ქალაქ ოზურგეთის მერმა ბეგლარ სიორიძემ ახალგაზრდა პედაგოგთა კავშირის ბაზაზე არსებული ლიდერთა სკოლის მოსწავლეების შეკითხვებს უპასუხა.
"პირველყოვლისა, მოგესალმებით, სიამოვნებით ვიხსენებ ჩვენ პირველ შეხვედრას წინასაარჩევნო კამპანიის დროს, მიხარია, რომ დღეს ისევ შევხვდით, მოგისმენთ გულისყურით და გულწრფელად გიპასუხებთ ყველა შეკითხვაზე".
მოსწავლეთა კითხვები ძირითადად ქალაქის ინფრასტრუქტურას, მის კეთილმოწყობას, იერსახის, ტროტუარების, ქუჩების, პანდუსების მოწესრიგებას შეეხებოდა, ასევე, აქტუალური გახლდათ წყალმომარაგებისა და გარევაჭრობის თემა.
დიდი დრო არ არის გასული, რაც თვითმართველ ქალაქად ჩამოყალიბდა ოზურგეთი, რაც მერად ამირჩიეს, სულ რაღაც სამი თვე. ჩვენ ყველანი ერთად, ქალაქის მერიის სრული შემადგენლობა, ინტენსიურად ვმუშაობთ. საქმე ბევრია, იმიტომ, რომ ბევრია გასაკეთებელი.
ტროტუარი იქნება, თუ სხვა დანარჩენი, საჭიროა თანხა. ინფრასტრუქტურის კუთხით, ერთი თეთრიც არ დაგვხვედრია, მიუხედავად ამისა, გამოიძებნება საშუალებები. სერიოზული ნაბიჯები გადაიდგა დასუფთავების მხრივ, რომ სრული დატვირთვით ამუშავებულიყო აღნიშნული სამსახური, ასევე, დაიხაზა მთელი ქალაქი. ყველას მოგეხსენებათ, თუ რა მდგომარეობა გახლდათ ქალაქში წყალმომარაგების თვალსაზრისით, არ იყო, ან კიდევ დაზიანებული წყალსაცავი ნაგებობები, ონკანში ჭუჭყიანი წყალი მოდიოდა. მუნიციპალური განვითარების ფონდმა გამოგვიყო თანხა და დაახლოებით ორი კვირაა, რაც დავიწყეთ, ამ კუთხით, აქტიური სამუშაოები.
აქვე გეტყვით, რომ უნდა გაჭრილიყო გზის ცენტრალური ნაწილი, რათა ჩადებულიყო წყლი მილები, რომლის დასრულებისთანავეც მოხდებოდა გზის საფარის აღდგენა, გავმართეთ მოლაპარაკება, რის შედეგადაც, სამუშაოები ტროტუარზე გადმოვიტანეთ და ასფალტის აღდგენის ნაცვლად, ვსთხოვეთ ტროტუარის მოპირკეთება – მოწესრიგება. რაც შეეხება პანდუსის თემას, გპირდებით, რომ არცერთი პროექტი არ დამტკიცდება მისი გათვალისწინების გარეშე, რომ ამ ადამიანებს ჰქონდეთ დაუბრკოლებლად გადაადგილების საშუალება. ქუჩის ვაჭრობა, ძალიან რთული და მნიშვნელოვანი თემაა. გახსოვთ, ალბათ, ბაზრისა და უნივერმაღის წინ მდგარი მოვაჭრეები, ჩვენ გამოვუყავით ამ ადამიანებს ადგილი ავტოსადგურის მიმდებარე ტერიტორიაზე. რომ ავკრძალავთ, უნდა ვიზრუნოთ იმაზე, შევთავაზოთ სხვა ალტერნატივა, ულუკმაპუროდ ვერ დავტოვებთ. ეს საკითხი არის ყოველდღიური სამუშაო გეგმა, პროცესი, რომელსაც ზედამხედველობის სამსახური აწესრიგებს.
ჩემი მიზანია, ქალაქს ჰქონდეს ლამაზი სახე – მოწესრიგებული და გამწვანებული იყოს სკვერები, შენობების ფასადი. შენობები, რომელიც პირადსაკუთრებაშია, უნდა გამოიყურებოდეს ისე, რომ არ ამახინჯებდეს ქალაქის საერთო იერს, წინააღმდეგ შემთხვევაში, დაწესდება გარკვეული სანქციები.
მოსწავლეებმა განსაკუთრებით გაამახვილეს ყურადღება სკოლებში სასმელი წყლის ვარგისიანობასთან დაკავშირებით, თუ რამდენად ევალება მერს ჩაერთოს წყლის ხარისხის შემოწმებაში.
ვთვლი, რომ აღნიშნული საკითხი უნდა აკონტროლოს ჯანდაცვისა და განათლების სამინისტრომ, თუმცა, ჩვენ, ქალაქის მერია, სკოლებშიც და ბაღებშიც გავაკეთებთ სასმელი წყლის ლაბორატორიულ კვლევას და ეს იქნება ჩვენი კეთილი ნება" – განაცხადა ბეგლარ სიორიძემ.
დამშვიდობებისას, ქალაქის მერმა კიდევ ერთხელ გადაუხადა მადლობა ლიდერთა სკოლის მოსწავლეებს: "ნებისმიერ დროს მზად ვარ თქვენთან სასაუბროდ, ერთად ვიფიქროთ, ერთად ჩავინიშნოთ, რა იქნება უკეთესი ჩვენი ქალაქისათვის".
(R)
