ექსპრეზიდენტის, მიხელ სააკაშვილისთვის წაყენებულ ბრალს, პარლამენტის თავმჯდომარის პირველი მოადგილე მანანა კობახიძე გამოეხმაურა:
"პროკურატურამ ბრალი წაუყენა ყოფილ პრეზიდენტს და მისი გუნდის რამოდენიმე წევრს, უფრო ზუსტად, დანაშაულებრივი რეჟიმის მთავარ არქიტექტორებს! "ნაციონალური მოძრაობა" კი ისევ პოლიტიკურ დევნაზე საუბრობს, მაგრამ ამის ხომ, პირველ რიგში თავად არ სჯერათ, ისინი ხომ თავად არიან უმთავრესი მოწმენი და თანამონაწილენი იმ ყველა უბედურების, რაც ამ ქვეყანაში დაატრიალეს! პოლიტიკური არა ბატონებო, სისხლის სამართლებრივი დევნა მიმდინარეობს დიახ, პოლიტიკური თანამდებობის პირების მიმართ, ვინც, როგორც ირკვევა, არაერთ მძიმე დანაშაულს ჩადიოდნენ, რათა როგორმე გაეხანგრძლივებინათ ამ თანამდებობაზე ყოფნა, მოეპოვებინათ სრული ძალაუფლება ყველაზე და ყველაფერზე", _ აცხადებს მანანა კობახიძე.
მისი თქმით, ყოფილ პრეზიდენტს, სააკაშვილს სურს, რომ უკრაინა ფარად გამოიყენოს:
მანანა კობახიძე: "თქვენ არც ეს ქვეყანა გაწუხებთ, არც მოქალაქეების პრობლემები და არც უკრაინის ბედი. თქვენ ის ხალხი ხართ, მეგობარი ქვეყნის ტრაგედიაშიც საკუთარ სარგებელს რომ ეძებთ. სააკაშვილს ახლა უკრაინა უნდა ფარად დაიყენოს და მსოფლიო დემოკრატიისთვის მებრძოლ რაინდად მოგვევლინოს, მაგრამ ბავშვმაც კი იცის, რომ მას ერთადერთი რამ აწუხებს, როგორმე თავი დააღწიოს პასუხისმგებლობას, რაც არასოდეს გააჩნდა არა მარტო კანონის, ქვეყნის და ხალხის, არამედ საკუთარი თანაგუნდელების წინაშეც. ხომ ხედავთ გაიქცა და მიგატოვათ, პოლიტიკურ სამარეში რაღას მიყვებით?! იმის იმედი გაქვთ, რომ დაგიფასებთ?! ადექით და თქვენ მაინც მოუხადეთ ბოდიში საქართველოს ამდენი სიცოცხლის ხელყოფისთვის, ამდენი ოჯახის განადგურებისთვის, ამდენი აყრილი ღირსებისთვის, შელახული კაცობისთვის და კიდევ ბევრი უბედურებისთვის, მაგრამ ბოდიში რომ მოიხადოთ, სინანული უნდა გქონდეთ, თქვენ კი ერთადერთი რამის სინანული გაქვთ, ძალაუფლება როგორ დაკარგეთ. დიდი ხანია ყველა კარგად ხედავს თქვენ რეალურ სახეს, ქვეყნის შიგნითაც და გარეთაც, საბედნიეროდ, დღეს სახელმწიფო და საზოგადოების უდიდესი ნაწილი ერთიანია, იმიტომ რომ არ არსებობს ორი სიმართლე და სამართალი აუცილებლად გზას იპოვის ამ ქვეყანაში."
