ბოლოს ისინი 17 მაისს რუსთაველის გამზირზე გამოჩნდნენ და ლგბტ თემს აქციის ჩატარების საშუალება არ მისცეს.
ჯგუფი გუშინაც აქტიურად აპროტესტებდა “დედა ენის” ბაღში ჩატარებულ აქციას _ “არა თეოკრატიას!”
ევგენი მიქელაძე, რომელსაც სოციალურ ქსელებში საქართველოში ფაშიზმის ფუძემდებელიც უწოდეს, “გურია ნიუსთან” ამბობს, რომ ის გადაშენების პირას მისული ნაციის ინტერესებს იცავს:
_ პატრიოტებს, ქართველი ერის ღირსეულ შვილებს არ მისცეს უფლება და “დედა ენის” ძეგლის წინ აქციას ჩაატარებინეს ჰომოსექსუალისტებს და მათ დამცველებს. ეს არის უპრეცედენტოდ სამარცხვინო გადაწყვეტილება და მე მინდა ვუთხრა მათ, რომ ამ სირცხვილს ისინი ვერ ჩამოირეცხავენ. თუ ასე აპირებენ მომავალშიც გაგრძელებას, ძალიან მცირე ხანში ნაციონალური მოძრაობის ბედს გაიზიარებენ.
_ საზოგადოების ნაწილი ფიქრობს, რომ თქვენს მოძრაობას რუსეთი აფინანსებს.
_ “ნაციონალურმა მოძრაობამ” რუსეთს გაუფორმა კაპიტულაცია, სააკაშვილმა პირადად მისწერა წერილი მედვედევს, რომ ოღონდ არ აიღოთ თბილისი და არ ჩამომკიდოთ, და ცხინვალსა და აფხაზეთში არასოდეს შევიჭრებიო. აგრეთვე, მათ გააფორმეს გორი-როკი-ფსოუ-ზუგდიდის ეკონომიკური ბუფერები. ესენი არც რუსეთუმეები არიან, არც პროამერიკულები. ესენი ფულზე გაყიდული ხალხია, და მიეყიდებიან ნებისმიერს, რომელიც მათ გადაუხდის.
_ რა მიზნებს ისახავს თქვენი ორგანიზაცია?
_ ორგანიზაცია, რომელშიც ამ დროისთვის 60 აქტივისტი გაერთიანებული, მოწოდებულია, დაიცვას და დაამკვიდროს ქართული და ქრისტიანული ღირებულებები ქვეყანაში. ჩვენ ჩავატარეთ აქციები მეჩეთების, ჰუალინგის ზონის წინააღმდეგ; ქართული მიწების გასხვისებისა და რეგიონული ენების შემოღების წინააღმდეგ, ანუ ჩვენ აქციებს ვატარებთ და აქტუალურს ვხდით ყველა იმ პრობლემას, რომელიც საფრთხეს უქმნის ქართული ნაციის არსებობას. დღევანდელ გლობალისტურ ეპოქაში ჩვენს ნაციას რეალურად გადაშენება ემუქრება ამდენი გამყიდველის ხელში, იქნება ეს მულტიკულტურალიზმი, თუ უვიზო რეჟიმები. 50 ქვეყანასთან გვაქვს უვზო რეჟიმი, მათ შორის აფრიკის და აზიის ქვეყნებთან. ქართველებზე მეტი უცხოელი გვხვდება ქუჩებში. ქართველების გენეტიკური გადაჯიშება მიდის და ასეთ ტალღას ვერ უძლებს არა თუ საქართველო, არამედ გერმანია, ინგლისი, რომელთა მოსახლეობაც 80 მილიონს აღემატება.
_ სოციალურ ქსელებში თქვენ უკვე გიწოდეს ფაშიზმის ფუძემდებელი.
_ ფაშიზმი რომ მიწოდეს, ეგ არაფერია. ფაშისტს უწოდებდნენ მერაბ კოსტავას, ზვიად გამსახურდიას და მე არ მრცხვენია რომ მათ გვერდით მომიხსენიონ ფაშისტად.
_ რატომ არ აძლევთ სექსუალურ უმცირესობებს ან ჰომოფობიის მოწინააღმდეგეებს თავისუფლად ჩაატარონ აქციები? ამის უფლება მათ კანონით აქვთ.
_ შეკრება, დემონსტრაცია _ ეს არის პროპაგანდის ერთ-ერთი ფორმა. ჩვენ ვეწინააღმდეგებით არა მათ არსებობას, არამედ მათი იდეოლოგიის დამკვიდრებას და პროპაგანდას. ჩვენ ვგმობთ არა ადამიანებს, არამედ ცოდვას. ჩვენი მიზანია, რომ ხელისუფლებამ კანონმდებლობით აკრძალოს ჰომოსექსუალიზმის პროპაგანდა-აგიტაცია.
