საყდრისის დაცვის საზოგადოებრივ კომიტეტს, ბოლნისის მაჟორიტარი დეპუტატი კობა ნაყოფია აფინანსებს – ეს ბრალდება უკვე რამდენიმე კვირაა ისმის და საზოგადოების არაერთგვაროვან რეაქციას იწვევს.
"გურია ნიუსი" დეპუტატ ნაყოფიას დაუკავშირდა, რომელიც ამ ჯგუფთან კავშირს უარყოფს და ამტკიცებს, რომ ის კომპანიის ფუნქციონირებას უჭერს მხარს.
_ ბატონო კობა, რა კავშირი გაქვთ საყდრისის დაცვის საზოგადოებრივ კომიტეტთან და აფინანსებთ თუ არა მათ აქციებს?
_ ეს სრული სისულელეა. როგორ შეიძლება ამ აქციების უკან ის ადამიანი იდგეს, რომელიც პირიქით, მხარს უჭერს კომპანიის მუშაობას. ჩემი პოზიცია ამ საკითხთან დაკავშირებით დიდი ხანია ცნობილია და ახლა ვიღაცა აგორებს ამ თემას იმის გამო, რომ რაღაც საკუთარი მიზნებისთვის გამომიყენოს. ამ ადამიანებმა მთხოვეს შეხვედრა და შევხვდი მათ.
_ კონკრეტულად ვინ დაგიკავშირდათ კომიტეტიდან და რა საკითხზე ისაუბრეთ?
_ შემხვდა ერთ-ერთი ბიჭი, მგონი მამალაძეა გვარად. დამირეკა და როგორც წესი, ყველას ზარს ვპასუხობ. აინტერესებდა იმ პერიოდში, როდესაც მე ვიყავი დირექტორი როგორ ხდებოდა ეს პროცესი, ანუ ბორცვისთვის სტატუსის მინიჭებაზე იყო საუბარი. მე მას ავუხსენი და ვუთხარი რომ ჩემთვის პირველ რიგში, როგორც მაჟორიტარი დეპუტატისთვის ძალიან მნიშვნელოვანია იქ არსებული სოციალური მდგომარეობა. მაგ საწარმოზე ძალიან ბევრი ადამიანია ჩამოკიდებული, ასე რომ მე ყოველთვის ვუჭერდი მხარს იმას , რომ კომპანიას ემუშავა. ამავე დროს ვამბობდი და ეს ყველგან შეგიძლიათ ნახოთ, რომ კულტურული მემკვიდრეობის შენარჩუნება შეგვიძლია მუზეუმის სახით, არტეფაქტების გადატანით. არსებობს მსოფლიოში ასეთი პრაქტიკა და კომპანია ამისთვის მზად იყო. ეხლა რომ შეფერხდეს კომპანია და ადამიანებს პრობლემები შეექმნათ, ამის კატეგორიული წინააღმდეგი ვარ.
_ მიგაჩნიათ, რომ საყდრისის ბორცვზე სამუშაოების გაჩერებით კომპანია გაკოტრდება? როგორ შეიძლება სამი ათასი ადამიანის ბედი ერთ საბადოზე იყოს ჩამოკიდებული?
_ კომპანია შედგება ორი ნაწილისგან: სპილენძის და ოქროს წარმოება. საყდრისის ათვისების გარეშე ოქროს წარმოება მთლიანად გაჩერდება. მომავალი წელი თუ გაიტანეს, ესეც ძალიან მაგრად მეეჭვება. გაჩერდება კვარციტი, სადაც მუშაობს რვაასზე მეტი ადამიანი . დღეს ეს კომპანია საქართველოში ექსპორტის ფლაგმანია. როგორ წარმოგიდგენიათ ამ კომპანიის გაჩერება ? ცხოვრებაში არ დამიფინანსებია არანაირი აქციები და პრინციპული მიდგომა მაქვს რომ ეგეთ ადამიანებს საერთოდ არ ვაფინანსებ. მე შემიძლია დავაფინანსო საქველმოქმედო ღონისძიება, როცა ადამიანს უჭირს, შემიძლია ავადმყოფი დავაფინანსო, სპორტი დავაფინანსო, მაგრამ აქციებს არასოდეს დავაფინანსებ.
კაციშვილს არ გაუგია, რომ კობა ნაყოფია ასეთ რაღაცეებს აკეთებდეს და ახლა იქ ერთმანეთში რაღაცას დაობენ, ერთი ცდილობს მეორეს რაღაც დააბრალოს და იყენებს ჩემს სახელს. არავის მივცემ იმის უფლებას ჩემი სახელი გამოიყენოს. ეს არის ტოტალური სისულელე და ტყუილი, მინდა რომ ეს ხაზგასმით დაწეროთ.
მე არ ვიცი ვინ რას ფიქრობს, როგორ ფიქრობს, მაგრამ ჩემი გადაწყვეტილება არაერთხელ დაფიქსირებულა და ვიმეორებ კიდევ ერთხელ რომ ჩემთვის ძალიან მნიშვნელოვანია რომ კომპანიამ იმუშაოს. ცხრა წელიწადი ვიყავი იქ და ძალიან ბევრ ადამიანს ვიცნობ, ძალიან ბევრი ადამიანია ჩემი ახლობელი და არ შემიძლია, რომ ამ ადამიანების ბედზე არ ვიფიქრო. დამერწმუნეთ, რომ ოქროს საწარმო საყდრისის გარეშე გაჩერდება, სპილენძი კიდევ იმუშავებს ასეა თუ ისე და 800 ადამიანი დარჩება უმუშევარი, ამაზე მიბმულია კონტრაქტორი კომპანიებიც, საუბარია 1000 ზე მეტ მომუშავეზე და მათ ოჯახებზე.
_ RMG გოლდის იურიდიული მრჩეველი არჩილ კბილაშვილი ამბობს, რომ კომპანიისთვის ფინანსური პრობლემების შექმნაში თქვენც არანაკლები წვლილი მიგიძღვით, საუბარია საწარმოს ფულით ფილმის დაფინანსებაზე…
_ არ გავაკეთებ კომენტარს ამ საკითხზე. კომპანია ბევრ საქველმოქმედო ღონისძიებებში მონაწილეობდა და არ მინდა ამის კომენტირება. შემიძლია ვთქვა რამდენ საქველმოქმედო აქციაში მიუღია კომპანიას მონაწილეობა, მაგრამ ამის აფიშირება არასოდეს მიყვარდა და არც ეხლა ვაპირებ. რაც შეეხება თქვენს ძირითად კითხვას, რომ ვდგავარ თუ არა კომიტეტის უკან, ამაზე ამომწურავი პასუხი გაგეცით .
