ანალოგიური პრობლემა შექმნა გასულ წელს ფირმა "ტერექსმა", რომელმაც ვერ შეძლო ნაკისრი მოვალეობის შესრულება და თამარ მეფის ქუჩაზე, თითქმის ერთი წლის მანძილზე გაჭიანურებული სამუშაოების დასრულება შემდეგ სხვა ფირმას დაეკისრა. წელს კი ეს პრობლემა ქალაქის რამდენიმე ქუჩას ერთდროულად აქვს. ფირმა "ჯიადიმ" მოიგო ტენდერი, რომლის საერთო ღირებულება მილიონ ლარზე მეტი იყო, თუმცა, მან დაწყებული საქმე ბოლომდე ვერ მიიყვანა და 789 100 ლარის სამუშაოები შეუსრულებელი დატოვა.
"გურია ნიუსი" აღნიშნულ პრობლემაზე უკვე წერდა. მაშინ, მუნიციპალური შესყიდვების განყოფილების უფროსმა მაია აფხაზავამ გვითხრა, რომ მთავრობასთან მიმდინარეობს მოლაპარაკებები, თუ რა სახით უნდა დაიდოს ხელახალი ხელშეკრულება სხვა ფირმასთან, რადგან სამუშაოები წლის ბოლომდეა დასასრულებელი. ეს საკითხი საკრებულოს სხდომაზეც გაჟღერდა. მუნიციპალიტეტის გამგებელმა ზაზა ურუშაძემ განაცხადა, რომ გამარტივებული შესყიდვების წესით მოხდებოდა ხელახალი ხელშეკრულების დადება ახალ ფირმასთან, თუმცა, დღემდე არც გზები გაკეთებულა და არც სანიაღვრე არხები. მოსახლეობას ისევ ხტუნვა-ხტუნვით უწევს საკუთარ ეზოში შესვლა. შემოდგომის დოვლათი ხომ რის ვაი-ვაგლახით მიიტანეს სახლში.
აღნიშნულ საკითხთან დაკავშირებით კომენტარი ვთხოვეთ მუნიციპალიტეტის ინფრასტრუქტურისა და არქიტექტურის სამსახურის უფროსს ლევან ჩხაიძეს, რომლის თქმითაც, ამ ეტაპზე მოსამზადებელი სამუშაოები მიმდინარეობს, ტექნიკა ჩამოყვანილია და მალე სამუშაოებიც განახლდება.
მაია აფხაზავასთან საუბრის შემდეგ გაირკვა, რომ ხელშეკრულება გაფორმდა ფირმა "სამკუთხედთან", რომელსაც 788 ათას ლარამდე ღირებულების სამუშაოების ჩატარება მოუწევს. აფხაზავამ დაგვიდასტურა, რომ ლანჩხუთის ქუჩების რეაბილიტაციის სამუშაოები დღე-დღეზე განახლდება.
