2014 წელს მუნიციპალიტეტში დაგეგმილი ინფრასტრუქტურული პროექტების ფარგლებში ქალაქ საჩხერეში განხორციელდება საავტომობილო და საცალფეხო ხიდს შორის საყრდენი კედლის მშენებლობა, კეთილმოეწყობა მერაბ კოსტავას სახელობის სკვერი, კაპიტალურად შეკეთდება №2 საბავშვო ბაღი. სოფელ სავანეში, სარეკსა და ბაჯითში დაიწყება სასმელი წყლის სისტემების მშენებლობა; სოფელ ბაჯითშივე საავტომობილო გზაზე მოეწყობა ასფალტო-ბეტონის საფარი. განსახორციელებელ პროექტებს შორის დაგეგმილია გარე განათების მოწყობა ცენტრალური საავადმყოფოდან სასტუმრომდე.
მთავრობის მიერ მუნიციპალიტეტისთვის გამოყოფილი თანხით წელს 7 პროექტი დაფინანსდა.
შესრულებულ სამუშაოებს მონიტორინგს საქართველოს რეგიონული განვითარებისა და ინფრასტრუქტურის სამინისტრო გაუწევს.
