ქალაქ ოზურგეთის მერის ბეგლარ სიორიძის ინიციატივით, 8 ნოემბერს სახალხო დღესასწაული "ალეგრობა _ ოზურგეთობა" გაიმართა. ამავე დღეს, პირადად ბეგლარ სიორიძემ რამდენიმე ოზურგეთელს "საპატიო ოზურგეთელის" წოდება მიანიჭა. ერთერთი მათგანი "ერთიანი ნაციონალური მოძრაობის" ყოფილი წევრი, ოზურგეთის მუნიციპალიტეტის სოფელ შემოქმედის მაჟორიტარი დეპუტატი, კომპანია "გზამშენი 18"-ის ხელმძღვანელი თეიმურაზ ჯახვა იყო.
ჯახვასთვის "საპატიო ოზურგეთელის" წოდების მინიჭებას ოპოზიციური პარტიები გამოეხმაურნენ. ოპოზიციამ გაიხსენა, რომ ოფიციალური დოკუმენტების საფუძველზე, თემურ ჯახვამ "ერთიან ნაციონალურ მოძრაობას" 2010 წლის არჩევნების დროს 50 000 ლარი, ხოლო 2012 წელს 15 000 ლარი გადაურიცხა. ეს ინფორმაცია დღეს, სოციალურ ქსელებში გავრცელდა.
"ბურჯანაძე _ დემოკრატების" ოზურგეთის რაიონული ორგანიზაციის თავმჯდომარე და ქალაქ ოზურგეთის საკრებულოს დეპუტატი თამარ ნადირიძე "გურია ნიუსთან" აცხადებს რომ საპატიო წოდებას ხარისხსა და პრესტიჟულობას ანიჭებს მისი მინიჭების წესი:
"ვინაიდან ამ შემთხვევაში ბუნდოვანი და გაურკვეველი იყო პროცედურა და პრიორიტეტები, მის პრესტიჟულობაზე საუბარი ზედმეტია. უფრო მეტიც, მერიამ ძალიან უხერხულ მდგომარეობაში ჩააყენა არა მარტო საზოგადოება, არამედ თავად ის ხალხიც, ვისაც საპატიო წოდება მიენიჭათ.
"მე პირადად მიმაჩნია, რომ ხალხს უნდა სცოდნოდა, ვინ ვის აფინანსებდა ან ზოგადად ვის რა დამსახურების გამო მიენიჭა ეს წოდება. ვფიქრობ, რომ სასაცილოა, როცა "დემოკრატიის განვითარების გამო" საპატიო წოდება მიენიჭა "ნაციონალური მოძრაობის" დამფინანსებელს, თუმცა, უნდა ვთქვათ რომ "ნაციონალების" არალეგალური დამფინანსებლები დღეს ხელისუფლებაში არიან," _ ამბობს ნადირიძე.
"საქართველოს პატრიოტთა ალიანსის" გურიის კოორდინატორის და ოზურგეთის საკრებულოს დეპუტატის გოჩა ძიმისტარაშვილის თქმით, იმის თქმა, რომ ესა თუ ის პიროვნება იყო "ნაციონალი" და ამიტომ არ იმსახურებს საპატიო ოზურგეთელის წოდებას, არ შეიძლება: "თუ მას აქვს ბევრი სასიკეთო საქმე გაკეთებული, შესაძლებელია მას მიანიჭონ ეს წოდება _ ამაში საგანგაშოს ვერაფერს ვხედავ.
მაგრამ, მე ვფიქრობ, რომ ამ ადამიანს ოზურგეთელებისათვის რაიმე განსაკუთრებული არ გაუკეთებია, ამიტომ მისთვის არ უნდა მიენიჭებინათ საპატიო ოზურგეთელის წოდება. თუ მან "ნაციონალურ მოძრაობას" რაღაც თანხები გადაურიცხა, ეს იმას არ ნიშნავს, რომ მხოლოდ ამიტომ არ უნდა მიენიჭოს ეს წოდება. თუმცა, კიდევ ერთხელ ვამბობ _ ამ პიროვნებას არ ჰქონდა ასეთი დამსახურება ჩვენი ქალაქისა და მუნიციპალიტეტის წინაშე, რომ მინიჭებოდა ეს წოდება," _ ამბობს გოჩა ძიმისტარაშვილი.
ჩვენ დავუკავშირდით თემურ ჯახვას, რომელმაც გვითხრა, რომ თუ რა დამსახურებისთვის მიიღო "საპატიო ოზურგეთელის" წოდება, ამ კითხვაზე ხელისუფლებამ უნდა გაგვცეს პასუხი: "მე ჩემს თავს ხომ არ მივანიჭებდი საპატიო ოზურგეთელის წოდებას?! ეს წოდება მომანიჭა მთავრობამ. ჰკითხეთ მათ, რატომ მომანიჭეს და გიპასუხებენ," _ გვითხრა თემურ ჯახვამ.
"გურია ნიუსი" დაინტერესდა, იცოდა თუ არა ქალაქ ოზურგეთის მერმა ბეგლარ სიორიძემ იმის შესახებ, რომ თემურ ჯახვა იყო " ნაციონალური მოძრაობის" შემომწირველი, თუმცა ჩვენს მიერ დასმულმა კითხვამ მერი ძალიან გააღიზიანა და ბეგლარ სიორიძე პირად შეურაცხყოფაზე გადადა:
"გისმენთ! შენ ნორმალური ხარ, შვილო?! თუ ვერ ხარ ნორმალური? ბატონო, კი არა ბებიაშენის! თუ ხარ მეთქი ნორმალური, გეკითხები! დღეს არის შაბათი, არის 7 საათი! რას მეკითხები, ნორმალური ხარ საერთოდ? ჯახვა კი არა, ნორმალური თუ ხარ?! დეგენერატია, ტო!" _ ყვიროდა ხალხის რჩეული.
