“ბუნებრივია, რუსეთის საოკუპაციო ჯარების მიერ განხორციელებული უტიფარი სცენები, ყოვლად მიუღებელია. ეს არის აშკარა და მკაფიო რეაქცია იმ მშვიდ პოლიტიკაზე, რომელსაც ახლი მთავრობა ახორციელებს. სხვა გამოსავალი არ აქვთ გარდა იმისა, რომ გამოგვიწვიონ და ჩაგვითრიონ მოლაპარაკებაში საზღვრებზე, რომელიც არ არსებობს. ვერ ვილაპარაკებთ ვერანაირ ფორმებზე. გვაქვს ინფორმაცია თუ რამე არ მოგვწონს, ოსური მხარე მზად იქნებოდა გველაპარაკა – კი ბატონო 300 მეტრი, 400 მეტრი, 500 მეტრი უკან წაიღებდნენ. ოღონდ, რაზეც შევთანხმდებოდით, ეს იქნებოდა მათი სახელმწიფო საზღვარი.
ეს პოზიცია ჩვენთვის ყოვლად მიუღებელი და დაუშვებელია. ჩვენთვის მიუღებელია იმის გააზრება რომ 300 მეტრი გადმოიწევს, 200 მეტრი გადმოიწევს. 200 და 300 მეტრი კი არა ქვეყნის 20%-ია დაკავებული, ამიტომ ის უტიფარი ცინიზმის პროპაგანდა, თითქოს რაღაც საშინელება ხდება… საშინელება უკვე მოხდა 2008 წლის აგვისტოში და ტრაგედია გრძელდება. აგვისტოდან მოყოლებული ათასობით ადამიანი დაზარალდა.
ჩვენი მთავარი ამოცანაა ვუპატრონოთ იმ ხალხს, რომელიც ყველაზე მეტად დაზარალდა. ამ ეტაპზე საუბარი ეხება ასობით ადამიანს, რომელსაც უშუალოდ შეეხო რუსეთის მხრიდან გამყოფი ხაზის დაფიქსირება. ეს დაახლოების 60-80 ოჯახია.
მივიღეთ გადაწყვეტილება, ჩვენი რეინტეგრაციის სახელმწიფო მინისტრის აპარატი, სოფლის მეურნეობის სამინისტრო და ინფრასტრუქტურის სამინისტრო შექმნის სამუშაო ჯგუფს. 2-3 დღეში ჩავლენ ადგილზე და შეისწავლიან დაზარალებულ ოჯახებს რა სჭირდებათ, რა საფრთხე შეექმნათ და რა ზარალი მიიღეს. ხელი შეუწყოთ და არ იფიქრონ ტერიტორიის დატოვებაზე. მივიღებთ გადაწყვეტილებას, რა დახმარება შეიძლება გავუწიოთ დაზარალებულ ოჯახებს.
ჩვენ, დიდი ხანია ვმუშაობთ გამყოფი ხაზის გასწვრივ არსებული სოფლების უშუალო პრობლემის მოგვარებაზე. ამ სოფლების მიმართ ახალი პოლიტიკა გვაქვს დაფიქსირებული. შეუქმნათ ისეთი პირობები, ვიდრე ჰქონდათ ოკუპაციამდე და ხალხი რომლებიც წამოსულია, დაბრუნდნენ. გამყოფი ხაზის გასწვრივ მოსახლეობას დავანახებთ, რომ მათთვის უფრო საინტერესო და მნიშვნელოვანია განათლება, ჯანდაცვა. ისინი დაცული იქნებიან და იცხოვრებენ ამ გამყოფი ხაზის გასწვრივ. მინდა აღვნიშნო, რომ აშკარად გაიზარდა ოსური მოსახლეობის მოძრაობა დანარჩენი საქართველოს მხარეს. მე არ ვიტყუები, დღე არ გავა ცხინვალში მცხოვრებ 4-5 ადამიანს ჯანდაცვის მომსახურეობაზე ხელი არ მოვუწერო.
პირველ რიგში, გამყოფი ხაზების გამკაცრება და საინჟინრო ნაგებობების შექმნა მხოლოდ იმისთვის ხდება, სქართველოში მოძრაობაში ოსებს შეუშალონ ხელი. კონტაქტები გვაქვს ცხინვალთან. აღშფოთებულია მოსახლეობა, რომლებსაც აქ ნათესავები ჰყავთ, აქ ვაჭრობდნენ, აქ სწავლობდნენ და ჩამოდიოდნენ სამკურნალოდ. ისინი ხვდებიან რომ ეს ახალი პოლიტიკის შედეგად შექმნილი ვითარების გამო ხდება. ადრე თუ ოსებს უჭირდათ და ეშინოდათ თბილისში ან გორში გადმოსვლის, რადგან გზად ქართული სპეცსამსახურის წარმომადგენლები ხვდებოდნენ, შეიძლება აპატიმრებდნენ კიდეც. ხშირ შემთხვევაში ხდებოდა გადმობირება, დაშანტაჟება, დაშინება ინფორმაციის მოწოდებაზე. ეს რომ მოისპო, ყველა მიხვდა, რომ ვითარება შეიცვალა. ყოველდღე, რეგულარულად, ასობით ადამიანმა დაიწყო სიარული. ეს არის რუსეთის რეაქცია ამ ახალ პოლიტიკაზე. ჩვენ გვინდა განვაგრძოთ მშვიდი, პრაგმატული პოლიტიკა, ყოველგვარი ვნებათაღელვის გარეშე. არ ავყვეთ პროვოკაციებს, არ ავყვეთ საპასუხო ემოციურ ნაბიჯებს. გვინდა ადგილზე შევინარჩუნოთ მოსახლეობა და ყველამ ნახოს, რამდენად განსხვავებულია ჩვენი და წინა ხელისუფლების პოლიტიკა.”- განაცხადა ჟურნალისტებთან ზაქარეიშვილმა.
