ანალიტიკოსი დემურ გიორხელიძე თვლის, რომ საქართველოს საშინაო საქმეებში არავინ არ უნდა ერეოდეს და ქვეყნის მთავრობაც არ უნდა აძლევდეს გარეშე პირებს ამის კეთების საშუალებას.
მისივე თქმით, იმ დროს, როცა საფრანგეთის გავლენიანი პრეზიდენტი დააკავეს და არავის შეუფასებია ეს პოლიტიკურ დევნად, არავინ ჩარეულა ქვეყნის საშინაო საქმეში და მსოფლიოს არცერთ მაღალჩინოსანს არ უსწავლებია საფრანგეთის სასამართლოსთვის განაჩენის გამოტანა, ამას აკეთებს საქართველოს სასამართლოს მიმართებაში უკრაინის ყოფილი შს მინისტრი ლუცენკო და ხელისუფლების რეაგირებაც არ არის მკვეთრი.
გიორხელიძის აზრით, აუცილებელია ქვეყანაში სამართლიანობის აღდგენის პროცესის დაწყება და ამ კონტექსში ექს-პრეზიდენტი, მიხეილ სააკაშვილი უნდა წარსდგეს სასამართლოს წინაშე, რადგან მის წინააღმდეგ არსებობს ბევრი ინფორმაცია და აუცილებელია ყველა კითხვას პასუხი გაეცეს.
"სააკაშვილი უნდა წარსდგეს სასამართლოს წინაშე და სასამართლო გადაწყვეტს მის დამნაშავეობას თუ უდანაშაულობას, მაგრამ ვფიქრობ საზღვარგარეთ არსებული ინტერესების გამო ხელისუფლება უარს იტყვის სააკაშვილის სამართლებრივ დევნაზე და ეს უდიდესი შეცდომა იქნება!"
გიორხელიძე მიიჩნევს, რომ დღეს საქართველოში დიქტატურის საფრთხე არ დგას, რადგან კოალიცია "ქართული ოცნების" დაშლა გარდაუვალია, თუმცა, მისივე თქმით საინტერესო იქნება რასთან დაკავშირებით დაიწყება კოალიციის რღვევა.
"მთავარია, რასთან იქნება დაკავშირებული კოალიციის ბუნებრივი დაშლა – ახალ საპარლამენტო არჩევნებთან თუ რაიმე პოლიტიკურ კრიზისთან. დღევანდელ სიტუაციაში კოალიციას უბრალოდ აწყობს ერთად ყოფნა, რომ არ დაუშვას ვადამდელი საპარლამენტო არჩევნები და შექმნას ილუზია ერთიანობისა, მაგრამ პარლამენტი პრინციპში არაეფექტურია, უკვე ორი წელი იწურება, ეკონომიკური მდგომარეობა რთულია, ჯერჯერობით გამოკვეთილი, ზუსტი ტენდენციები არ ჩანს, ასე რომ ბევრი მიზეზი არსებობს, თანაც ჩვენ უნდა ველოდოთ ოპოზიციური ძალების სერიოზულ გააქტიურებას. თანდათან წარმოჩინდება უკვე ყბადაღებული "მესამე ძალა".
ვფიქრობ, რომ მოძრაობა დაწყებულია და პირველი რასაც უნდა ინტენსიური სახე მიეცეს, ადამიანებმა ერთმანეთთან უნდა აღადგინონ კავშირები და რაც მეტი ადამიანი იქნება აქტიური, უკეთესი იქნება. არ არის საჭირო მოლოდინი, რომ ვიღაც პატრონი გამოჩნდება, ვიღაც მხსნელი მოგვევლინება. ხომ ხედავთ რომ არ ჩანს და არც იქნება არასდროს. რჩება ერთი გზა-საკუთარი შვილების ბედის მაფიქრებელი ადამიანები ნახავენ ერთმანეთს, შეთანხმდებიან რანაირი მომავალი სჭირდებათ უკეთესი ხვალინდელი დღისთვის და შესაბამისად მოხდება იმ პოლიტიკური ძალის გაფორმება, ამიტომ არც ფულს უნდა ლოდინი, არც მხსნელს, მათ გააერთიანებთ იდეა, პასუხისმგებლობა და არა ბელადი ან ფულისადმი მიდრეკილება."
გიორხელიძის თქმით, დღეს კარგად ჩანს რომ პრემიერი და პრეზიდენტი ერთმანეთს კოორდინირებულად და კონსტიტუციის ფარგლებში არ ესაუბრებიან, რაც არცერთი მხარისთვის არ არის მომგებიანი.
