ოზურგეთში, სოფლის მეურნეობის მიმართულებით მთავარი პრიორიტეტი ჩაის კულტურის აღორძინება იქნება _ ამის შესახებ განცხადება ოზურგეთის მუნიციპალიტეტის ეკონომიკისა და სოფლის მეურნეობის განვითარების სამსახურის თანამშრომლებთან, ასევე, ა(ა)იპ სოფლის მეურნეობის განვითარებისა და დასაქმების ხელშემწყობი ცენტრის წარმომადგენლებთან შეხვედრისას ოზურგეთის მუნიციპალიტეტის გამგებელმა მერაბ ჭანუყვაძემ გააკეთა.
მუნიციპალიტეტის გამგებელმა მერაბ ჭანუყვაძემ აღნიშნა, რომ სოფლის მეურნეობის მიმართულებით შესაბამისი სამსახურებისგან ახალ პროექტებსა და წინადადებებს ელოდება.
_ განსაკუთრებული აქცენტი ჩაის კულტურის აღორძინებაზე უნდა გაკეთდეს. გამგეობა დაინტერესებულია ჩაის კულტურის განვითარებით და ამ კუთხით მოლაპარაკებებს აწარმოებს ინვესტორებთან. პროცესს აფერხებს ის ფაქტი, რომ ფართობები, სადაც ადრე ჩაის პლანტაციები იყო გაშენებული, ნახევრად გაველურებულია. ამჟამად, ოზურგეთის მუნიციპალიტეტში ძირითადი შემოსავალი თხილი და ციტრუსია, რომელთა ფასი სეზონზე, ხშირად არასტაბილურია. ძნელი დასადგენია, წლის რომელ პერიოდშია უმჯობესი მიღებული მოსავლის რეალიზება, რადგან მუნიციპალიტეტში თითქმის არ არსებობს სამაცივრე მეურნეობა, რისი საშუალებითაც ციტრუსის და კივის შენახვას შევძლებთ, _ აღნიშნა მერაბ ჭანუყვაძემ და დასძნა, რომ მდგომარეობიდან გამოსავალს სოფლებში ძველი და, თითქმის, გადაშენებული ჩაის კულტურის აღორძინებაში ხედავს.
