მთავრობაში საკადრო ცვლილებებია. პასუხისმგებელი პირები ერთი-მეორის მიყოლებით ტოვებენ თანამდებობებს. ცვლილებების ეტაპს "ქართული ოცნების" აღმასრულებელი მდივნის ზვიად ჯანყარაშვილის გადადგომამ დაუდო სათავე. გუშინ საღამოს თანამდებობიდან გადადგა გურიის გუბერნატორი გიორგი ჩხაიძე. დღეს გაირკვა, რომ პოსტი დატოვა შინაგან საქმეთა სამინისტროს გენერალური ინსპექციის უფროსმა გიორგი სამყურაშვილმა, ასევე რეგიონების და ადგილობრივ თვითმმართველობებთან ურთიერთობის დეპარტამენტის უფროსმა აკაკი ჩხენკელმა. რეგიონული განვითარების და ინფრასტრუქტურის სამინისტროს პრესსამსახურის უკვე ყოფილმა უფროსმა მაია სიხარულიძემ "ფეისბუქის" გვერდით გაავრცელა ინფორმაცია, რომ დავით შავლიაშვილის მოადგილესთან, ზურაბ კოპაძესთან ერთად წავიდა ინფრასტრუქტურის სამინისტროდან.
პოლიტიკური ექსპერტები ამ პროცესს ძალთა ხელახალ გადანაწილებას უწოდებენ მთავრობაში და ცვლილებების კვლავ გაგრძელებას პროგნოზირებენ.
"ეს არის პოლიტიკურ კოალიციასა და სამთავრობო გუნდში პასუხისმგებლობის და ძალთა ხელახალი გადანაწილების ერთი თვალსაჩინო პროცესი, რომელიც ჯერ არ დასრულდება. მნიშვნელოვანია, რა განცხადებას გააკეთებს პარტია "ქართული ოცნება", რადგან ეს ცვლილებები კოალიცია "ქართული ოცნების" აღმასრულებელი მდივნის ზვიად ჯანყარაშვილის წასვლის შემდეგ დაიწყო. კვლავ ვიმეორებ, რეალურად ეს არის განახლება, მაგრამ ამის მიზეზი რა შეიძლება რომ იყოს, მხოლოდ და მხოლოდ გადაწყვეტილებების მიმღებებმა შეიძლება იცოდნენ",_ ამბობს იურისტი ლევან ალაფიშვილი.
პოლიტოლოგი კორნელი კაკაჩია, ცვლილებების გამომწვევ მიზეზად, იმ ეკონომიკურ პროცესებს ასახელებს, რომელიც დღეს მიმდინარეობს საქართველოში:
"ცვლილებები გამოწვეულია ეკონომიკური პრობლემებით, რომელმაც ბოლო დროს იჩინა თავი. ვგულისხმობ, ლარის კურსის მატებას და ზოგადად, ბიუჯეტის ჩავარდნას. ის მოლოდინები, რომელიც ჰქონდა მოსახლეობას, არ გამართლდა. აქედან გამომდინარე ხელისუფლება ვალდებულია, რაიმე ღონისძიებები ჩაატაროს, მინიმუმ კოსმეტიკური. ძირეულ ცვლილებებს მთავრობა ერიდება, რომ ამან არ გამოიწვიოს პილიტიკური კრიზისი. თუმცა კი ძირეული ცვლილებებია საჭირო, უფრო ეკონომიკური გუნდიდან. ინფრასტრუქტურული პროექტები ვერ ხორციელდება, სამინისტროები თანხებს ვერ ითვისებენ, მარტო ლარის კურსის ცვლილებები არ არის მიზეზი. ზოგადად, მდგომარეობაა მძიმე ქვეყანაში",_ ამბობს კორნელი კაკაჩია.
კითხვაზე, თუ რას შედეგს მოიტანს ქვეყნისთვის აღნიშნული პროცესები, ლევან ალაფიშვილი გვპასუხობს:
"ამის შესაფასებლად ცვლილებების გამომწვევი მიზეზის დადგენაა საჭირო. მხოლოდ მექანიკური ცვლილებები რომ იყოს, არა მგონია. თუ კი ეს მიზეზი არის კონკრეტულ ჩავარდნაზე, ხარვეზზე პასუხისმგებლობა და ხელისუფლება ამ ცვლილებებით ცდილობს, სიტუაციის გამოსწორებას, ეს რა თქმა უნდა, დადებითია. თუკი ეს არის მხოლოდ მექანიკური გადაადგილება, მაგალითად, ლარის კურსის ვარდნასთან დაკავშირებით, ყურადღების გადასატანად, რაც არა მგონია ასე იყოს, მაგრამ თუ მხოლოდ და მხოლოდ მექანიკურია ეს გადაადგილება, რა თქმა უნდა, დადებითად ვერ შეფასდება", _ამბობს ალაფიშვილი.
პოლიტიკური ექსპერტები საქართველოში მიმდინარე პროცესებზე ბიძინა ივანიშვილის გავლენას არ გამორიცხავენ.
"გადაწყვეტილების მიმღები ვერანაირად ვერ იქნება ბიძინა ივანიშვილი, თუმცა ის პოლიტიკის განმსაზღვრელი ფაქტორი საქართველოში, რა თქმა უნდა, არის", _აცხადებს ალაფიშვილი.
"ივანიშვილი, დარწმუნებული ვარ, გარკვეულწილად, პირდაპირ თუ ირიბად, ჩართული იქნება ამ პროცესში. მას მაინც მიაჩნია, რომ ხალხის წინაშე მას მოუწევს პასუხის გაცემა, მისი დატოვებულია ხელისუფლების სათავეში ეს მთავრობა და გულგრილი ვერ იქნება პროცესების მიმართ", _ ამბობს კაკაჩია.
მისი თქმით, ეს ცვლილებები მაინც და მაინც დიდ შედეგებს ვერ მოიტანს. ამისთვის ძირეული ცვლილებებია საჭირო, რომ გადაიჭრას ის პრობლემები, რომელიც აწუხებს მოსახლეობას.
სამთავრობო ცვლილებების გაგრძელებას ვარაუდობს ლევან ალაფიშვილი:
" მე არ ველი, რომ პროცესი ამით დასრულდება. ეს არის მხოლოდ და მხოლოდ დასაწყისი. მომდევნო კვირა, ალბათ, ბევრ რამეზე გაგვცემს პასუხს. მათ შორის იმაზე, რა არის ამ ცვლილებების მიზეზი. რა შეიცვლება შინაარსობრივად დარჩენილი 2 წლის განმავლობაში. მოგეხსენებთ, პრაქტიკულად, მომავალი წლის ზაფხულიდან ქვეყანა გადადის ახალ რეჟიმში, რასაც არჩევნების მზადების რეჟიმი ჰქვია. 2016 წელი საარჩევნო წელია, შესაბამისად, ვთვლი, რომ ამ ყველაფერს სიცხადეს მომდევნო გადაწყვეტილებები მოჰფენს", _აღნიშნავს ალაფიშვილი.
