ხაიშის თემის იმ ნაწილმა, რომელიც მიწების დარეგისტრირების მიზნით აზომვითი სამუშაობის ჩატარებას აპროტესტებს, ხელისუფლებასთან მოლაპარაკების შემდეგ გადაწყვეტილება მიიღო, რომ რადგანაც ხელისუფლებისთვის ხუდონჰესის პროექტი უმნიშვნელოვანესია, მთლიანად სვანეთის უხუცესებმა და საკრებულოს წევრებმა იმსჯელონ ამ საკითხზე.
სასჯელაღსრულების და პრობაციის მინისტრის სოზარ სუბარი ხაიშის მოსახლეობასთან შეხვედრის შემდეგ “გურია ნიუსთან” ვრცელ კომენტარს აკეთებს, რომელსაც უცვლელად გთავაზობთ:
“ხაიშელებთან შეხვედრა ძალიან საინტერესო იყო. ჩვენ ვისაუბრეთ ხუდონჰესთან დაკავშირებით. ბუნებრივია, ეს ძალიან რთული თემაა და ყველა მხრიდან უნდა იქნეს შესწავლილი, ყველა დეტალი კარგად აწონილ-დაწონილი უნდა იყოს. მაშინ როდესაც, ერთის მხრივ, არის ქვეყნის უმნიშვნელოვანესი ეკომონიკური ინტერესი და მეორეს მხრივ, საზოგადოების გარკვეული ნაწილი ამაში გარკვეულ საფრთხეებს ხედავს, ბუნებრივია, რომ გადაწყვეტილებები კომპრომისის გზით უნდა იქნეს მიღებული. სწორედ ამ მიდგომით განსხვავდება ახლანდელი ხელისუფლება წინა ხელისუფლებისგან. ჩვენთვის ნებისმიერ საკითხზე მნიშვნელოვანია სწორედ საზოგადოების აზრი და დიალოგი საზოგადოებასთან.
ალბათ, ყველას ახსოვს, ყოფილმა პრემიერმა ბიძინა ივანიშვილმა და ახლანდელმა პრემიერ-მინისტრმა ირაკლი ღარიბაშვილმა თავის დროზე მკაფიოდ განაცხადეს, რომ ხალხის ნების საწინააღმდეგოდ არაფერი მოხდება. ხელისუფლება ერთპიროვნული გადაწყვეტილების მიღებას არ აპირებს და ეს კარგად ესმის ხაიშის მოსახლეობასაც. თავის მხრივ, ხაიშელებიც მზად არიან მოისმინონ განსხვავებული აზრი და მხოლოდ მათ არ აიღონ პასუხისმგებლობა ჰიდროელექტროსადგურის მომავალზე. სწორედ ამიტომ ხაიშელების წინადადებაა – 6 თებერვალს შეიკრიბონ წარმომადგენლები მთელი სვანეთიდან და მათ მიერ ერთიანი პოზიცია შემუშავდეს. თუმცა საბოლოო გადაწყვეტილება, ბუნებრივია, ერთ დღეში არ იქნება მიღებული.
ერთიანი პოზიცია მას შემდეგ ჩამოყალიბდება, რაც ხელისუფლების და საზოგადოების წარმომადგენლები დეტალურად განიხილავენ ყველა საფრთხეს თუ სიკეთეს, რაც ამ პროექტის განხორციელებით იქნება მიღწეული. ორივე მხარის მიერ საჭიროა სერიოზული ფიქრი, განსჯა და პრობლემის სიღრმისეული შესწავლა, იმისთვის რომ საბოლოო გადაწყვეტილება ყველასთვის მისაღები იყოს. თუმცა, ალბათ, „ორი მხარე” პირობითი ცნებაა, რადგან რეალურად ამ ქვეყანაში ყველა ერთი მხარე ვართ.
მე პირადად ამ საკითხთან დაკავშირებით განსაკუთრებული დამოკიდებულება მაქვს. ჩემი სოფელი ჭუბერი ხაიშიდან 8 კილომეტრში მდებარეობს, ჩემი სახლი დღესაც იქაა და ხაიშელების ინტერესი ჩემთვის სასიცოცხლოდ მნიშვნელოვანია.” _ აცხადებს სოზარ სუბარი.
