“ამ ჩამიჩი ხელისუფლების ხელში, თითო ბომბუკა თითოეული ჩვენგანისთვისაც გამოინახება”

ექსპერტი უსაფრთხოების საკითხებში, ხათუნა ლაგაზიძე, იური ვაზაგაშვილის გარდაცვალების ფაქტს, სოციალური ქსელით ეხმაურება და აღნიშნავს, რომ ქვეყანაში დესტაბილიზაციის რისკები არსებობს.

"ემოციების გარეშე: დღეს მთავარია ქვეყანა დესტაბილიზაციისგან დავაზღვიოთ. რისკი საკმარისზე ბევრია: თუ ხელისუფლებამ ეს დანაშაული-გამოწვევა ვერ გამოიძია, ეს იქნება მისი უსუსურობის დიაგნოზი, რაც ყველა ბნელ ძალას მისცეს დაუსჯელობის იმპულსს;

ხელისუფლებას არ აქვს არც ავტორიტეტი და არც გამოცდილება, რომ საზოგადოებრივი გამოსვლები შეაკავოს. ამით ისარგებლებს არა მარტო კეთილშობილური მიზნებით მოქმედი, არამედ ყველა ბნელი ძალა, ვისაც ხელისუფლებაში მოსვლის შანსი მხოლოდ დესტაბილიზაციის და ქაოტური პროცესების შემთხვევაში აქვს;

ამდენად, არსებობს დიდი ალბათობა, რომ ხელისუფლებამ "გამოსავალი" "კუდიანებზე ნადირობაში" იპოვოს ანუ აჰყვეს ყველაზე ცუდ იმპულსებს და ადამიანის უფლებების მასობრივი და უკანონო შეზღუდვები დაიწყოს, განუკითხავი დაკავებებითურთ;

ამავდროულად, ქვეყანაში არ არსებობს იმგვარი მორალური ავტორიტეტის მქონე ოპოზიცია, რომელიც ამ ბნელ ძალებს საზოგადოებრივი პროცესების მართვის სადავეებს არ დაუთმობს;

სიტუაციას კიდევ უფრო ამძიმებს საგარეო გამოწვევები: როცა აშშ-ის პირდაპირი პროტეჟე – უკრაინის ხელისუფლება – ოფიციალურ თუ არაოფიციალურ მრჩევლად ინიშნავს, თავის ტერიტორიაზე დაუფარავად ამყოფებს და თანაც ამის საერთაშორისო ტირაჟირებას ახდენს – საქართველოს ხელისუფლების და ინტერპოლის მიერ ძებნილ ადამიანს, და თანაც მას მსოფლიო დონის რეფორმატორად აღიარებს – ეს ყოველგვარი მიკიბ-მოკიბვის გარეშე ნიშნავს იმას, რომ ამერიკის დღევანდელი მმართველი ელიტა საქართველოს დღევანდელ ხელისუფლებას, რბილად რომ ვთქვათ, არ ცნობს; და ეს იმ დროს, როცა თავად უკრაინის დღევანდელ მმართველ ელიტას ყოფილი ხელისუფლების 24 წარმომადგენელი ყავს გამოცხადებული საერთაშორისო ძებნილად!

ამ პირობებში, იმის ნაცვლად რომ მხარდამჭერი საკუთარ საზოგადოებაში ეძებოს, საქართველოს ჯერ კიდევ მოქმედი ხელისუფლება საკუთარსავე საზოგადოებასთან კომუნიკაციურ ომში იმყოფება;
ამ სიტუაციით სარგებლობას ყველაზე მარტივად ვინ შეეცდება, ესეც ხომ დღესავით ნათელია.
თუ ასე გაგრძელდა, ყველა წინაპირობა იქნება იმისათვის, რომ საქართველოში უკრაინის პარალელურად მეორე ფრონტი გაიხსნას.

ამ აპოკალიფსური სცენარის ეტაპობრივი განხორციელებისგან რომ თავი დავიცვათ, ამისთვის რა ღონისძიებებია საჭირო – იფიქრეთ თქვენც და ვიფიქრებ მეც. თუ დაგვცალდა, რა თქმა უნდა: ამ ჩამიჩი ხელისუფლების ხელში თითო ბომბუკა თითოეული ჩვენგანისთვისაც გამოინახება.

და ერთი კითხვა, რომელზე პასუხის არქონაც ყველაზე მეტად არ მასვენებს: ეს ხელისუფლება ანუ ყველა ერთად: ოფიციალურიც და არაოფიციალურიც – პროცესებს ვერ მართავს თუ არ მართავს?!" _ წერს ლაგაზიძე.