საქართველოს უზენაესი სასამართლოს თავმჯდომარის კონსტანტინე კუბლაშვილის განცხადებით, უზენაესი სასამართლოს ახალი თავმჯდომარე კორუფციისგან თავისუფალ სისტემას მიიღებს.
ამის შესახებ კონსტანტინე კუბლაშვილმა, დღეს, ათწლიანი საქმიანობის შემაჯამებელ პრესკონფერენციაზე განაცხადა.
უზენაესი სასამართლოს თავმჯდომარემ ათი წლის განმავლობაში სასამართლო სისტემაში განხორციელებულ ცვლილებებზე ისაუბრა და აღნიშნა, რომ პოლიტიკოსებს ეთანხმება სასამართლოს დამოუკიდებლობის შეფასებაში, რომ სასამართლო უფრო მეტად დამოუკიდებელი გახდა, თუმცა, მისი თქმით, გარკვეული ხარვეზები მაინც რჩება. მაგალითად კი კუბლაშვილმა მოსამართლეთა სამწლიანი გამოსაცდელი ვადის დაწესება და დასაბუთებულობის გაუმჯობესების მიმართულებითა დაასახელა.
“პოლიტიკოსები ხშირად აცხადებენ, რომ სასამართლო არის დამოუკიდებელი. მე ამ შეფასებაში მათ ვეთანხმები, თუმცა არის გარკვეული ხარვეზებიც – 5-10 პროცენტი, რომელიც არ მაძლევს საშუალებას ვთქვა, რომ სასამართლო არის სრულიად დამოუკიდებელი.
ჩემს შემცვლელს დახვდება კორუფციისგან თავისუფალი სისტემა და მან, რა თქმა უნდა, ეს უნდა გააგრძელოს. წინააღმდეგ შემთხვევაში, ის რაც გაგვიკეთებია და ნებისმიერი ცვლილება, რომელიც განგვიხორციელებია, აზრს დაკარგავს. დამოუკიდებლობის კუთხით, ვფიქრობ, რომ დღეს სასამართლო მაღალ საფეხურზეა. თუმცა, რჩება ათი, ხუთი პროცენტი ხარვეზებისა, რაც არ მაძლევს საშუალებას ვთქვა, რომ სასამართლო აბსოლუტურად დამოუკიდებელია,“– განაცხადა კუბლაშვილმა.
მისი თქმით, ათი წლის განმავლობაში კანონში განხორციელდა უამრავი ცვლილება, იუსტიციის უმაღლესი საბჭო ადმინისტრაციულ ორგანოდ გადაიქცა. ასევე ათი წლის განმავლობაში მიღებული იქნა გადაწყვეტილება, რომ მოსამართლე უვადოდ დაინიშნება.
უზენაესი სასამართლოს თავმჯდომარემ აღნიშნა, რომ ერთ-ერთი მნიშვნელოვანი, რასაც სასამართლო სისტემამ მიაღწია, არის ის, რომ გაიზარდა ბიუჯეტი და სასამართლო გახდა ამ მხრივ დამოუკიდებელი. ასევე გაიზარდა მოსამართლეთა ხელფასები და განხორციელდა მათი სიცოცხლის დაზღვევა.
კუბლაშვილის თქმით, იუსტიციის სკოლის ფარგლებში ხდება მოსამართლეთა კვალიფიკაციის ამაღლება და გადამზადება, რაც ასევე მნიშვნელოვანი მიღწევაა. მისი თქმით, შეიქმნა ახალი საპროცესო კოდექსები, რაც ასევე მნიშვნელოვანია და სასამართლო აღიჭურვა ტექნიკური ბაზით, მათ შორის, თითქმის ყველა შენობა საქართველოს მასშტაბით გარემონტდა.
კუბლაშვილმა ხაზგასმით აღნიშნა, რომ მისი უზენაესი სასამართლოს თავმჯდომარეობის პერიოდში, კიდევ ერთი მნიშვნელოვანი მიღწევა არსებობს, კერძოდ, ადმინისტრაციული და სამოქალაქო საქმეების ელექტრონული წარმოება.
კუბლაშვილმა დღეს მედიის შეკითხვებსაც უპასუხა.
რაც შეეხება მის სამომავლო გეგმებს, როგორც კუბლაშვილმა განაცხადა, მას აქვს შემოთავაზებები და სისტემიდან შორს წასვლას არ აპირებს.
„შორს არსად მივდივარ, ისევ ამ სფეროში გავაგრძელებ მოღვაწეობას. უცხოეთიდანაც მაქვს შემოთავაზებები და შემიძლია, რომ აკადემიურ წრეშიც დავრჩე, ამდენად შორს წასვლას არ ვაპირებ,“– განაცხადა კუბლაშვილმა.
კონსტანტინე კუბლაშვილს უზენაესი სასამართლოს თავმჯდომარის პოსტზე ვადა 2015 წლის 23 თებერვალს ეწურება.
