"ერთიანი ნაციონალური მოძრაობის" ოზურგეთის ოფისის ლიდერებმა, მიხეილ გოგოტიშვილმა და დავით მჟავანაძემ მედიის წარმომადგენლებისთვის ბრიფინგი გამართეს.
მიხეილ გოგოტიშვილის თქმით, აუდიტის ანგარიშის მიხედვით, რომელიც საკრებულოს სხდომაზე იქნა გამოტანილი, შეიძლება ითქვას, რომ "ქართული ოცნების" პირველი წელი არადამაკმაყოფილებლად შეფასდა.
მიხეილ გოგოტიშვილი: _ გვინდა უბრალოდ გამოვეხმაუროთ ოზურგეთის მუნიციპალიტეტის საკრებულოს სხდომაზე განხილულ საკითხებს, განსაკუთრებით კი აუდიტის დასკვნას, რომელიც მოიცავს "ქართული ოცნების" მმართველობის პირველ წელს ანუ 2013 წელს. ჩვენ ამაზე ხშირად ვსაუბრობთ და ახლაც ვამბობთ, რომ "ქართული ოცნებამ" ვერ გაამართლა ხალხის იმედები. აქედან გამომდინარე 2013 წელი თვითმმართველობის დონეზე შეფასდა ფაქტიურად უარყოფიდად. ჩვენ ახლა დეტალურად არ დავიწყებთ საუბარს, რადგან იქ უამრავ დარღვევაზე და დანაშაულზე არის საუბარი. დარწმუნებული ვარ, რომ არსებობს კომპენტეტური პირები, რომლებიც აღნიშნულ საკითხთან დაკავშირებით იმსჯელებენ და შესაბამის დასკვნებს გააკეთებენ.
დავით მჟავანაძე: _აუდიტის დასკვნაში ბევრ დანაშაულებრივ ნიშნებზე არის საუბარი. აუდიტის დასკვანაში კი წერია, რომ ეს არის საბოლოოდ დადებითად შეფასებული. ჩემთვის გაუგებარია რანაირად შეიძლება კანონის ფარგლებში ჯდებოდეს ეს ყველაფერი, როდესაც კონკრეტულ დანაშაულის ფაქტებზე გვაქვს საუბარი. მე ვფიქრობ ეს არის კიდევ ერთხელ ნაცრის შეყრა საზოგადოებისთვის და მოვუწოდებ შესაბამის ორგანოებს აუცილებლად დაინტერსდნენ აუდიტის დასკვნით.
"გურია ნიუსმა" ბრიფინგის დროს კითხვით მიმართა მიხელ გოგოტიშვილს.
_ ბატონო მიხეილ, დასკვანაში მხოლოდ 2013 წელზე არ არის საუბარი. მაგალითად, ოზურგეთის სასპორტო სკოლის სარემონტო სამუშაოები, რომელიც 2012 წლის 9 აგვისტოს ოზურგეთის მუნიციპალიტეტსა და შპს "ოქტან-მედეა"-ს შორის გაფორმდა გამარტივებული შესყიდვის ფორმით ხელშეკრულება ღირებულებით 220.0 ათასი ლარი. დასკვნაში წერია, რომ სარემონტო სამუშაოები თავიდან ჩასატარებელია.
_ შეიძლება ეს გარდამავალი პროექტი იყო. ჩვენ "ნაცმოძრაობის" ხელისუფლების დროს უამრავი პროექტი დავიწყეთ, რომელიც შემდეგ გააგრძელა "ქართულმა ოცნებამ". მაგალითისთვის შემიძლია მოგიყვანოთ დვაბზუ-ვაკიჯვრის გზა. ეს გზა ჩვენს დროს დაიგო ცხემლისხიდამდე და შემდეგ გაგრძელდა.
_ სპორტულ სკოლაში სარემონტო სამუშაოები თქვენი ხელისუფლების ყოფნის დროს დასრულდა თუ არა?
_ დეტალურად არ მახსოვს. აუცილებლად მოვიძიებთ ამის შესახებ ინფორმაციას და აუცილებლად მოგაწვდით. ეს ვიცი, რომ ჩვენს დროს დაიწყო სარემონტო სამუშაოები, რომლის ღირებულება იყო 220 000 ათასი ლარი. მე მინდა ვთქვა, რომ დამნაშავე უნდა იყოს დასჯილი, ეს იქნება "ნაცმოძრაობის" პერიოდში მომუშავე ადამიანი თუ "ქართული ოცნების". ჩვენ დღეს ვსაუბრობთ აუდიტის დასკვნაზე, რის შემდეგ შემიძლიათ გითხრათ, რომ "ქართული ოცნების" პირველი წელი უარყოფიდად არის შეფასებული.
