სხდომის შედეგი ასეთია _ 18 ხმით ხუთის წინააღმდეგ სენაკის მუნიციპალიტეტის საკრებულოს თავმჯდომარე მურად შამათავა სენაკის საკრებულოს თავმჯდომარის თანამდებობიდან გადააყენეს. მის მოვალეობას ახალი თავმჯდომარის არჩევამდე საკრებულოს თავმჯდომარის მოადგილე ზურაბ ხაბურზანია შეასრულებს.
მურად შამათავა ამბობს, რომ ის არ აპირებს უსამართლობასთან შეგუებას და სარჩელს სასამართლოში შეიტანს.
იმის გასაგებად, თუ რას ფიქრობენ სენაკელები საკრებულოს ამ გადაწყვეტილების შესახებ, რამდენიმე მოქალაქეს გავესაუბრეთ.
ვალერი მურღულია: “14 ივნისს სენაკის საკრებულოს ისტორიაში კიდევ ერთი სამარცხვინო ფურცელი ჩაიწერა _ სენაკის საკრებულოს იმ წარმომადგენლებმა, რომლებიც მჭიდროდ არიან დაკავშირებული სააკაშვილის „პირსისხლიან“ რეჟიმთან, ყოველგვარი დასაბუთების გარეშე მურად შამათავას იმპიჩმენტი მოუწყვეს. ნეტავ, რამდენი გადაუხადეს, ან რას შეპირდნენ ისეთს, რომ შამათავას წინააღმდეგ ხმა მისცეს? დამერწმუნეთ, იქ ისეთი დეპუტატებიც იყვნენ, რომლებმაც საერთოდ არ იცოდნენ, რა საკითხი გადიოდა სხდომაზე და რატომ აწიეს ხელი. „პატარა შადიმანების“ დრო მალე დასრულდება და მაშინ როგორღა გაივლიან სენაკში ან ამაღამ მშვიდად როგორ დაიძინებენ უკანონობის მომხრეები?”
ლარისა აგაბალაევა, ეთნიკური უმცირესობის წარმომადგენელი: _ სამარცხვინო ფაქტი იყო. საკრებულოს წევრები დამუშავებულები იყვნენ. როგორც გავიგეთ, მუქარაც ძალიან დიდი ყოფილა და სწორედ ამიტომ მისცეს ხმა შამათავას წინააღმდეგ. შამათავა გადააყენეს, მაგრამ ვიცი, რომ სასამართლოში ჩივილს აპირებს. ამბობენ, ასეთი მოვლენები ყველა რაიონებში განვითარდებაო. არ ვიცი, რას აკეთებს „ქართული ოცნება“, მაგრამ ჩანს, რომ ოცნება ოცნებად დარჩება. სამარცხვინოა _ “რესპუბლიკურ პარტიაში” გადაბარგებულ ფრაქცია „ნაციონალური მოძრაობის“ თავმჯდომარეს, ნარმანიას როგორ უნდა გადაეყენებინა „ქართული ოცნების“ კანდიდატი? ხვიჩა ნარმანია 9 წლის განმავლობაში სააკაშვილის და მისი გუნდის დავალებებს ასრულებდა, მთელ სენაკს ახსოვს წინასაარჩევნო პერიოდში მისი დანაშაულებრივი ქმედებები.
_ ახლა ვინ ასრულებს საკრებულოს თავმჯდომარის მოვალეობას?
_ ზურაბ ხაბურზანია. “კანონიერი ქურდის” ცანციკო ბარკალაიას ცოლისძმამ დღეს იმპიჩმენტი გამოუცხადა შამათავას და თავად დაიკავა საკრებულოს თავმჯდომარის პოსტი. არაფრით არ დავთმობთ, არ დავუშვებთ სენაკში “ნაციონალების” და “კანონიერი ქურდების” დაბრუნებას.
ჩვენ ვცადეთ დავკავშირებოდით მურად შამათავას და ხვიჩა ნარმანიას, მაგრამ ეს შეუძლებელი აღმოჩნდა.
