“ცხადად ვხედავ, ქართველი ერის მიერ ბრძოლებითა და სისხლით მოპოვებული და დაბრუნებული, ეროვნული თავისუფლებისა და დამოუკიდებლობის დაკნინების, დაკარგვის, საქართველოს რუსეთის იმპერიის გავლენის სფეროსა და სტრატეგიულ სივრცეში დაბრუნების,ამერიკასთან და დასავლეთთან დაცილების რეალურ საშიშროებას. სახეზეა მმართველი ხელისუფლების მშიშარა, კაპიტულანტურ-რენეგატული პოლიტიკა, ქვეყანაში კოლაბორაციონისტულ, მარიონეტულ და აგენტურულ პოლიტიკურ ძალთა მომძლავრება. რეალურია საფრთხე საქართველოს დსთ-ში დაბრუნებისა და ევრაზიის კავშირში შესვლის, აგრეთვე სუვერენული ქართული სახელმწიფოს სრული პოლიტიკური, ეკონომიკური და ფიზიკური დაუძლურებისა და დაცემის”.
წერეთლის განცხადებით, ის ვერ ეგუება არსებულ სიტუაციას და საზოგადოების გამოსაფხიზლებლად აპირებს შიმშილობის დაწყებას.
ამ განცხადების გავრცელების დროს ჯერ კიდევ უცნობი იყო შიმშილობის დაწყების დრო და ადგილი, დღეს კი ირაკლი წერეთელმა შიმშილობის შესახებ კონკრეტული და ძირითადი ინფორმაციები დააანონსა.
1. შიმშილობა დაიწყება 2013 წლის 18 ივნისს, ქრისტესშობიდან, სამშაბათს, საქართველოს დედაქალაქში, დღის 5 საათამდე.
2. შიმშილობა გამოცხადდება სპეციალურად მოწვეულ ბრიფინგზე ან “პრაიმ ტაიმის” სტუდიაში ან საქართველოს პარლამენტის ნაგებობის წინ, რუსთაველის გამზირზე.
3. შიმშილობა დაიწყება გამოკვეთილად კონკრეტული, პოლიტიკური და სტრატეგიულად უმნიშვნელოვანესი მოთხოვნებით.
4. შიმშილობის მოთხოვნები უკვე მთელი სიცხადით არის მოცემული წერილობით დოკუმენტებში, რომლებიც დაიდო ირაკლი წერეთლის ინტერნეტ კედელზე მოთხოვნათა ჩამონათვალისა და მიმართვის სახით და გამოქვეყნდა სხვადასხვა საინფორმაციო სააგენტოებში. 5. შიმშილობას და მის მოთხოვნებს ჰყავს სამი ძირითადი ადრტესატი _ დემოკრატიული მსოფლიოს სახელმწიფოთა მეთაურები, მთავრობები და პარლამენტები, საქართველოს დღევანდელი აღმასრულებელი და საკანონმდებლო ხელისუფლება და ქართველი ერი.
6. შიმშილობის შესახებ არსებული დოკუმენტაცია ქართულ და ინგლისურ ენაზე გადამრავლდება და გავრცელდება უკლებლივ ყველა საჭირო და აუცილებელი მიმართულებით.
7. შიმშილობას აქვს არა უვადო, არამედ გამაფრთხილებელი ხასიათი, მაგრამ არ იქნება ხანმოკლე და შეიძლება იყოს საკმაოდ ხანგრძლივი ან გარდაუვალ შემთხვევაში გადაიზარდოს უვადო შიმშილობაში.
8. შიმშილობის დაწყებიდან მოშიმშილე აყვანილ იქნება ყოველდღიური სამედიცინო კონტროლის ქვეშ, რათა გამოირიცხოს ყოველგვარი ტყუილი და არაკეთილსინდისიერება მოშიმშილეს მხრიდან.
9. შიმშილობა გაიმართება პერიოდულად საქართველოს პარლამენტის შენობის, აშშ-ს საელჩოსა და ბრიტანეთის საელჩოს წინ, დღეში რამდენიმე საათით.
10. ხალხმრავლობის შემთხვევაში მოშიმშილე ჩაატარებს მიტინგებს, მანიფესტაციებს, დემონსტრაციებსა და საჯარო ღონისძიებებს.
11. მოშიმშილე ითანამშრომლებს უკლებლივ ყველასთან, ვინც გამოუცხადებს სოლიდარობას შიმშილობის კონკრეტულ მოთხოვნებს.
12. შეიძლება შიმშილობის პროცესში გამოჩნდეს ახალი მოთხოვნებიც, ოღონდ შიმშილობის სტრატეგიული მიმდინარეობის ფარგლებში.
