ცოტა ხნის წინ, გაზეთ "გურია ნიუსში" ოზურგეთის მუნიციპალიტეტის სოფელ ჭანიეთში მცხოვრებ, კაპანაძეების ოჯახის შესახებ ვწერდით, სადაც ხუთი მცირეწლოვანი ბავშვი იზრდება.
მათ დედას, მარინა კაპანაძეს, სარეცხი მანქანის უქონლობის გამო, ხელის თითები ისე დაუზიანდა, საშიში სოკოვანი დაავადების საფრთხეც შეექმნა. ჩვენს წერილს ოპერატიულად გამოეხმაურა მოსკოვში მცხოვრები ჩვენი თანამემამულე, წარმოშობით ოზურგეთელი, ცანცო სიმონიშვილი.
ქალბატონი ცანცო, თავისი მეგობრის, ნინელი კალანდაძის მეშვეობით დაგვიკავშირდა, დაწვრილებით იკითხა, ოჯახს სარეცხი მანქანის შეძენის შემთხვევაში, წყლის მიწოდების საშუალება თუ ექნებოდა. როცა გაიგო, ოჯახს წყლის ტუმბოც არ ჰქონდა ჭიდან წყლის ამოსაქაჩად, მანქანასთან ერთად, ისიც შეუძინა.
ასევე, წყლის ნაკადის გასატარებელი რეზინის მილი, სხვადასხვა ელექტრონული ნივთი, რაც მანქანის დასამონტაჟებლად არის საჭირო, ფულადი საჩუქარი პატარებისთვის და ბევრზე ბევრი შოკოლდის კამფეტები. ცანცო სიმონიშვილის ვაჟიშვილი, ბექა სირაძე კაპანაძეების ოჯახს შინ ეწვია და ყოველივე ეს საჩუქრად გადასცა.
"რა ვქნა, რით გადავუხადო ეს პატივცემა, ღმერთი დიდია, ამ მადლს წინ დაახვედრებს. მე მინდა მისმა შვილმა, ოჯახმა მუდამ ისე გახარებული იაროს, როგორც ჩემი შვილები და მე გამახარეს ამ საახალწლოდ. ყველა ახალ წელს თქვენ გამახსენდებით, მადლიანო ქალბატონო! გაზეთს განსაკუთრებით გიმადლით. რაკი ასე დამეხმარეთ, გეხვეწებით, მადლობა მიაწვდინეთ ჩემი სახელით", _ ტირილით გვემშვიდობება ქალბატონი მარინა კაპანაძე.
"გურია ნიუსის" რედაქცია უერთდება კაპანაძეების მრავალშვილიანი ოჯახის სიხარულს, მადლობას უხდის ქალბატონ ცანცო სიმონიშვილს და დამდეგ შობა-ახალ წელს ვულოცავთ მას.
