_ 9 ნოემბერს საქართველოს ფუტსალის (დარბაზის ფეხბურთის) ასოციაციის ორი წევრის _ გიორგი დარჯანიას და ლევან გრიგოლიას, ინიციატივით სფა-ს გამგეობის გვერდის ავლით და მოქმედი წესდების უხეში დარღვევით მოწვეულ იქნა სფა-ს ე.წ. კონფერენცია (წევრთა საერთო კრება). კრებას თავმჯდომარეობდა ვიცე-პრეზიდენტი ირაკლი ქავთარაძე. კრებამ მიიღო გადაწყვეტილება შემდეგი საკითხის ირგვლივ, კერძოდ: გამგეობის წევრად, ნაცვლად გარდაცვლილი დევი სირაძისა, მიღებულ იქნა ზვიად ხაჩიაშვილი, ხოლო წევრი _ ლევან გრიგოლია, არჩეულ იქნა ვიცე-პრეზიდენტად. მოცემული კრების ოქმი, ასეთივე გაურკვეველი გზებით, მოგვიანებით დარეგისტრირდა (27.11.2013წ) საქართველოს იუსტიციის სამინისტროს სამეწარმეო რეესტრში, _ ამბობს ცქიტიშვილი.
მისივე ინფორმაციით, აღნიშნული გადაწყვეტილება მათ ადმინისტრაციული წესით იუსტიციის სამინისტროს სამეწარმეო რეესტრში 29 ნოემბერს გაასაჩივრეს:
_ სფა-ს მოქმედი წესდების (2005 წლის 04.11 რედაქცია, რომელიც რეგისტრირებულია საქართველოს იუსტიციის სამინისტროს 14.12.2005 წელს #486 გადაწყვეტილებით) მე-6 მუხლის 6.10 პუნქტით, კონფერენცია უფლებამოსილია, თუ მას ესწრება სფა-ს წევრთა ნახევარზე მეტი. აღნიშნულ კონფერენციაზე დამსწრე დელეგატების აბსოლუტური უმრავლესობის ოფიციალური ვინაობა გაურკვეველია, ვინაიდან, არ არსებობს აღნიშნულ პირთა სფა-ში წესდებით დადგენილი წესით გაწევრიანების დამადასტურებელი არანაირი დოკუმენტაცია; მე-6 პუნქტის 6.6. ქვეპუნქტის შესაბამისად კონფერენციის მოწვევა ხდება სფა-ს გამგეობის მიერ. აღნიშნული გამგეობის სხდომის მოწვევის და მასზე კონფერენციის დროს წესრიგის მსჯელობის თაობაზე შესაბამისი დოკუმენტაცია არ არსებობს;. წესდების მე-6 პუნქტის 6.12 ქვეპუნქტის შესაბამისად კონფერენციას თავმჯდომარეობს სფა-ს პრეზიდენტი, ხოლო მისი არყოფნის შემთხვევაში ერთ-ერთი ვიცე-პრეზიდენტი. ამასთან საგულისხმოა ის, რომ ერთ-ერთი ვიცე-პრეზიდენტი პრეზიდენტის დროებით არყოფნის შემთხვევაში, მის ფუნქციებს ახორციელებს პრეზიდენტისავე დავალებით (მუხლი 7, ქვეპუნქტი 7.10). შესაბამისი უფლებამოსილება მოქმედ პრეზიდენტს არავისთვის გადაუცია კანონმდებლობით დადგენილი წესით. წესდების მე-6 მუხლის 6.13 პუნქტით, კონფერენცია ასახელებს ხმების დამთვლელ 3 და მეტ წევრს. მაშინ როცა, წარმოდგენილი კონფერენციის ოქმით, კონფერენციაზე ხმის დამთვლელად არჩეულ იქნა ერთი წევრი (გ. დარჯანია). ზემო აღნიშნულზე საბოლოო გადაწყვეტილების გამოტანამდე (აღნიშნული მოიცავს თვით სასამართლო პროცედურებსაც), მიუხედავად იმისა, რომ ახალი გადაწყვეტილება ვეღარ დარეგისტრირდება სამეწარმეო რეესტრში, 2013 წლის 05 დეკემბერს სფა-ს თვითმარქვია წევრები კვლავ იწვევენ ე. წ. კონფერენციას ისევ გამგეობისა და მოქმედი დებულების გვერდი ავლით და ამჯერად დღის წესრიგში აყენებენ პრეზიდენტისა და ვიცე-პრეზიდენტის გადარჩევის საკითხს, _ აცხადებს ცქიტიშვილი, რომელმაც აღნიშნულის შესახებ საქართველოს სპორტის და ახალგაზრდობის საქმეთა მინისტრს, ლევან ყიფიანს და საქართველოს ფეხბურთის ფედერაციის პრეზიდენტს, დომენტი სიჭინავას ოფიციალური განცხადებით აცნობა:
_ ეჭვგარეშეა, რომ ასე ჩატარებული კრების შედეგები დღის სინათლეს ვერ იხილავს და ჩანასახშივე ბათილად იქნება ცნობილი. ჩვენს მიერ ყველა ღონე იქნება ნახმარი ჩვენი დარღვეული უფლებებისა და საქმიანი რეპუტაციის აღსადგენად. თუმცა, მიგვაჩნია, რომ საკითხის შესაძლო სასამართლო წესით რეგულაცია არ შედიოდა ჩვენს ინტერესებში, რაზეც ჩვენ წინათაც შევიკავეთ თავი, როცა მედია საშუალებებით ჩვენს მიმართ გაჩაღდა სამარცხვინო კამპანია.
სფფ-ს მიერ, ჩვენი, არაერთგზის ზეპირი და წერილობითი მიმართვების უპასუხოდ, რეაგირების გარეშე დატოვებამ, ხელი შეუწყო სფა-ში შექმნილი ვითარების კიდევ უფრო დაძაბვას. ამავდროულად, არავითარი რეაგირება არ მოჰყოლია მისი ზოგიერთი წევრის ცილისმწამებლურ კამპანიას თვით ფიფა-სა და უეფა-ში.
ბატონო ლევან, ყოველივე ზემოაღნიშნულიდან გამომდინარე, საკითხის დარეგულირების მიზნით, გთხოვთ, გამოიყენოთ თქვენს ხელთ არსებული შესაძლებლობები და გავლენა იქონიოთ სფფა-ს ხელმძღვანელობაზე, რომლებიც, თავისი ქმედებებით, მთელი ამ ხნის განმავლობაში, სასათბურე პირობებს უქმნის სფა-ს ზოგიერთ წევრს უკანონო ქმედებების განხორციელების პროცესში, _ აღნიშნულია მინისტრისთვის გაგზავნილ წერილში.
ლევან ცქიტიშვილი 21 დეკემბერს პრესკონფერენციის გამართვასაც გეგმავს, სადაც მისივე თქმით სხვა საკითხებთან ერთად, განიხილება ასევე ახალი პრეზიდენტისა და ვიცე-პრეზიდენტების არჩევნების საკითხი.
