საუბრის მთავარი თემა ფეხბურთის ირგვლივ განვითარებული მოვლენები იყო. როგორც გუბერნატორმა საუბრის დასასრულს განაცხადა, ფინანსური პრობლემის გადაწყვეტა ერთ დღეში არ ხდება, მთავარია მიმართულება იყოს შესაბამისი, რათა სამომავლოდ პრობლემები მოგვარდეს.
ასევე, საუბარი იყო თუ ვინ იქნება კლუბ “გურიას” მწვრთნელი. დასახელდა თემურ ლორიას, დავით მახარაძისა და გიგლა იმნაძის კანდიდატურები.
შეხვედრის დასასრულს გუბერნატორმა “გურია ნიუსის” კითხვებს უპასუხა:
_ რა საკითხთან დაკავშირებით გამართეთ შეხვედრა?
_ მოვიკითხე კლუბ “გურიაში” მიმდინარე მოვლენები. გავეცანი ვითარებას და ვფიქრობთ პერსპექტივაზე, რითაც შევძლებთ კლუბის სამომავლოდ განვითარებას. ასევე, ყველა აქ შეკრებილმა თავისი აზრი გამოხატა, თუ ვის როგორ ესახება კლუბის მომავალი.
_ ძირითადად ფინანსურ პრობლემებზე ისაუბრეთ?
_ რა თქმა უნდა, სპორტში ფინანსური პრობლემები თითქმის მთელ საქართველოშია და ამას ვერავინ გაექცევა. ახლა უკვე ველოდები მოსაზრებებს კლუბის ხელმძღვანელობიდან, გამგებლიდან, საკრებულოდან თუ ვინ როგორ ხედავს კლუბის განვითრებას.
_ ბატონო გიორგი, ჩვენ შეხვედრაზე შევნიშნეთ კლუბის ყოფილი დირექტორი ირაკლი ფაცურია, ყოფილი მწვრთნელი თემურ ლორია, რა სტატუსით მოიწვიეთ ისინი? ასევე, ჩვენი ინფორმაციით თქვენ თემურ ლორიას შესთავაზეთ “გურიას” მწვრთნელობა…
_ შეხვედრაზე მოვიდა ის, ვინც მოვიდა, ის ადამიანები, ვისაც სურდა თავისი აზრი დაეფიქსირებინა. კლუბის მწვრთნელობა მე შევთავაზე თემურ ლორიას, რომ წარმოადგინოს თავისი ხედვა. გამომდინარე იქედან, რომ ლორია ლანჩხუთელია და ასევე აქვს შესაბამის კვალიფიკაცია ტრენერის, აქედან გამომდინარე თუ ადამიანი თავის ხედვას არ წარმოადგენს რას ფიქრობს შეუძლებელია ყველაფერზე საუბარი. დღეს რეალურად კლუბს არ ჰყავს მთავარი მწვრთნელი, კლუბის ხელმძღვანელობასთან დაკავშირებით არ გვქონია საუბარი, იყო ძირითადად ის, თუ როგორ გამოსწორდეს კლუბის სიტუაცია.
_ რაც შეეხება თქვენს მოადგილეებს, ამჯერად მხოლოდ ერთი დასახელდა, რატომ შეჩერდა დანარჩენი ორი კანდიდატის დასახელება, განიხილება თუ არა ლანჩხუთიდან ჩიტიძის კანდიდატურა?
_ ეს არის ის შეკითხვა, რომელსაც უამრავჯერ გავეცი პასუხი – არ განიხილება, აქედან გამომდინარე იმედია ეს თემა ამოიწურება. რაც შეეხება მოადგილეების დანიშვნას, რეორგანიზაციიდან გამომდინარე, რომელიც იანვრის თვეში უნდა დასრულდეს, ახალ საშტატო განრიგს ველოდებით, რომელიც არ არის ჯერ დადგენილი, თუ რამდენი მოადგილე მეყოლება, აქედან გამომდინარე თავი შევიკავე მათი დანიშვნისგან. დაველოდები რეორგანიზაციის დასრულდებას.
