რუსეთ-საქართველოს შორის დიპლომატიური ურთიერთობები, წლებია გაწყვეტილია. თუმცა 2008 წლიდან, ქვეყნებს შორის მოლაპარაკებები ჟენევის ფორმატით მიმდინარეობს.
ასევე, საქართველოს რუსეთთან ურთიერთობის საკითხებში, 2012 წლიდან სპეციალური წარმომადგენელიც ჰყავს.
თუმცა, ქართველი ექსპერტები და პოლიტიკოსები ამბობენ, რომ ჟენევის ფორმატის მოლაპარაკებები, ასევე საქართველოს მხრიდან რუსეთთან ურთიერთობების საკითხებში სპეციალური წარმომადგენლის დანიშვნა, უშედეგოა.
უნდა აღსდგეს თუ არა რუსეთ-საქართველოს შორის დიპლომატიური ურთიერთობები, რა გზაა მანამ გასავლელი და რა კომპრომისებზე მოუწევს ქვეყანას წასვლა?
"გლობალური კვლევების ცენტრის" ხელმძღვანელის, ნანა დევდარიანის თქმით, ამ ეტაპზე რთულია დიპლომატიური ურთიერთობების აღდგენაზე საუბარი, რადგან აუცილებელი პირობაა, ამას წინ მოლაპარაკებები უძღოდეს.
"დიპლომატიური ურთიერთობების აღდგენა, ხანგრძლივი მოლაპარაკებების შედეგი შეიძლება იყოს. იმ ფონზე კი, როცა ჩვენი გადამდგარი და გადაყენებული მინისტრები ამბობენ, რომ პრორუსული ძალები ძლიერდება, ეს მოლაპარაკებების პროცესზე და სახელმწიფოთაშორის ურთიერთობებზე პირდაპირ გავლენას ახდენს.
ეს არაა უბრალოდ გადადგომის გამართლება. ამას სერიოზული დატვირთვა აქვს. ძალიან სამწუხაროა, რომ ჩვენი ყოფილი მინისტრები ამას ვერ აცნობიერებენ", _ უთხრა "გურია ნიუსს" დევდარიანმა.
ქვეყნებს შორის ურთიერთობების აღდგენისთვის, რომ დიალოგის რეჟიმია აუცილებელი, ამ პოზიციას იზიარებს "დემოკრატიული მოძრაობის" ერთ-ერთი ლიდერი გია კობახიძეც.
"როცა რუსეთ-საქართველოს ურთიერთობების მოწესრიგებაზე ვსაუბრობთ, პირველ რიგში დიალოგის რეჟიმის ფორმატს ვგულისხმობთ, რა თქმა უნდა, ეს ჩვენი საგარეო პოლიტიკის ერთ-ერთი მიმართულებაა.
საგარეო პოლიტიკა ძალიან ფართო გაგების მცნებაა და ის სხვადასხვა მიმართულებებს მოიცავს. ესაა როგორც დასავლეთის სახელმწიფოებთან ურთიერთობა, ასევე რეგიონული პოლიტიკის სწორად წარმართვა. აქ მარტო კავკასიის სახელმწიფოები არ იგულისხმება. იგულისხმება მოლდოვა და უკრაინაც. აგრეთვე, ჩრდილო კავკასიის სახელმწიფოებიც. ასევე, აფხაზებთან და ოსებთან პირდაპირი დიალოგის რეჟიმი.
ეს ყველაფერი "გამორჩა" ჩვენს საგარეო ურთიერთობებზე პასუხისმგებელ უწყებებს. ისინი ერთი მიმართულებით მუშაობენ – დასავლეთთან ურთიერთობა და ეს შრომაც წყალში გადაყრილია, რადგან ყველაფერი ერთად უნდა ემსახურებოდეს საქართველოს ძლიერებას.
ჩვენი ქვეყნის მთავარი პრობლემა ისაა, რომ ტერიტორიების 20% ოკუპირებულია. ამიტომ, ჩვენ გვაქვს ორი გზა – ახალი ომი, რისი საშუალება, შესაძლებლობა და წარმატების მიღწევის შანსი არ არსებობს და მეორე – დიალოგი. ამიტომ, არჩევანიც არ გვაქვს. ავტომატურად ლოგიკა, გონიერება ამისკენ გვიბიძგებს.
ამიტომ, ჩვენი საგარეო პოლიტიკის პრიორიტეტი, რუსეთთან ურთიერთობების დალაგება, დიალოგი, რა თქმა უნდა, უნდა იყოს.
თუმცა, აქვე უნდა გავითვალისწინოთ, ორ ქვეყანას შორის ურთიერთობების დალაგებას წინ უნდა უძღოდეს რუსეთის მხრიდან რაიმე ფორმით იმის თქმა, რომ აფხაზეთის ცალკე სახელმწიფოდ გამოცხადება, არ იყო სწორი ნაბიჯი", _ ამბობს "გურია ნიუსთან" საუბრისას კობახიძე.
პოლიტოლოგ კორნელი კაკაჩიას აზრით კი, დიპლომატიური ურთიერთობები ამ ორ ქვეყანას შორის ვერაფრით ვერ აღდგება, როცა ქვეყნის 20% მეორე სახელმწიფოს მიერაა ოკუპირებული და ისინი სუვერენულ სახელმწიფოებად არიან გამოცხადებული.
"ამ პერიოდში საბაბს ვერ ვხედავ დიპლომატიური ურთიერთობების აღსადგენად ლაპარაკი დაიწყოს. თუ ქართველი ხალხი ამ მდგომარეობას შეეგუა, სხვა ამბავია, მაგრამ როგორც ვხედავთ, არც პოლიტიკურ ელიტაში და არც საზოგადოებაში, ამას არ ეგუებიან, დიპლომატიური ურთიერთობების აღდგენის ვერავითარ პერსპექტივას ვერ ვხედავ.
რომც აღდგეს, რის საფუძველზე უნდა მოხდეს ეს? ანუ ჩვენ უნდა ვაღიაროთ არსებული რეალობა? გასათვალისწინებელია ისიც, თუ რას გვაძლევს ეს დიპლომატიური ურთიერთობა. მარტო იმას რომ რუსეთის ელჩი გვყავდეს? თანაც, რაც დასათმობი იყო, ქართულმა მხარემ უკვე დათმო. მეტი რაღა უნდა გავაკეთოთ? იმდენად პრობლემური საკითხია, რომ ამის განხილვა არც ღირს", _ უთხრა "გურია ნიუსს" კაკაჩიამ.
