ქალაქ ოზურგეთის მუნიციპალიტეტის საკრებულოს დეპუტატები, თამარ ნადირიძე და ნათია შარაშენიძე ერთობლივ განცხადებას ავრცელებს, რომელიც "გურია ნიუსი" უცვლელად გთავაზობთ.
"26.12.2014 წელს ქალაქ ოზურგეთის საკრებულო იხილავდა ქალაქ ოზურგეთის 2015 წლის ბიუჯეტის პროექტს. სხდომის მიმდინარეობისას, როგორც ჩვენი ისე საზოგადოებრივი ინტერესიდან გამომდინარე თამარ ნადირიძემ დასვა შემდეგი შეკითხვა – წარმოდგენილი ბიუჯეტი ითვალისწინებდა თუ არა რაიმე სახის ღონისძიებების დაფინანსებას ან გააჩნდა თუ არა მერიას რაიმე გეგმა წინასაარჩევნო დაპირებების – მოსახლეობის დასაქმებისა და ბიზნესის განვითარების შესრულების მიზნით.
შეკითხვას ოზურგეთის მერის მხრიდან აშკარად არაადექვატური საქციელი მოყვა, პასუხის გაცემის ნაცვლად თავად დაიწყო შეკითხვების დასმა და პრეტენზიების გამოთქმა, რომელიც შეეხებოდა სოციალურ ქსელში თამარ ნადირიძის პირად გვერდზე გამოქვეყნებულ მოსაზრებებს. რის შემდეგაც მან გააკეთა რამდენიმე შეურაცხმყოფელი განცხადება საკრებულოს წევრის ნათია შარაშანიძის მისამართით. მერის შეურაცხმყოფელ და არაეთიკურ საქციელს ორივე შემთხვევაში აქტიურად მხარს უჭერდა მერიის თანამშრომლთა ნაწილი, რომელთა საქციელი გარდა იმისა, რომ არაეთიკური იყო აშკარად სცილდებოდა საკრებულოს სხდომაზე დამსწრე პირის უფლებებს. საქმე იქამდე მივიდა, რომ ზოგიერთმა მათგანმა საშუალება არ მისცა ნათია შარაშენიძეს პროტესტის ნიშნად დაეტოვებინა სხდომა და მისგან მოითხოვდნენ ბოლომდე მოესმინა მერის შეურაცმხყოფელი განცხადებები.
ვაცხადებთ, რომ ჩვენი – ოპოზიციონერი ქალი დეპუტატების საჯარო ლანძღვა და შეურაცხყოფა მერიის საჯარო მოხელეების თანდასწერებით მათი უშუალო მონაწილეობით ორგანიზებული და მომზადებული გახლდათ თავად ოზურგეთის მერის ბეგლარ სიორიძის მიერ, რასაც სამწუხაროდ წინააღმდეგობა ვერ გაუწია და ოპოზიციონერი ქალბატონების დაცვა ვერ შეძლო ვერც საკრებულოს თავმჯდომარემ და ვერც საკრებულოს წევრმა მამაკაცებმა, რომლებიც ძალიან ხშირად თავს იწონებენ საკრებულოში არსებული გენდერული ბალანსით.
ოზურგეთის მერის ბეგლარ სიორიძის ქმედებების შედეგად საკრებულოს სხდომა, რომელსაც უნდა განეხილა მომავალი წლის ბიუჯეტი გადაიქცა ქუჩურ გარჩევად, რა დროსაც ბეგლარ სიორიძემ შეეცადა მოეხდინა აბსოლუტური ძალაუფლების დემონსტრირება, რაც გარდა ჩვენთვის შეურაცხყოფის მიყენებისა გამოიხატა იმაში, რომ იგი ითხოვდა ჩვენი პოლიტიკური უფლებებისა და ინფორმაციის გავრცელების თავისუფლების შეზღუდვას.
ვაცხადებთ, რომ ოზურგეთში ადგილი აქვს სრულიად უპერსპექტივო მცდელობას შეიქმნას პერიფერიული მინიტოტალიტარული რეჟიმი, თავისი კარიკატურული ზეკაცითა და კარიკატურულ მაამებელთა მთელი დასტით. ნათელია, რომ ამ ამბის შემოქმედებს სრულად გააზრებული არ აქვთ მათი მოქმედებების სამომავლო შედეგები. სამწუხაროდ ნაცვლად თვითმმართველობისა ოზურგეთის მერია გადაიქცა უმოტივაციო ორგანოდ, სადაც გამჭვირვალობისა და დემოკრატიული მმართველობის ნაცვლად პერმანენტულად ადგილი აქვს ადამიანების შეურააცხყოფას, ლანძღვა-გინებას, მუშტების მაგიდაზე ცემას, ყვირილს და სკამების სროლას.
როგორც მერის ისე მერიის თანამშრომლების მხრიდან საკრებულოს სხდომაზე განხორციელებული მოქმედებები – მუქარა, პირის თავისუფლების უკანონო შეზღუდვა და საკრებულოს წევრისათვის საქმიანობაში ხელშეშლა აშკარად ატარებდა სისხლის სამართლის დანაშაულის ნიშნებს, შესაბამისად მივმართავთ:
სამართალდამცავ ორგანოებს დაუყოვნებლივ შეისწავლონ საკრებულოს სხდომაზე მომხდარი ფაქტები და განახორციელონ სისხლის სამართლის საპროცესო კანონმდებლობით გათვალისწინებული ღონისძიებები;
ორგანოს, რომელსაც ევალება მაღალი თანამდებობის პირების მოქმედებების შესწავლა და კონტროლი, განსაკუთრებული ყურადღება მიაქციონ ოზურგეთის მერისა და მასთან დაახლოებული პირების მოქმედებებს, რომელიც სერიოზულ საფრთხეს უქმნის არამარტო საზოგადოებრივ არამედ საკონსტიტუციო წესრიგსაც, ასევე მოვითხოვთ ყურადღება მიაქციონ და შეისწავლონ ამავე პირების მიერ გადაწყვეტილებების მიღებაზე უკანონო ზემოქმედების ფორმები, მასშტაბები და შედეგები;
ოზურგეთის მუნიციპალიტეტის საკრებულოს თავმჯდომარეს ბატონ გელა კობალაძეს და მოვითხოვთ საკრებულოს სხდომების მიმდინარეობისას უზრუნველყოს საზოგადოებრივი წესრიგი და კანონით დადგენილი პროცედურების დაცვა. ასევე მისგანვე მოვითხოვთ განახორციელოს ყველა საჭირო მოქმედება ჩვენი უსაფრთხოების უზრუნველყოფის მიზნით და რაც მთავარია ვითხოვთ მოგვეცეს საშუალება განვახორციელოთ ჩვენი სადეპუტატო უფლებამოსილებები;
ასევე, მივმართავთ ოზურგეთის მერიის ზედმეტად აქტიურ თანამშრომლებს კარგად გაიაზრონ, როგორც საკუთარი ისე საკრებულოს წევრის სტატუსი და უფლებამოსილება და აღარ ჩაერიონ ისეთი ფორმითა და წესით საკრებულოს სხდომების მუშაობაში, რადგანაც მათ ხალხი ხელფასს უხდის არა ბეგლარ სიორიძის მაამებლობაში, არამედ მათთვის დაკისრებული მოვალეობის შესრულებაში, რომელთა ჩამონათვალში არ შედის საკრებულოს წევრისათვის მუშაობაში ხელშეშლა.
ამასთანავე კვლავ მივმართავთ ქალაქ ოზურგეთის მერს კითხვით, რას აკეთებს იგი თავისი წინასაარჩევნო დაპირებების – ბიზნესის განვითარებისა და მოსახლეობის დასაქმების შესრულების მიზნით და მისი აზრით როდის შეუსრულებს ის ოზურგეთის მოსახლეობას ამ დაპირებებს."
