სამსახურის უფროსის წინააღმდეგ დაწყებული გამოძიების შესახებ მერიაში არაფერი იციან

ქალაქ ოზურგეთის მერიის  სამხედრო/სამაშველო სამსახურის უფროსის, ვარდენ რუსიეშვილის წინააღმდეგ აღძრული სისხლის სამართლის საქმის შესახებ (ყალბი დოკუმენტის დამზადება/გასაღება) ინფორმაციას არ ფლობენ მერიაში. ვიცემერმა ალეკო ბურჭულაძემ კითხვაზე _ ფლობთ თუ არა რუსიეშვილის წინააღმდეგ აძრული საქმის შესახებ ინფორმაციას, ვერ გვიპასუხა:

_ მაგ კითხვაზე მე ვერ გიპასუხებთ.

_  თქვენს ნაცვლად ვინ უნდა გვიპასუხოს?

_ როცა მერიასთან დაკავშირებით კითხვები გაქვთ, პრესსამსახურს მიმართეთ.

_ იმის გასაგებად, კონკრეტული ინფორმაცია იცის თუ არა ვიცე მერმა პრესსამსახურს უნდა დავუკავშირდეთ?

_ დიახ. ყველაფერი იცის პრესსამსახურმა, _ დაგვიკონკრეტა ბურჭულაძემ.

„ყველაფრის მცოდნე“ პრესსამსახურს იმის სათქმელად, იცოდა თუ არა ბურჭულაძემ რუსიეშვილის წინააღმდეგ აღძრული საქმის დეტალები და ზოგადად, ფლობენ თუ არა ამ ინფორმაციას მერიაში სამ საათზე მეტი დასჭირდა:

_ თქვენი სატელეფონო ზარის შემდეგ ჩვენ დავუკავშირდით ბატონ ვარდენ რუსიეშვილს, რომელიც  უარყოფს მსგავსი ფაქტი არსებობას. ამ თემაზე ჩვენ არ დაგვკავშირებია შესაბამისი სტრუქტურების წამრომადგენლები. ბატონი ვარდენი წლებია სამხედრო/სამაშველო სამსახურის უფროსის პოზიციაზე მუშაობს  და სამსახურში დანიშვნასთან დაკავშირებული დოკუმენტაციის წარმოდგენის დროს,  მერს ამ დოკუმენტებში შეტანის საფუძელი არ ჰქონია. თუმცა, ამ ფაქტის დადასტურების შემთხვევაში მერია იმოქმედებს სასამართლოს კანონიერ ძალაში  შესული გადაწვეტილების შესაბამისად, _ აღნიშნა ჩვენთან საუბრისას ქალაქ ოზურგეთის მერიის საზოგადოებასთან ურთიერთობის სამსახურის უფროსის  მოვალეობის შემსრულებელმა ანა მდინარაძე.

აღსანიშნავია, რომ მის წინააღმდეგ აღძრული სისხლის სამართლის საქმის შესახებ ინფორმაციას არც ვარდენ რუსიეშვილი ფლობს. ყოველშემთხვევაში ასე ამბობს „გურია ნიუსთან“ საუბრისას.

შინაგან საქმეთა სამინისტროში კი აღნიშნავენ, რომ რუსიეშვილი დაკითხვაზე რამდენჯერმე იმყოფებოდა:

_ ვარდენ რუსიეშვილის წინააღმდეგ სისხლის სამართლის საქმე 362-ე მუხლით არის აღძრული და მიმდინარეობს გამოძიება, _ დაგვიზუსტეს შსს-ს პრესსამსახურში.

რუსიეშვილს გამოძიება ყალბი დიპლომის დამზადება/გამოყენებას ედავება. როგორც გვითხრეს, გამოძიების ვერსიით, ფიზკულტურის ინსტიტუტის გაყალბებული დიპლომით რუსიეშვილი წლების განმავლობაში მუშაობდა თანამდებობაზე.

ჩვენი ინფორმაციით გამოძიების პროცესი თითქმის დასრულებულია და საქმე, რამდენიმე დღეში ოზურგეთის რაიონულ სასამართლოს გადაეცემა განსახილველად.