ქალაქ ოზურგეთის მერი ბეგლარ სიორიძე ეხმიანება "გურია ნიუსის" ვებგვერდზე გამოქვეყნებულ წერილს სათაურით "ოპოზიცია "საპატიო ოზურგეთელს" "ნაციონალების" დაფინანსებას უხსენებს, ხალხის რჩეული მერი კი ჟურნალისტს ლანძღავს".
განმარტებაში, რომელიც მერმა "გურია ნიუსს" გამოუგზავნა და პოსტსკრიპტუმში უცვლელად გამოქვეყნებას მოითხოვს, ადასტურებს, რომ მან მართლაც მიაყენა შეურაცხყოფა ჟურნალისტს და უხამსი გამოთქმების მიზეზად "მეგობრის განსასვენებელთან ყოფნას" ასახელებს.
სიორიძის თქმით, მან არაერთგზის აუხსნა ჟურნალისტ ჟანა მეგრელიშვილს, რომ მძიმე წუთები ჰქონდა, მეგობრის განსასვენებელთან იდგა, მაგრამ "მისთვის გაუგებარი აღმოჩნდა ეს."
როგორც სიორიძის სიტყვებიდან ჩანს, ჩვენმა კორესპონდენტმა არაერთგზის დაურეკა მას, მაგრამ რადგან მერი "მეგობრის განსასვენებელთან" იდგა, პასუხი ვერ გასცა, მაგრამ მერე, როცა, ჟურნალისტმა "ძალიან შეაწუხა", "განსასვენებელთან" პასუხი ასეთი სიტყვებით გასცა: "გისმენთ! შენ ნორმალური ხარ, შვილო?! თუ ვერ ხარ ნორმალური? ბატონო, კი არა ბებიაშენის! თუ ხარ-მეთქი ნორმალური, გეკითხები?! დღეს არის შაბათი, არის 7 საათი! რას მეკითხები, ნორმალური ხარ საერთოდ? ჯახვა კი არა, ნორმალური თუ ხარ?! დეგენერატია, ტო!"
განსასვენებელთან ამგვარი საუბარი ნებისმიერ ადამიანთან მორალსა და ეთიკაზე კარგს რომ ვერაფერს ამბობს, ეს ცხადია, მაგრამ სიორიძე, ცივ გონებაზეც აგრძელებს ჟურნალისტის შეურაცხყოფას და "ზედმეტად მიაჩნია დაკონკრეტდეს სტატიის ავტორის ეთიკასა და მორალზე, მის დაუსაბუთებელ და ე. წ. გამოგონილ წყაროებზე დაყრდნობით დაწერილ ინფორმაციებზე, რომლითაც გამუდმებით ცდილობს მერის დისკრედიტაციას და ამისთვის ყველა სიტუაციით სარგებლობს" (სტილი დაცულია).
თავაზიანი, მით უფრო განსასვენებელთან მდგარი ადამიანი ამგვარი "მარგალიტების" _"ბებიაშენის!" , " დეგენერატია, ტო!!!" შენ ნორმალური თუ ხარ!"- ფრქვევას გარდაცვლილის ხათრით მაინც რომ უნდა მოერიდოს, ამაზე საუბარს აღარ გავაგრძელებთ, რადგან ამგვარი მეტყველება, თუნდაც ძალიან "ცხელ გულზე" ზრდილობასთან რამდენად თავსებადია, ზრდილობით და სიტყვა-პასუხით გამორჩეულმა გურიის მოსახლეობამ თავად განსაჯოს.
რაც შეეხება "გამოგონილ წყაროებს"; თუ საჯარო მოხელეს, ქალაქის მერს, რომელმაც მაგალითი უნდა მისცეს ყველა თანამოქალაქეს, ეჭვი უჩნდება, რომ მას ვინმე ცილს უსაფუძვლოდ წამებს, ჩირქს სცხებს და რეპუტაციას ულახავს, მინიმუმ, სამართლებრივი გზების არსებობის შესახებ ყურმოკრული ინფორმაცია უნდა ჰქონდეს და "ტო!-თი" და "ბებიაშენისათი!" არ უნდა აჩენდეს სამართალს!
მესამე; სანამ სტატიის ავტორის "ეთიკას", "მორალს" და პირად ცხოვრებას შეეხება, ყველა საჯარო მოხელეს მართებს, კარგად დაფიქრდეს საკუთარ მორალზე, ეთიკაზე, გარემოცვაზე, იმიჯზე, რომელიც, სამწუხაროდ, ასე უმოწყალოდ ითელება და იფლანგება არა ჟურნალისტების, არამედ თავად საჯარო მოხელეების, მათი გარემოცვის მიერ და რომელთა შესახებაც ჟურნალისტები სწორედ ადამიანური ეთიკის გამო არ წერენ!
საინტერესოა, რატომ შეეყარა სიორიძეს განდიდების მანია და რატომ ფიქრობს, რომ "გურია ნიუსი" და მისი თანამშრომლები დღე და ღამე იმაზე ფიქრობენ, როგორ მოახდინონ მისი დისკრედიტაცია. ჩვენთვის არავითარი მნიშვნელობა არ აქვს, თანამდებობაზე სიორიძე იქნება თუ სხვა ვინმე _ ჩვენთვის მთავარი მოსახლეობის ინტერესების დაცვაა და ამ საქმეში, უკაცრავად საზოგადოებასთან და, ვერავის "ბებიაშენისა" წინ ვერ გადაგვიდგება!
საპასუხო წერილში მერი ბოდიშს უხდის "ოზურგეთის საზოგადოებას" და აზრადაც არ მოსდის, სინანული მაინც გამოხატოს იმ სიტყვების გამო, რაც მან ჟურნალისტს, ქალს, თანამემამულეს, ადამიანს აკადრა და დაღუპული ადამიანის სახელით სპეკულირებს; მერი რომ ცრუობს, იქიდანაც ჩანს, რომ სიტუაციიდან მას სრულიად მარტივი გამოსავალი შეეძლო გამოენახა _ დროებით გამოერთო ტელეფონი და შემდეგ დაკავშირებოდა ჟურნალისტს. ჩანაწერში, რომელსაც აქვე გთავაზობთ, ჟურნალისტთან "სიტყვაკაზმულ" საუბარში მერი იმის გამო კი არ ბრაზობს, რომ გარდაცვლილი მეგობრის ცხედართანაა, არამედ შაბათს, თანაც საღამოს 7 საათზე გაუბედა "შეწუხება" ჟურნალისტმა! მერის სიცრუე, თითქოს მან "არაერთგზის აუხსნა ჟურნალისტ ჟანა მეგრელიშვილს, რომ მძიმე წუთები ჰქონდა, მეგობრის განსასვენებელთან იდგა", ამ ჩანაწერში კიდევ ერთხელ იკვეთება _ აქ აშკარად ჩანს, რომ ჟურნალისტი მერს იმ დღეს პირველად ელაპარაკება!
და ბოლოს; "მოქალაქე" ბეგლარ სიორიძეს განსაკუთრებული ვალდებულებები აწევს მხრებზე _ იგი დაქირავებული, არჩეული მოხელეა და ეს თავად მისი, ორ საარჩევნო ტურში ნათხოვნი გადაწყვეტილებაა. ამიტომ, მას მოსწონს თუ არა, აუცილებლად მოუხდება ჟურნალისტების კითხვებზე პასუხის გაცემა. კითხვის დასმის უფლება კი ნებისმიერ ჟურნალისტს აქვს და არა მხოლოდ იმას, თუ ვის "შეურჩევენ" ხელქვეითები!
მერის ნებისმიერი მცდელობა, თავი აარიდოს კითხვებს, ხელი შეუშალოს ჟურნალისტს, შეურაცხყოს ნებისმიერი მოქალაქე, სამართლებრივად შეფასდება.
ამასთან, ჩვენ ვიღებთ გადაწყვეტილებას, დღეიდან შევწყვიტოთ ქალაქ ოზურგეთის მერიასთან გაფორმებული ხელშეკრულება საინფორმაციო მომსახურების შესახებ, საზოგადოების სასარგებლოდ და ინტერესების დასაცავად კი, ძველებურად განვაგრძობთ როგორც მერიის, ისე ხელისუფლების ნებისმიერი ინსტიტუციის საქმიანობის მონიტორინგს. ამავე დროს, "ქართულ ოცნებას" ვურჩევთ, საკუთარ ჩინოვნიკებს ზრდილობის ელემენტარული წესები მაინც ასწავლოს, რომ მმართველი პარტიის დაღმავალი რეიტინგი კიდევ უფრო კატასტროფულად არ დაეცეს!
სიორიძის და ჟურნალისტის საუბრის ჩანაწერი, საიდანაც ჩანს, რომ "განსასვენებელთან მდგარ" მერს ჟანა მეგრელიშვილი იმ დღეს პირველად ელაპარაკება:
