“ეროვნულ-დემოკრატიული პარტიის” ლიდერ გურამ ჩახვაძის განცხადებით, თბილისის მერი სწორედ რომ პოლიტიკოსი უნდა იყოს. მისივე თქმით, “ეროვნულ-დემოკრატიული პარტიასაც” წარადგენს კანდიდატურას მერის პოსტზე.
“მოვისმინე თბილისის მერის, უგულავას განცხადება და ვფიქრობ, რომ ისიც იქნება კანდიდატი თბილისის მერის არჩევნებზე, ყოველ შემთხვევაში მე პირადად მისი განცხადებიდან ეს აზრი გამოვიტანე. მერის არჩევნებზე “ეროვნულ-დემოკრატიული პარტიაც” წარადგენს კანდიდატურას, თუმცა, ვინ იქნება ის, ჯერ ნაადრევია ამაზე მსჯელობა. არ მესმის, როცა ამბობენ, თბილისის მერი არ უნდა იყოს პოლიტიკოსიო. პოლიტიკა არის მართვა, ეს იქნება სოფლის, მუნიციპალიტეტის თუ ქალაქის დონეზე. ყველაფერი ეს არის პოლიტიკა, ამიტომ მერი უნდა იყოს პოლიტიკოსი,” _ განაცხადა ჩახვაძემ.
ქალაქის მერის კანდიდატურების შესახებ შეფასება გააკეთა “ტრადიცონალისტთა კავშირის” ლიდერმა აკაკი ასათიანმაც და განაცხადა, რომ ვერ ხედავს საჭიროებას მერის პოლიტიკურად ანგაჟირებულობისა.
“მერობის კანდიდატი ყველასთვის აბსოლუტურად მისაღები ვერ იქნება. არც ისაა სავალდებულო მერი პოლიტიკურად ანგაჟირებული პიროვნება იყოს. თუმცა არც მხოლოდ კარგი მეურნე უნდა იყოს. რაც შეეხება კანდიდატურას, დავით ნარმანია არ იწვევს პრობლემას და ანტიპათიას, მაგრამ ჩემთვის პირადად ის ფაქტი, რომ მის სამინისტროში შემუშავდა თვითმმართველობის კანონი, ტოვებს შთაბეჭდილებებს, რომ ბოლომდე ამ პრობლემებს ჩამწვდარი არაა. თბილისის ხელმძღვანელობა პასუხს მილიონ-ნახევარი ადამიანის წინაშე უშუალოდ აგებს. ერთი რამ ცხადია, “ნაციონალური მოძრაობა” სიხარულს ვერ მალავს – თვლიან, რომ “ოცნების” მერობის კანდიდატს ადვილად დაამარცხებენ”.
პარტია “იმედის” თავმჯდომარე ირინა სარიშვილი თვლის, რომ დედაქალაქის მერი თბილისელი უნდა იყოს და ნარმანიას ურჩევს მოიხსნას კანდიდატურა.
“ვთვლი, რომ თბილისის მერი უნდა იყოს თბილისელი. არ ვგულისხმობ იმას, მისმა დედამ სად იმშობიარა. თბილისელობა ნიშნავს თბილისში ჩამოყალიბებას, ბათუმელობა – ბათუმში. მე ძალიან მიყვარს ბათუმი, შეიძლება თბილისზე მეტადაც კი, მაგრამ ბათუმელზე მეტად იქაურ პრობლემებს ვერ ჩავწვდები. კარგი იქნება, თუ ნარმანია თავის კანდიდატურას მოხსნის”.
“ქართული დასის” ლიდერი ჯონდი ბაღათურიას განცხადებით, თბილისის მერის პოსტზე რეგიონული განვითარების მინისტრის დავით ნარმანიას კანდიდატურა ნორმალურია, თუმცა, დასძენს, რომ “ნარმანიას არც კანონით და არც მორალურად აქვს უფლება თანამდებობაზე დარჩეს”.
“ხელისუფლებას ნარმანიას დასახელებით არანაირი კანონი არ დაურღვევია. პირიქით, კარგია, რომ საზოგადოებისთვის ადრე გახდა ცნობილი კანდიდატის ვინაობა. თუმცა, აღარც კანონით და აღარც მორალურად არ აქვს მას უფლება მინისტრის სავარძელში დარჩეს. ქვეყნის ინფრასტრუქტურაში ძალიან ბევრი საბიუჯეტო სახსრები იდება, მათ შორის – გრანტები და კრედიტები. არ შეიძლება რომელიმე პარტიის კანდიდატი ასოცირდებოდეს იმ საბიუჯეტო სახსრებთან. ერთის მხრივ, არანაირ პროტესტს არ იწვევს ნარმანიას დასახელება. ჩვენი აზრით, საკმაოდ ნორმალური კანდიდატია დასახელებული, თუმცა მან უნდა დატოვოს ინფრასტრუქტურის მინისტრის პოსტი”.
ჯონდი ბაღათურიამ განაცხადა, რომ არასაპარლამენტო ოპოზიცია ცდილობს თბილისის მერის არჩევნებში ერთიანი კანდიდატით წარსდგეს, რომელიც იქნება უფრო პოპულარული და საზოგადოებისთვის უფრო მისაღები.
ცნობისთვის, თბილისის მერს 2009 წლამდე ირჩევდა ქალაქის საკრებულო, 2010 წელს კი საქართველოს ისტორიაში პირველად გაიმართა მერის არჩევნები. თბილისის არჩეული მერი პასუხისმგებელია ქალაქის სტრატეგიულ განვითარებაზე.
