"გურია ნიუსის" ინფორმაციით, სოციალური მომსახურების სააგენტოს რეგიონული საკოორდინაციო ცენტრების უფროსები დაკავებული თანამდებობიდან გაათავისუფლეს.
გუშინ, "გურია ნიუსმა" გაავრცელა ინფორმაცია, რომ სისტემაში რეორგანიზაციის გამო, სოციალური მომსახურების სააგენტოს, გურიის რეგიონული საკოორდინაციო ცენტრის უფროსი, ვასილ ხომერიკი თანამდებობას აღარ იკავებდა.
თუ რატომ მოხდა საკოორდინაციო ცენტრის უფროსების გათავისუფლება, ამ საკითხთან დაკავშირებით, სოციალური მომსახურების სააგენტოს პრესსამსახურში გვითხრეს, რომ: "ისე მოხდა, რომ ყველა რეგიონში ეს სამსახური გაუქმდა. მას შემდეგ, რაც ახალი ხელმძღვანელობა მოვიდა, მოხდა შიდა კვლევის ჩატარება, ვინ როგორ ასრულებდა დაკისრებულ ფუნქციას, რა საჭიროებები იყო და ა.შ. ამ კვლევის მიხედვით აღმოჩნდა, რომ ის რგოლი, რომელიც იყო რეგიონებში, ამ ეტაპზე ჩაითვალა ზედმეტად. ახლა უნდა შეიქმნას ახალი სტრუქტურა, რომელიც რეგიონების მთავარ ქალაქებში ამოქმედდება."
მოგვევლინებიან თუ არა ახალი სტრუქტურის უფროსებად ყოფილი უფროსები, ამ კითხვაზე პრესსამსახურში გვიპასუხეს:
"კონკრეტულ ადამიანებზე ამ ეტაპზე არაფერი არ არის გადაწყვეტილი."
სოციალურ ქსელში კი რეგიონული საკოორდინაციო ცენტრის გაუქმებას პოლიტიკურ შეფასებებს აძლევენ.
" გული მწყდება, რომ სოციალური მომსახურების სააგენტოს, არა თავისი ნებით ტოვებენ მცოდნე, გამოცდილი და ქვეყნის ერთგული ადამიანები. ისეთ სფეროში,როგორიცაა საპენსიო ადმინისტრაცია და სოციალური პროგრამების მართვა, საჯარო სამსახურების შექმნას და თავისი საქმის პროფესიონალების ერთ გუნდად გაერთიანებას, წლების განმავლობაში ასეულობით ადამიანის თავდაუზოგავი შრომა სჭირდება, დემორალიზებასა და დასუსტებას კი რამდენიმე არაკომპეტენტური ადამიანიც კი ადვილად შეძლებს მოკლე დროში. 2007 წელს გავხდი სოციალური მომსახურების სააგენტოს ხელმძღვანელი და ძალიან კარგად ვიცი, რამხელა დანაკლისია თუნდაც ერთი მცოდნე ადამიანის წასვლა ამ სისტემიდან. ყველას, ვისაც დღეს და ბოლო წლებში სამსახურიდან წასვლა აიძულეს, მინდა დიდი მადლობა გადავუხადო იმისთვის, რომ საქართველოში შექმნეს თანამედროვე, არაკორუმპირებული, ძალიან კვალიფიციური სახელმწიფო სამსახური და მინდა ვუთხრა ყველას, რომ მე ვამაყობ მათთან ერთად გატარებული წლებით და იმ საქმით, რაც ჩვენ ერთად გავაკეთეთ," – წერს სოციალურ ქსელში ჯანდაცვის ყოფილი მინისტრი, სანდრო ურუშაძე.
