საქართველოს მთავრობის ხელშეწყობით, სოფლის მეურნეობის სამინისტრომ და სოფლის მეურნეობის პროექტების მართვის სააგენტომ სამრეწველო გადამუშავებისთვის განკუთვნილი მანდარინის რეალიზაციის ხელშემწყობი ღონისძიება დაიწყო.
სოფლის მეურნეობის სამინისტროსა და სოფლის მეურნეობის პროექტების მართვის სააგენტოს ინიციატივით, საწარმოებში სამრეწველო გადამუშავებისთვის განკუთვნილი მანდარინის ორგანიზებულად ჩაბარების მიზნით, ბათუმში საკოორდინაციო შტაბიც ამოქმედდა.
რაც შეეხება სამრეწველო გადამუშავებისთვის განკუთვნილი მანდარინის შესყიდვას ამ დროისთვის ორი საწარმო _ შპს "GIAM group” და შპს "TCF Georgia” ახორციელებს, რომლებმაც ციტრუსის მიღება უკვე დაიწყეს და ყოველდღიურ რეჟიმში აგრძელებენ მუშაობას. კიდევ ერთი საწარმო _ სააქციო საზოგადოება "ქობულეთის ჩაი" კი, პროცესში უახლოეს პერიოდში ჩაერთვება.
აღსანიშნავია, რომ კომპანიები სამრეწველო გადამუშავებისთვის განკუთვნილი მანდარინის შესყიდვის შემთხვევაში სახელმწიფო სუბსიდიას მიიღებენ.
ასევე, მათ საშუალება ექნებათ "შეღავათიანი აგროკრედიტის პროექტის" მე-6 კომპონენტის ფარგლებში კრედიტი აიღონ, რომლის პროცენტის თანადაფინანსებას სოფლის მეურნეობის პროექტების მართვის სააგენტო განახორციელებს.
სამრეწველო მანდარინის რეალიზაციის ხელშეწყობისთვის შექმნილი საკოორდინაციო შტაბის ხელმძღვანელი ვახტანგ გენგიური "გურია ნიუსთან" საუბრისას ამბობს, რომ ამ დროისთვის ციტრუსის მიღება შეუფერხებლად მიმდინარეობს და ორივე საწარმო სრული დატვირთვით იღებს გადასამუშავებლად განკუთვნილ მანდარინს:
"სამრეწველო გადამუშავებისთვის განკუთვნილი მანდარინის მიღება 24 ნოემბრიდან დაიწყო და პროცესი შეუფერხებლად მიმდინარეობს. ამ დროისთვის, შემიძლია გითხრათ, რომ გლეხებს რიგში დგომაც კი არ უწევთ. პროცესს საპატრულო პოლიციის ეკიპაჟები აკონტროლებენ, რომ ვინმემ ურიგოდ ვერ მოახერხოს გასვლა და მანდარინის ჩაბარება. ჯერჯერობით, მანდარინის მიღების პიკური პერიოდი არ დაწყებულა, რასაც დეკემბრის შუა რიცხვებისთვის ველოდებით, თუმცა ვფიქრობთ, რომ ამ პერიოდშიც კი, რიგები, მაქსიმუმ, 24 საათის არ გასცდება.
როგორც იცით, პროცესში უკვე ჩართულია ორი კომპანია შპს "GIAM group” და შპს "TCF Georgia”, კიდევ ერთი კომპანიისგან – "ქობულეთის ჩაი" პასუხს ველოდებით და უახლოეს მომავალში ისიც დაიწყებს ციტრუსის მიღებას. 30 ნოემბრის მდგომარეობით კი, კომპანია შპს "GIAM group”-ს 1450 ტონა მანდარინი აქვს მიღებული, შპს "TCF Georgia”-ს კი 170 ტონა,", _ ამბობს გენგიური და დასძენს, რომ არანაირი ლიმიტი, თუ რამდენი ტონა მანდარინის მიღება შეუძლიათ საწარმოებს, დაწესებული არ არის.
მისივე თქმით, პროექტის ფარგლებში, კომპანიები 1 კილოგრამი სამრეწველო გადამუშავებისთვის განკუთვნილ მანდარინს არანაკლებ 0.20 ლარად შეისყიდიან.
"კომპანიები, სოფლის მეურნეობის პროექტების მართვის სააგენტოსგან 1 კგ მანდარინზე 0.10 ლარის ოდენობის სუბსიდიას მიიღებენ. გარდა ამისა, საწარმოებს შეუძლიათ, შეღავათიანი აგროკრედიტით ისარგებლონ.
რაც შეეხება მეწარმეებს, გლეხებისთვის ეს თანხა საკმაოდ მისაღებია, რადგან წინა წლებში არასტანდარტული მანდარინის ფასი საკმაოდ დაბალი იყო ", _ ამბობს გენგიური.
აღსანიშნავია, რომ მანდარინის რეალიზაციის ხელშეწყობის პროგრამის ბიუჯეტი 2 000 000 ლარს შეადგენს, თუმცა სოფლის მეურნეობის პროექტების მართვის სააგენტოში ვარაუდობენ, რომ ბიუჯეტის სრული მოცულობით გახარჯვა საჭირო არ იქნება: "საკმაოდ დიდი ბიუჯეტია, ამიტომ, ვფიქრობთ, თანხის სრულად გახარჯვის საჭიროება არ დადგება. რეგიონში ამ რაოდენობის მანდარინი საერთოდ არ არის" , _ ამბობს გენგიური.
ცნობისთვის, 23 ნოემბერს, ქობულეთში, ციტრუსის მიმღებ-გადამამუშავებელი საწარმო სოფლის მეურნეობის მინისტრმა ოთარ დანელიამ და აჭარის ავტონომიური რესპუბლიკის სოფლის მეურნეობის მინისტრმა ზაურ ფუტკარაძემ შტაბის წევრებთან ერთად მოინახულეს და სამუშაო პროცესს ადგილზე გაეცნენ.
საქართველოს სოფლის მეურნეობის მინისტრმა ციტრუსის მიმღებ-გადამამუშავებელი საწარმოს მუშაობა დადებითად შეაფასა და აღნიშნა, რომ სამრეწველო მანდარინის მიღების პროცესში კომპანიების ჩართვას განსაკუთრებული მნიშვნელობა აქვს.
აჭარის ავტონომიური რესპუბლიკის სოფლის მეურნეობის მინისტრმა ზაურ ფუტკარაძემ კი იმედი გამოთქვა, რომ წინა წლებში არსებული პრობლემა, რომელიც ციტრუსის ჩაბარებისას შექმნილ რიგებთან იყო დაკავშირებული, კომპანიების სრულყოფილად მუშაობის შემთხვევაში, წელს აღარ იქნება.
"ვფიქრობთ, რა პრობლემაც გვქონდა რიგებთან დაკავშირებით წინა წლებში, მიმდინარე წელს აღარ გვექნება, რადგან სამრეწველო მანდარინს სამი ქარხანა მიიღებს", _ აღნიშნა ფუტკარაძემ.
შეფერხების ან დამატებითი ინფორმაციის მისაღებად გლეხებს შეუძლიათ დაუკავშირდნენ სამრეწველო გადამუშავებისთვის განკუთვნილი მანდარინის რეალიზაციის ხელშემწყობ შტაბს ცხელი ხაზის ნომერზე 2 47 01 01, რომელიც 09:00 საათიდან 00:00 საათამდე მუშაობს.
აღსანიშნავია ისიც, რომ სახელმწიფო პროგრამა 2015 წლის პირველ თებერვლამდე გაგრძელდება.
(R)
