალ მემარჯვენეებს” ისინი მიწვეულები არ არიან.
“პრეზიდენტის ინაუგურაციაზე “ნაციონალური მოძრაობის” გარდა სხვა ოპოზიციური პარტიები არ მიუწვევიათ. პრეზიდენტის ინაუგურაცია სახელმწიფო მნიშვნელობის მოვლენაა, იმით, რომ ცერემონიაზე მიწვეული ადამიანების პოლიტკური არეალი შეიზღუდა, ამით ახალმა პრეზიდენტმა და იმ ჯგუფმა, რომელმაც ეს ღონისძიება დაგეგმა, საქართველოს მოსახლეობას უთხრა, რომ მარგველაშვილი არ იქნება მთელი საქართველოს პრეზიდენტი”.
დღესვე ინაუგურაციაზე დასწრების შეზღუდვას გამოეხმაურა არასამთავრობო ორგანიზაციათა კოალიციის “ჩვენი უფლებების” თავმჯდომარე დავით ლილუაშვილი და განაცხადა, რომ ცერემონიაზე საზოგადოების ყველა ფენას უნდა შეეძლოს დასწრება. მანაც დაადასტურა, რომ მიწვევა ინაუგურაციაზე საპარლამენტო ოპოზიციის გარდა სხვას არავის მიუღია.
“თუ კარგად ჩავუკვირდებით ამ გადაწყვეტილებას, დავინახავთ “ნაციონალური მოძრაობისთვის” დამახასიათებელი ხისტი პოლიტიკის და საზოგადოების მიმართ აგდებული დამკიდებულების მსგავსებას “ოცნების” პოლიტიკასთან. როგორც ჩანს, უმოკლეს დროში ისტორია მეორდება”.
ლილუაშვილმა განაცხადა, რომ გაუგებარია ასეთი დამოკიდებულება და კითხვით მიმართა ახლად არჩეულ პრეზიდენტს – “თქვენ მარტო “ქართული ოცნების” და “ნაციონალური მოძრაობის” პრეზიდენტი ბრძანდებით?”
“ქართული დასის” ლიდერი ჯონდი ბაღათურია აცხადებს, რომ პროტოკოლი აუცილებლად შეუთანხმებდა პრემიერს ინაუგურაციაზე მიწვეულთა სიას, რომელშიც ოპოზიციური პარტიებიდან მხოლოდ “ნაციონალური მოძრაობაა” ჩაწერილი, ასე რომ პრემიერის დასტურის გარეშე არაფერი გადაწყდებოდა.
“არასაპარლამენტო ოპოზიცია მიწვეული არ არის. “ნაციონალურ მოძრაობასთან” ცხოვრებაც და დებატებიც ბევრად ადვილია, იოლია უთხრა – გახსოვს, შენ პატიმარს ცოცხი რომ გაუკეთეო?” _ აცხადებს ბაღათურია.
