უშიკიშვილმა აღნიშნა, რომ კულტურის სამინისტროს თანამდებობის პირებმა გამოიყენეს პრემიერის სახელი და შეთითხნეს ბინძური გადაწყვეტილება. ის აცხადებს, რომ არ სჯერა და არც უნდა დაიჯეროს, რომ იმ დროს აზერბაიჯანში მყოფი ირაკლი ღარიბაშვილი უშიკიშვილის მოხსნის გეგმებს ალაგებდა.
“არ მჯერა და არც მინდა დავიჯერო, რომ ჩემი გათავისუფლება პრემიერის ბრძანებით მოხდა. მისი სახელი გამოიყენეს კულტურის სამინისტროში იმ განზრახვით, რომ ვითომდა შემეშინდებოდა. საკმაოდ ჩახლართული საქმეა. წარმოიდგინეთ რამდენი ადამიანის სახელი ფიგურირებს. კანონდარღვევით მოხდა გათავისუფლება. მოვიდა კონვერტი, რომელშიც ორი ბრძანება იდო. ერთი – მინისტრი მიუქმებდა შვებულებას და მეორე – გათავისუფლების ბრძანება. მიზეზად კი დასახელებულია აუდიტის დასკვნაზე ჩემი ხელმოწერის არ არსებობა. ვიყავი შვებულებაში, დირექტორის მოვალეობას ასრულებდა ჩემი მოადგილე სოფო ლობჟანიძე, რომელმაც მოაწერა ხელი. როგორ შეიძლებოდა თავი ამერიდებინა ხელმოწერაზე, როცა საერთოდ არ მქონდა შვებულებაში მყოფს ხელმოწერის უფლება. ან ხომ უნდა ვიცოდე, რას ავარიდე თავი?”
უშიკიშვილი აღნიშნავს, რომ არ მომხდარა მისი დაბარება კულტურის სამინისტროში, არ მომხდარა მასთან გასაუბრება.
“მინისტრი არ შემხვედრია არასდროს. არ უთხოვა, რა ხდება, გაგვარკვიოთო. არც კი დამიბარეს და მითხრეს, რომ მათავისუფლებენ, კონვერტი გამომგიზავნეს ბრძანებით. ფოლკლორის ცენტრი, როგორც ორგანიზაცია, ჩვენ შევქმენით, საკუთარი ხელით, ამას არაფრად აგდებს, არავის აინტერესებს რამდენი რამ გავაკეთეთ, აღვადგინეთ ვახუშტი კოტეტიშვილის საღამოები, ეროვნული პრემია და საერთოდ, იმაზე დიდი საქმე რა არის, მომავალ თაობებს ქართული ფოლკლორი შეაყვარო. ყველაფერს ჩვენი ხელებით ვაკეთებდით. მესმის, ვიღაცას უნდოდა ამ ადგილზე სხვა დაენიშნა, რადგან ფოლკლორის ცენტრს ვერ აკონტროლებდნენ, მაგრამ აი ასე, პრემიერის სახელის გამოყენება და სრულიად საფუძველს მოკლებული მიზეზებით გათავისუფლება ძალიან საწყენია”.
ფოლკლორის ცენტრის ყოფილი დირექტორი ამბობს, რომ 24 დეკემბერს, 19 საათზე კინოს სახლში გაიმართება ახალი ფილმის ჩვენება, სადაც მაყურებელი იხილავს ყველა იმ საქმეს, რაც გააკეთა ცენტრმა, ხოლო უახლოეს მომავალში ფილარმონიიის დიდ საკონცერტო დარბაზში აპირებს ჩაატაროს კონცერტი იმ ანსამბლების მონაწილეობით, რომლებთანაც წლებია თანამშრომლობს და ბევრი სასიკეთო საქმე გააკეთა. უშიკიშვილი სთხოვს პარლამენტს და სხვა კომპეტენტურ სტრუქტურებს დაინტერესდნენ ვინ და რატომ იყენებს პრემიერის სახელს, რადგან დარწმუნებულია, რომ თუ დღეს რეაგირება არ იქნება, ხვალ სხვას მიადგებიან და უკმაყოფილების დიდი გრძნობა გაჩნდება საზოგადოებაში.
გიორგი უშიკიშვილის თქმით, ის არ აპირებს ამ საქმის ასე დატოვებას და აუცილებლად მიმართავს სასამართლოს. მისი თქმით, აუდიტის სამსახურის და კულტურის სამინისტროს ყველა ის თანამშრომელი უნდა წავიდეს სამსახურიდან, რომლებმაც კანონის დარღვევით იმოქმედეს.
“არა იმიტომ, რომ მაქვს გაასკეცებული სურვილი დავბრუნდე ფოლკლორის ცენტრის დირექტორად, არამედ იმიტომ, რომ სამართალმა იზეიმოს და კიდევ უფრო არ გაჩნდეს მოსახლეობაში გრძნობა, რომ სამართლიანობის აღდგენა კი არა, პირიქით, დასამარება ხდება, აუცილებლად გავასაჩივრებთ აუდიტის დასკვნასაც და კულტურის სამინისტროს გადაწყვეტილებასაც”.
მინისტრის ბრძანების გასაჩივრება დაადასტურა ადვოკატმა მამუკა ჭაბაშვილმა და განაცხადა, რომ შექმნილი სიტუაცია ძალიან აგონებს “მაგდანას ლურჯას”.
“მაგონდება “მაგდანას ლურჯა”, გადაგდებული სახედარი მერე ყველას რომ მოუნდა, ასეა აქაც. ფოლკლორის ცენტრი ჯერ არავის ახსოვდა, საკუთარი ხელებით, სპონსორების დახმარებით გაარემონტეს, აღადგინეს და ახლა ვიღაცას ქალაქის ცენტრში ფართი მოუნდა, იციან უშიკიშვილი არაფრით დაანებებს და გათავისუფლების ხერხს მიმართეს. მე პირადად მექმნება შთაბეჭდილება, რომ ოდიშარიას არც კი წაუკითხავს რაზე მოაწერინეს ხელი. როგორ შეიძლება კულტურის მინისტრი ასეთი აბსურდული მიზეზით გათავისუფლებას დათანხმდეს და არ გაუჩნდეს კითხვები”.
ჭაბაშვილის განცხადებით, კულტურის სამინისტრომ შეამოწმა ფოლკლორის ცენტრი და 29 ნოემბერს დაიწერა შემოწმების აქტი, რომელიც შორსაა კანონების ჩარჩოსგან. ამ დასკვნაზე თავისი აზრი ფოლკლურის ცენტრს უნდა წარმოედგინა 19 დეკემბრამდე, ანუ დღეს არის ბოლო დღე პასუხის წარდგენის. ადვოკატმა მედიის საშუალებით მიმართა კულტურის მინისტრს და ურჩია კიდევ ერთხელ გადაავლოს თვალი რა წერია უშიკიშვილის გათავისუფლების ბრძანებაში და აღნიშნა, რომ აუცილებლად მიმართავს სასამართლოს. ადვოკატი უშიკიშვილთან ერთად ითხოვს აუდიტის დასკვნისა და ცენტრის პასუხის საჯაროდ გამოქვეყნებასაც.
