მიმდინარე წელს თურქეთის შავიზღვისპირა რეგიონებში არსებულმა ყინვამ თხილის მოსავლიანობაზე უარყოფითად იმოქმედა და მოსალოდნელი მოსავლის რაოდენობის ნახევარი მოვიდა, რის გამოც, ამ დროისათვის ქვეყანაში თხილის ფასი შარშანდელთან შედარებით დაახლოებით ორჯერ მაღალია.
თურქეთი ყოველწლიურად დაახლოებით 700 ათას ტონა თხილს აწარმოებს და ამით მსოფლიოში პირველი ადგილი უკავია. მას ამერიკა, იტალია, საქართველო და აზრბაიჯანი მოსდევს.
დაბალი ფასების გამო, ყურადღების ცენტრში ქართული თხილი მოექცა. თურქეთის შავიზღვის თხილის ასოციაციის ვიცე-პრეზიდენტის დურსუნ ოღუზ გურსოის განცხადებით, თურქული თხილის წლევანდელი მოსავლის მაღალმა ფასმა თხილის მომხმარებელი კომპანიები იძულებული გახადა ყურადღება უფრო იაფ ქართულ თხილზე გადაეტანათ, რის გამოც, თურქულ თხილზე მოთხოვნა მნიშვნელოვნად შემცირდა, ფასი კი მწვერვალს მიუახლოვდა.
ყოველწლიურად თურქეთი დიდი რაოდენობით თხილის ექსპორტს ახორციელებს მრავალ ქვეყანაში, მათ შორის, ისეთ დიდი ქვეყნებში როგორიცაა ამერიკა, ჩინეთი და რუსეთი.
გურსოის ინფორმაციით, თურქულ თხილზე მოთხოვნა ამ დროისათვის 10 ათასი ტონით შემცირდა, ათეულობით ქვეყანამ კი მაღალი ფასის გამო შესაძლოა დაახლოებით 35 ათას ტონა თხილის შესყიდვაზე უარი განაცხადოს.
მსოფლიო ბაზარზე ქართული თხილი განსაკუთრებით აგვისტოსა და სექტემბერში ლიდერობდა, რადგანაც თურქულ თხილთან შედარებით, ერთი ტონა ქართული თხილი 100 – 150 დოლარით უფრო იაფად იყიდებოდა. ამიტომაც ევროპის ყველა იმპორტიორი ქვეყნის ყურადღება ამ თვეებში საქართველოსკენ იყო მიპყრობილი. დღეისათვის კი ქართული თხილის უდიდესი ნაწილი უკვე გაყიდულია და მარაგი ძალიან მცირეა.
"თხილის ექსპორტის მეორე ტალღა ახალი წლის შემდეგ განახლდება და ამ დროისათვის ქართული თხილი თურქულს ნაკლებ კონკურენციას გაუწევს" – იმედოვნებს გურსოი და აღიარებს, რომ ქართულმა თხილმა თურქულ თხილს აგვისტო-სექტემბერში სერიოზული კონკურენცია გაუწია.
"საქართველო მსოფლიოს თხილის მწარმოებელ ქვეყნებს შორის მეოთხე ადგილს იკავებს თურქეთის, ამერიკისა და იტალიის შორის და ყოველწლიურად დაახლოებით 250 ათას ტონაზე მეტ მოსავალს იღებს. აღსანიშნავია, რომ თხილის მოსავალი და პლანტაციები საქართველოში (განსაკუთრებით დასავლეთ რეგინებში) ყოველწლიურად მატულობს."
გამოყენებულია თურქული ონლაინ გამოცემა www.haberexen.com-ის ინფორმაცია.
