ოზურგეთის მუნიციპალიტეტის გამგეობაში, ადგილობრივი თვითმმართველობის მოხელეთა შესარჩევი კონკურსი რამდენიმე დღეა მიმდინარეობს და ხვალ დასრულდება.
გასაუბრებიდან გამოსული კონკურსანტები "გურია ნიუსთან" კომენტარებს აკეთებენ.
თეა კუპრაძე: "იყო საუბარი ხედვებზე, მომავალ პერსპექტივებზე, დარგის განვითარებაზე, მოლოდინი მაქვს საუკეთესო, კმაყოფილი ვარ ".
27 წლის ვერიკო ზაქარიაძე "გურია ნიუსთან" ამბობს, რომ ქალაქ ოზურგეთის მერიაშიც იღებდა კონკურსში მონაწილეობას, თუმცა უშედეგოდ.
"ვარ აქტიური კონკურსანტი, ვმონაწილეობ სხვადასხვა სახის კონკურსებში, სადაც ვიღებ მაღალ ქულებს, ჯერ ვიყავი ქალაქ ოზურგეთის მერიაში გასაუბრებაზე, სადაც მითხრეს, რომ ძალიან კარგად მაქვს სტრატეგია შემუშავებული, რომ ვარ ძალიან კარგი და პერსპექტიული ახალგაზრდა, მაგრამ სამწუხაროდ შედეგი დასრულდა უარყოფითად.
როდემდე შეიძლება ვიყო კონკურსანტი? მაქსიმალურად ვხარჯავ ჩემს შესაძლებლობებს, მაგრამ ეს არის უშედეგო. მაინტერესებს რატომ არის საჭიროა კონურსის ჩატარება, თუ მაინც ის დაინიშნება, ვინც წინასწარ ჰყავთ განსაზღვრული?
როგორც ვიცი, კონკურსის დამთავრების შემდეგ, გასაჩივრების ვადა ორი დღეა, მაგრამ მე ვერ ვასაჩივრებ, რადგან არ მაქვს პასუხი, არ ვიცი რა შედეგი მაქვს.
მოვითხოვ გამოაქვეყნონ ყველა აპლიკანტის ქულები და გასაუბრების შედეგები, მისცენ საზოგადოებას პასუხი, ვინ და რატომ დაინიშნა კონკრეტულ თანამდებობაზე, ახლა მინდა გავასაჩივრო, მაგრამ როგორ?", _ ამბობს ვერიკო ზაქარიაძე და დასძენს, რომ კონკურსში მონაწილეობას ქალაქ ბათუმშიც იღებდა, სადაც ჟურნალისტები ესწრებოდნენ გასაუბრებას.
"ბათუმში აბსოლუტურად განსხვავებული სიტუაციაა. გასაუბრებაზე დგას დიდი მონიტორი, რითაც ყველას აქვს საშუალება, რომ მოუსმინოს კონკურსანტს, ჟურნალისტები არ არიან შეზღუდულები, ესწრებიან გასაუბრებას, გამჭვირვალეა ყველაფერი.
როგორ უნდა გავასაჩივრო, როცა არ მაქვს აუდიოჩანაწერი? აქ ისე თქვეს, რომ თითქოს ჟურნალისტები იმიტომ არ ესწრებიან, ჩვენ არ გვსურს. ეს არის აბსოლუტური ტყუილი.
ნათია ვაშალომიძე: "არც კი მომისმინეს, ფაქტიურად ძალიან დაღლილია კომისია, უკვე გვიანია, ჩემი აზრით არ შეიძლება დღეში 200 ადამიანი გამოკითხო კადრების მართვის თვალსაზრისით. შესაბამისად ჩემი შთაბეჭდილებაც არის ისეთი, რომ ვერ გაიგეს, ვერ მოისმინეს."
მამუკა ჩიჩუა: "მე მაქვს იმედი, ჩემი აზრით იყო ობიექტური კომისია, მქონდა საშუალება, რომ მესაუბრა საკუთარ თავზე, ყველაფერი ჩემი აზრით ჩატარდა კანონიერად და ობიექტურად, მქონდა რამდენიმე ადგილას შეტანილი განცხადება"
"გურია ნიუსთან" აღნიშნულ საკითხთან დაკავშირებით, კომენტარი გააკეთა ოზურგეთის მუნიციპალიტეტის გამგებელმა და საჯარო მოხელეთა მუდმივმოქმედი საკონკურსო – საატესტაციო კომისიის თავმჯდომარე მერაბ ჭანუყვაძემ.
"ძალიან ბევრ ადგილას, არის სერიოზული კონკურენცია, არის ძალიან ბევრი ღირსეული ადამიანი, კონკურენცია არის ზოგადაც, კონკურსანტები შეირჩევიან თავიანთი პროფესიული უნარჩვევების გამოვლინების მიხედვით, ყურადღება მიექცევა გულწრფელობის დონეს, ყველა იმ სამუშაოს აღწერილობის დონეს, რაზეც აქვთ პრეტენზია და რაც ყველაზე მნიშვნელოვანია, კომპეტენტურობა ადამიანის თავის საქმეში, ჩვენთან რაღაც ცვლილებები ნამდვილად განხორციელდება, თუმცა ეს კომისიის გადასაწყვეტია, მაგრამ კიდევ ერთხელ ვამბობ, რომ რეალური კონკურენციაა წამყვან სპეციალობებზე, რომელიც ფაქტიურად ხერხემალია გამგეობის, ნამდვილად განხორციელდება, თუმცა ეს საბოლოოდ კომისიის კომისიის გადასაწყვეტია. დანიშვნები ახალ წლამდე მოხდება ნამდვილად.
აბსოლუტურად ყველა იმ ადამიანის შედეგები გასაჯაროვდება, ვინც გადალახა ეტაპები და უნდა დაინიშნონ თანამდებობებზე, ეს ნამდვილად გამოქვეყნდება, ამას წინ არაფერი არ უდგას.
137 ადგილზე 309 ადამიანი ვერ დაინიშნება, ამაზე ხომ ვთანხმდებით? თუმცა ნებისმიერ აპლიკანტს მიეცემა საშუალება გაასაჩივროს კომისიის გადაწყვეტილება", _ ამბობს მერაბ ჭანუყვაძე.
