ოზურგეთის მუნიციპალიტეტის საკრებულოს თანაშემწე ია (იაკობ) დოლიძე, რომლის ბეგრაუნდზეც უკვე ვწერდით, "გურია ნიუსთან" საუბრისას ამბობს, რომ "ზურგზე არაფერი ჰკიდია". ყოფილი პროკურორის თქმით, მისი დაკავება "შეთითხნილი" ბრალდებით მოხდა და ამის შესახებ "იქ იციან, სადაც საჭიროა".
_ არ მივეკუთვნები იმ კატეგორიას, რომ რომელიმე კითხვას პასუხი არ გავცე ან ღია დავტოვო…
_ შეცვლილხართ…
_ არა, თქვენ გენაცვალეთ. პასკვილები ჩემი მოგონილია საერთოდ.
_ ეს როგორ გავიგოთ?
_ მაგას არც ვმალავ. პასკვილი პირველი მესროლეთ და მეც პასკვილით უნდა გიპასუხოთ.
_ გეშლებათ, ბატონო ია. ჩვენ კონკრეტული ფაქტები ამოვიღეთ არქივიდან და შეგახსენეთ, რა და როგორ იყო…
_ მე ღია და გახსნილი ვარ. არანაირი პრობლემა არ მაქვს. ყველა კითხვაზე გიპასუხებთ.
_ შალვა (კუსა) დოლიძის იმ ბრალდებაზე რას იტყვით, რომლის თანახმადაც, თქვენ ადეიშვილის და მერაბიშვილის მითითებებს ასრულებდით?
_ ეს არის აბსურდი. ამ საქმესთან მე, ია დოლიძეს, ოზურგეთის პროკურორს, არანაირი შეხება არ მქონია _ არც დაკავება, არც ოპერაცია, არც საქმის ზედამხედველობა, არც ბრალის წაყენება და არც სასამართლო პროცესი. ეს ყველაფერი საოლქო პროკურატურას ჰქონდა წარმოებაში. ეს მანაც კარგად იცის. არც კი შემითანხმეს ეს საქმე და განაწყენებულიც კი ვიყავი, რადგან გვიან გამაგებინეს. ალბათ, ჩემი მოგვარე რომ იყო, არ მენდნენ.
_ ბატონო იაკობ, თქვენი პროკურორობისას ერთ-ერთი გახმაურებული საქმე ბუკიას თემა იყო. მას თქვენი ოჯახის წევრი უყვარდა და ამ სიყვარულის გამო სასტიკად დაისაჯა.
_ ვისზეც თქვენ საუბრობთ, იმ ადამიანს ოჯახი ჰყავს და არ მინდა ამაზე საუბარი. მაგ საქმესთან მე არაფერ შუაში არ ვარ
_ ბუკიას ურეკში არ შეხვედრიხართ და მასთან დაპირისპირება არ გქონიათ?
_ არა. საერთოდ არ ყოფილა მსგავსი რამ(?!).
_ ეს დაპირისპირება ძალიან ბევრს ახსოვს… სწორედ ამის შემდეგ აღმოაჩნდა მარიხუანა იმ ახალგაზრდას, რომელიც რამდენიმე წელი ძებნაში იყო…
_ მსგავსი რამ არ ყოფილა, _ კატეგორიულად უარყო დოლიძემ ის, რასაც ურეკში ათობით ადამიანი შეესწრო.
ჩვენთან საუბრისას, ყოფილი პროკურორი იმ სტატიებსაც შეეხო, რომელიც 2004 წელს გამოვაქვეყნეთ და რომელშიც საუბარია, როგორ ითხოვდა პროკურატურა წყაროების დასახელებას ჟურნალისტებისგან.
_ 2004 წელს სხვა კანონი იყო. მაშინ დამამძიმებელ გარემოებად ითვლებოდა მასობრივი ინფორმაციის საშუალებებში ინფორმაციის გამოქვეყნება და სულ სხვა პროცესი იყო. დღევანდელი საზომიდან უყურებთ. მაშინ ასეთი კანონი იყო. 2004 წლის მონაცემებს დღევანდელი პოზიციიდან ნუ შევაფასებთ.
დოლიძე ამბობს, რომ პროტოკოლური წესის მიმდევარი ადამიანია და მაშინაც კი, როდესაც თანამშრომელს ღილი ცუდად ჰქონდა შეკრული, შენიშვნას აძლევდა:
_ გამორიცხულია, ჩემთან კაბინეტში მოსულს მაგიდაზე, როგორც თქვენ ამტკიცებთ, ფეხებშემოწყობილი დაგხვედროდით.
_ თუ ასე არ იყო და 2004 წელს ცრუ ინფორმაცია გავავრცელეთ, რატომ მაშინვე არ გამოგვეხმაურეთ?
_ იმას რომ იტყვი, ია დოლიძე მერაბიშვილის და ადეიშვილის დავალებებს ასრულებდაო, ეს სასაცილოა. საზოგადოებამ ძალიან კარგად იცის, მე რაზე ვიყავი დაკავებული _ დამაკავეს 2007 წლის ნოემბრის მოვლენებთან დაკავშირებით. ეს იყო პოლიტიკური სტატუსი და ეს დასამალი არაა. რასთან დაკავშირებით ვიყავი დაკავებული, ძალიან კარგად იციან იქ, სადაც საჭიროა. ეს შეთითხნილი ბრალდება იყო და ერთი სასამართლო პროცესიც არ ჩატარებულა.
_თუ ეს ასე იყო, რატომ არ მოხდა თქვენი რეაბილიტაცია?
_ მე ხარვეზების შემსწავლელი კომისიის კანონს ველოდები. ოფიციალური ცნობა მაქვს, რომ ნასამართლევი არ ვარ.
_ იურიდიული ენით საუბრობთ, თუმცა, აღნიშნული ცნობა არ ნიშნავს, რომ ციხეში არ მჯდარხართ. მართალია, ნასამართლეობა მოხსნილი გაქვს, თუმცა, ფაქტია, რომ ციხეში ქრთამის აღებისთვის იჯექით…
_ მე სამსახურიდან არავის არ დავუკავებივარ. ჩემი სურვილით ვიყავი სამსახურიდან წამოსული. ამაზე მოკლედ ვიტყვი, რადგან იქ იციან, სადაც საჭიროა. ეს იყო პოლიტიკური მოტივი. კონკრეტული ფაქტი გვინდა ახლა(?!), რომ სამართლებრივი რეაგირება მოხდეს. მე კანონმორჩილი ადამიანი ვარ და ველოდები, როდის მოგვარდება ყველაფერი.
_ თუკი უკანონოდ დაგაკავეს, რატომ მაშინვე არ განაცხადეთ, რატომ არ იბრძოლეთ საკუთარი სიმართლის დასამტკიცებლად?
_ ეს პირადი საიდუმლოებაა. რა იცით, რომ არ მივმართე შესაბამის ორგანოებს? უბრალოდ, ამ ეტაპზე არ მიმაჩნია საჭიროდ, რომ საზოგადოებას გავაგებინო. არ მინდა, მეტი ვისაუბრო ამ თემაზე.
_ ბატონო იაკობ, ნაზი ქილიფთარის ბრალდებებზე რას იტყვით?
_ ქილიფთარის მკვლელი დაკავებულია და სასჯელსაც იხდიდა.
_ ექსპერტიზის დასკვნით სხვა რამე მტკიცდება…
_ თქვენი მოყვანილი ფაქტები 2004 წლის მონაცემებია. ეს მაშინ, როდესაც ახალმომხდარი იყო დანაშაული და რა თქმა უნდა, დაზარალებულს პრეტენზია ექნებოდა. ეს ის პერიოდია, როცა რაღაც ვერსიები ვრცელდებოდა _ ზოგი ჭორი, ზოგი სიმართლე. მერე სხვანაირად დალაგდა, საქმის გადაკვალიფიცირება მოხდა, სხვანაირი პროცესი წავიდა.
_ ეს საქმე არ გადაკვალიფიცირებულა და დედის პოზიციაც იგივეა…
_ საბოლოო კვალიფიკაცია ჩემი პროკურორობის დროს არ მომხდარა.
_ ამ საქმეზე ერთ ფაქტს გაგახსენებთ _ ეს მკვლელობა ახალი მომხდარი იყო, როდესაც პოლიციის იმჟამინდელ უფროსს, ზაზა ჩუბინიძეს დაურეკეს და მოკლულის ძმის დაკავება მოსთხოვეს. სოფელ წითელმთაში დავალებისამებრ იარაღი ჩაუდეს. მაშინ, როგორც ითქვა, ეს საქმე პროკურატურამ "გააპრავა".
_ ვერ მივიღებ მაგ ტერმინს.
_ არ გახსოვთ ეს ფაქტი?
_ ვერ მივიღებ ტერმინს, რადგან მე არავის არაფერს არ "ვუპრავებდი" _ ყველაფერს კანონიერად ვაკეთებდი. დევს ის საქმე და შეგიძლიათ ამოსწიოთ.
_ ამ საქმის ყველა დეტალი ვიცით, ბევრი გამოძება გვაქვს ჩატარებული და ამ საქმის დადასტურებული ფაქტია ისიც, რომ მალევე მოუწიათ ქილიფთარის გამოშვება…
_ კი, მე არ ვიცი. ვერ მივიღებ თქვენგან სიტყვას "გაპრავება", რადგან არავის "გამპრავებელი" არ ვყოფილვარ.
_ დაზარალებულების, ჟურნალისტების გარდა, "ახალგაზრდა იურისტთა ასოციაციაც" ძალიან ხშირად ითხოვდა თქვენგან კონკრეტულ საქმეებზე რეაგირებას…
_ ყველაფერზე პასუხი იქნება გაცემული.
_ რომელიმე რეზონანსულ საქმეზე ერთი კონკრეტული რეაგირება გახსოვთ?
_ ჩვენ ყველა განცხადებაზე ვწერდით პასუხს. შეიძლება ვინმესთვის მიუღებელი იყო, მაგრამ პასუხი არ გაგზავნილა და რეაგირება არ გაკეთებულაო, ეს გამორიცხულია
_ წერილებზე არ გეკითხებით, უშუალოდ საქმეები გვაინტერესებს. როდესაც მედიაში იწერებოდა, რომ პოლიციელები კანონს არღვევდნენ, ხშირი იყო პროცედურული დარღვევები, ადვოკატებს არ უშვებდნენ დაცვის ქვეშ მყოფებთან… ამაზე თუ ახდენდით რეაგირებას?
_ ჩატარდებოდა მოკვლევა. ზუსტად ვერ ვიხსენებ.
დოლიძის თქმით, საზოგადოების აზრი მისი საქმიანობის მიმართ, მკაცრი არასდროს ყოფილა:
_ ეს თქვენ გგონიათ ასე. ეს გამორჩეული, ერთეული შემთხვევებია. ნახეთ, რას წერდა ჩემზე ცენტრალური პრესა, რას ამბობდნენ ტელევიზიები, _ ამბობს ყოფილი პროკურორი და დასძენს, რომ "ზურგზე არაფერი ჰკიდია". მისივე თქმით, სტატიებზე რეაგირებას იმიტომ ვერ ახდენდა, რომ მას, როგორც საჯარო მოხელეს, თმენის ვალდებულება ჰქონდა.
_ ბატონო იაკობ, 2004 წელს ადამიანი აცხადებდა, რომ თქვენ ქრთამი აიღეთ მისი შვილის მკვლელების დაცვაში. რატომ არ უპასუხეთ ამ მძიმე ბრალდებას?
_ მე საჯარო მოხელე ვარ და თმენის ვალდებულება მაქვს. რამდენი გაჭირვებული დედა შემოვიდოდა და უკანონოდ მიგაწყევლიდა, რა პასუხი უნდა გამეცა?!
_ წყევლაა, როდესაც ქრთამის აღებაში ღიად გადანაშაულებენ?
_ რამდენს რამდენი რამ უთქვამს… მე პროკურორი ვიყავი და თმენის მოვალეობა მქონდა. ამ წუთშიც ასეა _ თმენის მოვალეობა მაკავებს, ამ მოვალეობით ვსაუბრობ, ამაში მე ვერკვევი. გაჭირვებულს როგორ ვედავო?! ცოდვა-მადლის მქონე ადამიანი ვიყავი და ვარ. ერთს გეტყვით _ რამდენი მაგის შვილის მკვლელობის საქმეზე ია დოლიძე ფული აქვს აღებული, შხამად შეარგოს ჩემს შვილს, თუ არა ყველა იმ ადამიანის შვილს, ვინც მე აწი ეგ დამაბრალოს.
