_ ბატონო ირაკლი, თქვენ ძალიან მნიშვნელოვანი შეხვედრა გქონდათ EBRD –ის მმართველ დირექტორთან ოლივიე დეკამთან, რომელმაც განაცხადა, რომ საქართველოს ინვესტიციების განხორციელების ყველაზე რეალური შესაძლებლობები ისეთ სფეროებში აქვს, როგორიცაა ენერგეტიკა და ჰიდროენერგეტიკა. ასევე, ბიზნესმენებთან შეხვედრაზე თქვენ განაცხადეთ, რომ განსაკუთრებით პრიორიტეტულია ქვეყნის ერთ–ერთ სტრატეგიულ სექტორში – ენერგეტიკაში ინვესტიციების მოზიდვაა.
მინდა გკითხოთ ქვეყნისთვის ერთ-ერთ მნიშვნელოვან პროექტზე, ხუდონჰესზე, რომელიც სწორედ ენერგეტიკის სფეროში უნდა განხორციელდეს. სახელმწიფო დგას ძალიან დიდი გამოწვევის წინაშე, ერთის მხრივ საუბარია ქვეყნის ენერგოდამოუკიდებლობასა და ინვესტორის წინაშე აღებულ ვალდებულებებზე და მეორეს მხრივ სვანეთის მოსახლეობაზე. როგორია თქვენი და მთავრობის პოზიცია და რა სამუშაოები ხორციელდება ამ მიმართულებით?
_ რაც შეეხება თქვენს კითხვას ხუდონჰესის შესახებ, მე ვიყავი ჩასული მესტიაში და შევხვდი ადგილობრივ მოსახლეობას. სახელმწიფომ უნდა შეასრულოს ის როლი, რომ არცერთი მხარე არ დარჩეს დაზარალებული, მათ შორის არც ინვესტორი, რომელიც ჩვენთვის არის ძალიან მნიშვნელოვანი და ძალიან ძვირფასი. ასევე, ძალიან ძვირფასია ჩვენი ბუნება და ჩვენი მოქალაქეები. უნდა გამოვნახოთ ისეთი მექანიზმები, რომ არცერთ მხარეს არ დარჩეს არცერთი შეკითხვა.
ჩვენი ინფორმაციით, არსებობს კითხვები, რომელზეც ძალიან სერიოზულად მუშაობს ინვესტორი კომპანია, რომ ეს კითხვები მოიხსნას, გაკეთდეს განმარტებები და ამის შემდეგ გადაწყდება ეს საკითხი. ჩვენი მიზანია, რომ არცერთ მოქალაქეს, რომელიც სვანეთშია, არ დარჩეს არცერთი კითხვა და ჩვენ ამას მოვახერხებთ. დარწმუნებული ვარ, ინვესტორი კომპანია ყველაფერს გააკეთებს იმისთვის, რომ მაქსიმალურად გამჭვირვალე იყოს ეს პროცესი და განუმარტოს მოსახლეობას, თუ რას ითვალისწინებს ხუდონჰესის პროექტის მშენებლობა.
თავის მხრივ, მთავრობა და ენერგეტიკის სამინისტრო დეტალურ ინფორმაციას მიაწვდის მოსახლეობას ამ პროექტის მნიშვნელობის შესახებ და მისი პერსპექტივების თაობაზე, თუ რა სარგებელი შეიძლება მოუტანოს ამ პროექტმა ჩვენს ქვეყანას და ხალხს.
_ განსაზღვრავს თუ არა ხუდონჰესის პროექტი მნიშვნელოვანწილად ქვეყნის ენერგოდამოუკიდებლობას?
_ ჩემი ინფორმაციით, ეს პროექტი ნამდვილად განსაზღვრავს მნიშვნელოვნად ქვეყნის ენერგოდამოუკიდებლობას. სწორედ ამიტომ არის მნიშვნელოვანი ჩვენთვის ეს პროექტი, მაგრამ ეს არ უნდა მოხდეს ისე, მოსახლეობას დარჩეს განცდა, რომ იქ რაღაც დაზიანდა.
რაც შეეხება პრემიერის ვრცელ განცხადებას ენერგეტიკის სფეროში განხორციელებულ პროექტებსა და სამომავლო გეგმებზე, “გურია ნიუსი” მოგვიანებით შემოგთავაზებთ.
