დღეს, ოზურგეთის მუნიციპალიტეტის საკრებულოს რიგგარეშე სხდომა შედგა. საკრებულოს თავმჯდომარემ დამსწრე 36 დეპუტატს და მედიის წარმომადგენლებს სამ საკითხიანი დღის წესრიგი გააცნო.
პირველი და მთავარი საკითხის: "ოზურგეთის მუნიციპალიტეტის 2014 წლის ბიუჯეტის დამტკიცების შესახებ", ოზურგეთის მუნიციპალიტეტის საკრებულოს 2014 წლის 13 აგვისტოს დადგენილებაში ცვლილების შეტანის თაობაზე, _ საფინანსო განყოფილების უფროსმა გია მამაკაიშვილმა ისაუბრა. მან განმარტა, რომ 2014 წელს მომხდარი სტიქიის შედეგების სალიკვიდაციო ღონისძიებების გახორციელების მიზნით, საქართველოს მთავრობის განკარგულებით, ოზურგეთის მუნიციპალიტეტს 223 393 ლარი გამოეყო.
გია მამაკაიშვილმა, პირველი საკითხის განხილვის შემდეგ, მცირე გადახვევისთვის ბოდიში მოიხადა და ოზურგეთში გამართული სახალხო ზეიმის, "ალეგრობა-ოზურგეთობის" ტურნირის გამარჯვებულ დეპუტატს, ბონდო ღლონტს, გურიის ნარდის ფედერაციისგან სიგელი გადასცა.
დღის წესრიგის მეორე საკითხზე, _"ოზურგეთის მუნიციპალიტეტის 2014 წლის სახელმწიფო შესყიდვების გეგმის დამტკიცების შესახებ", ოზურგეთის მუნიციპალიტეტის საკრებულოს 2014 წლის განკარგულებაში ცვლილების შეტანის თაობაზე, _ ამირან გირკელიძემ ისაუბრა.
მან თქვა, რომ შესყიდვების გეგმაში, საქართველოს მთავრობის განკარგულების შესაბამისად, 223 393 ლარით შევიდა ცვლილება, რაც სექტემბრის სტიქიით გამოწვეული ზარალის სალიკვიდაციო სამუშაოების განსახორციელებლად იქნება მიმართული.
რაც შეეხება, დღის წესრიგის მესამე საკითხს, "ოზურგეთის მუნიციპალიტეტის საკრებულოს აპარატის საშტატო ნუსხის დამტკიცების შესახებ", საკრებულოს თავმჯდომარემ, დავით დარჩიამ განკარგულების დანართის რედაქციით მიხედვით გააცნო _ საკრებულოს აპარატის საშტატო ნუსხა 15 საშტატო ერთეულით განისაზღვრა.
დღის წესრიგით გათვალისწინებული სამივე საკითხი დეპუტატებმა თანმიმდევრულად და წინააღმდეგობის გარეშე დაამტკიცეს.
დავით დარჩიამ განმარტა, რომ რიგგარეშე სხდომა, რომელიც სასწრაფო წესით მოიწვიეს, მუნიციპალიტეტის გამგებლის დავალება იყო, რადგან სტიქიის შედეგების სალიკვიდაციოდ მთავრობამ სოლიდური თანხა გამოყო და დეპუტატებისთვის ამის შესახებ უნდა ეცნობებინათ.
