ოზურგეთის მუნიციპალიტეტის, სოფელ დვაბზუში შალვა რადიანის სახელობის ეთნოგრაფიულ მუზეუმში კალანდობის დღესასწაულისადმი მიძღვნილი თეატრალიზებული ღონისძიება შედგა.
"გურიაში კალანდას განსაკუთრებულ კერძებს ამზადებენ. ძველად, წლების წინ აუცილებლად უნდა ყოფილიყო სუფრაზე ღორის თავი, მსუქანი დედალი, ღორის ხორცი, ღვეზელი, კეცზე გამომცხვარი ხაჭაპური, მჭადი, ყველი, გოზინაყი, ხილი. ცხემლის შეშაზე მზადდებოდა კერძები. როდესაც სტუმარი მოვიდოდა, ყველა შემომსვლელი თითო ღერ ცხემლის შეშას დებდა კერიასთან. გურული ქალები განსაკუთრებული სილამაზით აკეთებდნენ ღვეზელს. ისინი სხვადასხვა დუქნებში ადრე მიდიოდნენ, რომ კარგი ხარისხის ფქვილი შეეძინათ", _ თქვა ჩვენთან საუბრის დროს შალვა რადიანის სახელობის ეთნოგრაფიული მუზეუმის ხელმძღვანელმა.
ოზურგეთის მუნიციპალიტეტის გამგებელის, მერაბ ჭანუყვაძის თქმით, ეს დღე გურულებისთვის მეტად მნიშვნელოვანია.
_"გურიაში დღეს ეგებებიან ახალ წელს, რომელსაც კალანდა ჰქვია. ყველას გილოცავთ დღევანდელ დღეს და მრავალ კალანდობას დაესწარით. ხვავი და ბარაქა არ მოგკლებოდეთ", _ გვითხრა მერაბ ჭანუყვაძემ.
კალანდობას ოზურგეში შემოქმედელი მიპტროპოლიტი, მეუფე იოსები, გურიის გუბენატორის მოვალეობის შემსრულებელი, ქეთი მოისწრაფეშვილი, საქართველოს პარლამენტის დეპუტატი ზვიად კვაჭანტირაძე და მოწვეული სტუმრები დაესწრო.
დვაბზუში ასევე იმყოფებოდა, ყოფილი პრემიერ-მინისტრის, ბიძინა ივანიშვილის ძმა, ადიკო ივანიშვილი.
"იმერელი ვარ წარმოშობით, მაგრამ გურიაში 45 წელია ვარ და შეგიძლიათ გურული დამიძახოთ. ერთს ვუსურვებ გურულებს საკალანდო ღორი და ცხელი მჭადი არ გამოლეულიყოს თქვენს ოჯახებში. გოგია უიშვილივით არ ყოფილიყოს, ერთი ღორი ჰყავდა და ისიც წაართვა ბატონმა", _ აღნიშნა ადიკო ივანიშვილმა.
