პარლამენტის პლენარულ სხდომაზე "მაუწყებლობის შესახებ კანონის“ მეორე მოსმენით განხილვა ვნებათაღელვის ფონზე წარიმართა.
პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ, ზურაბ ტყემალაძემ კანონპროექტის წარდგენისას განაცხადა, რომ კანონში დაგეგმილი ცვლილებების პროექტში მაუწყებელთა მხრიდან, მათ შორის, ტელეკომპანია "რუსთავი 2“-ის მიერ გამოთქმული შენიშვნების ძირითადი ნაწილი გათვალისწინებული და ასახულია.
კერძოდ, პროექტიდან ამოღებულია ნორმა, რომელიც ითვალისწინებს კომერციული რეკლამისთვის დაწესებულ 20%-იან შეზღუდვას მაუწყებლობის ხანგრძლივობის მიხედვით. ტყემალაძის თქმით, 20%-იანი შეზღუდვა გამოყენებულ იქნება ყოველ საათში.
მისივე განმარტებით, სპონსორობის შესახებ დაწესებული ახალი დეფინიცია ძალაში 2016 წლის 15 იანვრიდან შევა; პროექტიდან ამოღებულია ნორმა, რომლის მიხედვით, ანონსებში სპონსორობაზე მითითება იკრძალება;
ნორმა, რომელიც პროგრამებსა და ანონსებში სპონსორობისას საათში 5%-იან ლიმიტს ადგენს, ძალას 2016 წლის 15 იანვარს დაკარგავს;
2017 წლის 15 იანვრიდან ახალი ამბების "ჭრა" განხორციელდება 30 წუთში ერთხელ, გარდამავალ პერიოდში კი დასაშვები იქნება სარეკლამო "ჭრა" 15 წუთში ერთხელ.
უმცირესობის წარმომადგენლებმა პროექტის ამოქმედების ვადის 2016 წლამდე გადაწევა მოითხოვეს, რადგან მიაჩნიათ, რომ ახალი რეგულაციების პირობებში ტელევიზიები ფინანსური პრობლემების წინაშე დადგებიან.
პავლე კუბლაშვილმა კანონპროექტის ცალკეულ ნორმებზე აზრთა შეჯერებისკენ მოუწოდა დეპუტატებს. მისი მოსაზრებით, კანონპროექტის მიღება ტელეკომპანიებს და ბიზნესის გარკვეულ სეგმენტს ზიანს მიაყენებს.
"ამ რეგულაციების შემოღებით ზიანი მიადგება არა მარტო ტელევიზიებს, არამედ ბიზნესის იმ წარმომადგენლებს, რომლებიც სატელევიზიო სივრცეში რეკლამის განთავსებას ახდენენ“, – განაცხადა პავლე კუბლაშვილმა.
კანონპროექტს ტელეკომპანია "რუსთავი 2“-ის წინააღმდეგ მიმართულს უწოდებს ფრაქცია "ერთიანი ნაციონალური მოძრაობის“ წევრი, აკაკი მინაშვილი.
"ჩვენ გვახსოვს რამდენიმე განცხადება არაფორმალური, მაგრამ ფაქტიური მმართველის საქართველოში, რომელიც თავს ესხმოდა "რუსთავი 2“-ს, ჩვენ გვახსოვს მის მიერ მართული პრემიერ-მინისტრის განცხადებები, რომლებიც პირდაპირ ურტყამს და ემუქრება "რუსთავი 2“-ს.
ჩვენ გუშინ ვნახეთ ბატონი ალექსანდრე ქანთარიას განცხადება, რომელიც საუბრობს, რომ თუ ასე გაგრძელდება, შეიძლება ხალხმა მოითხოვოს შევარდნა "რუსთავი 2“-ში და დალაგება სატელევიზიო მედიასივრცის.
ხალხის სახელით ტირანიის წარმოება, გახსოვთ ვისი სტილი იყო, 70 წელი ასეთ სისტემაში ვცხოვრობდით, არსებობს ინფორმაცია, რომ დაახლოებით 1 თვეში ან თვენახევარში ფსევდოსამართლებრივი მექანიზმების გამოყენებით ხელისუფლება აპირებს თავს დაესხას "რუსთავი 2“-ს და შეუზღუდოს საქმიანობა სასამართლო ზეწოლის შედეგად კონკრეტული დაშინებული ან მოსყიდული მოსამართლის შედეგად და მე მინდა მოვუწოდო საქართველოს პარლამენტის თავმჯდომარეს, საქართველოს პრეზიდენტს დაინტერესდნენ ამ საკითხით.“ _ აღნიშნა მინაშვილმა.
ოპონენტების საპასუხოდ ზურაბ ტყემალაძემ განაცხადა, რომ განხილვების პროცესში "რუსთავი 2“-ის წარმომადგენლების მიერ გამოთქმული სამი შენიშვნიდან ორი გათვალისწინებულია კანონპროექტში.
მან ასევე შეახსენა კოლეგებს, რომ ჩვენს ქვეყანას, ასოცირების ხელშეკრულებიდან გამომდინარე, ევროდირექტივები აქვს შესასრულებელი, რომლისკენაც ნაბიჯების გადადგმა ჯერ კიდევ წინა ხელისუფლების დროს 2011 წელს დაიწყო.
საპარლამენტო უმცირესობის წევრი ხათუნა გოგორიშვილი მიიჩნევს, რომ რეალური მიზეზი არ არის ევროდირექტივები.
"ბატონი ზურაბი თავის გამოსვლაში შემთხვევით არ ახსენებდა "რუსთავი 2“-ს, იმიტომ, რომ მან ძალიან კარგად იცის ეს ყველაფერი ერთი კონკრეტული ტელევიზიის წინააღმდეგ მიმართული აქციაა, უფრო სწორად აქციის ნაწილი, რადგან ფინანსური დამოუკიდებლობის და ფინანსური პრობლემების შექმნაა, ხოლო შემდეგ უკვე იქნება სხვა სახის პრობლემები. ბიძინა ივანიშვილი პირდაპირ აცხადებდა, რომ „რუსთავი 2“ არ მოსწონს, რომ უნდა შეაცვლევინოს რიტორიკა და რადგან სხვა გზით ვერ მიაღწია, გადაწყვიტა საკანონმდებლო ჩარჩოებით მოახერხოს და შემდეგ ალბათ სასამართლოსაც ჩართავენ.“ _ განაცხადა გოგორიშვილმა.
ფრაქცია "თავისუფალი დემოკრატების“ წევრი ნინო გოგუაძე მიიჩნევს, რომ „ეს არის მედიასაშუალებების წინააღმდეგ გადადგმული ნაბიჯი, რადგან მათი შემოსავალი შემცირდება.
"ამასთან ერთად, მე მინდა ვთქვა, რომ პირველად არ ხდება, როდესაც ევროპასთან ასოცირების ხელშეკრულების საფუძვლით შემოდის ისეთი რეგულაციები, რომლებიც ევრორეგულაციებით არ არის გათვალისწინებული და ადამიანთა რომელიმე ჯგუფის ან ბიზნესის წინააღმდეგაა მიმართული.
ეს არის ძალიან ცუდი, რადგან მოსახლეობას განაწყობს ევრორეგულაციების წინააღმდეგ და ხელს უწყობს ანტიდასავლური განწყობის გაღვივებას. ჩვენთვის მთავარ ღირებულებას წარმოადგენს სიტყვის თავისუფლება და დამოუკიდებელი მედია და ეს წარმოადგენს ღირებულებას ყოველთვის, როცა ხელისუფლებაში ვართ და როცა ოპოზიციაში ვართ.
ამიტომ თავისუფალი დემოკრატები ამ კანონს მხარს არ დავუჭერთ.“_ განაცხადა გოგუაძემ.
ფრაქცია "ქართული ოცნების“ თავმჯდომარის, გიორგი ვოლსკის თქმით, სიმართლეს არ შეესაბამება ოპონენტების მიერ წამოყენებული ბრალდებები, კანონპროექტში სიტყვის თავისუფლების შეზღუდვაზე და ბიზნესის ხელშეშლაზე.
მისი განცხადებით: "ძალიან საინტერესო კანონპროექტია, უამრავი რამ შესწორდა, გარკვეულ ეტაპზე მეც მივიღე მონაწილეობა და საკმაოდ საინტერესო მიმართულებები გამოიკვეთა, რომლებიც არცერთ შემთხვევაში არ შეესაბამება იმ შეფასებებს, რისი წარმოჩენაც უნდათ ჩვენს ოპონენტებს“.
გიორგი ვოლსკის განცხადებით, ოპოზიციონერი დეპუტატების მხრიდან კვლავ საზოგადოების შეცდომაში შეყვანის მცდელობას აქვს ადგილი.
აქედან გამომდინარე, მან მუხლობრივად ჩამოაყალიბა ის შეხედულებები, რაც მმართველ გუნდს გააჩნია აღნიშნულ კანონპროექტთან დაკავშირებით.
"პირველი, აუცილებლად უნდა ითქვას, რომ აქ სიტყვის თავისუფლებისა და დემოკრატიის შეზღუდვაზე, ან რაიმე ბიზნესის ხელშეშლაზე საუბარი არ ყოფილა, არც არის და მომავალშიც არ იქნება. მცდარია ის შეხედულებაც, ის აზრი რომ ეს ყველაფერი "რუსთავი 2"-თან არის დაკავშირებული.
ეს არის ჩამოყალიბებული სტრატეგიული გეგმა, რომლითაც არა მარტო ჩვენს საზოგადოებაში დისონანსის შემოტანაა საჭირო, არამედ მთავარი მიმართულება არის საერთაშორისო ორგანიზაციებში გატანა ასეთი დეზინფორმაციის, რომელიც ჩვეულებრივად ახასიათებს იმ ადამიანებს, რომლებიც ამაზე ხმამაღლა ლაპარაკობენ.
უბრალოდ გასაკვირია ის რიტორიკა, ის მანერა, გამომეტყველება რომლითაც მიკროფონთან მისული პიროვნებები საუბრობენ ისეთ საკითხებზე, რომელიც არ არსებობს რეალობაში, არ არსებობს ამ კონკრეტულ კანონპროექტთან დაკავშირებით და კიდევ ერთხელ მინდა აღვნიშნო, რომ ჩვენმა ოპონენტებმა, აქ გამომსვლელებმა გაგვისწრეს და ასით ნოლი მოიგეს მსახიობური აღელვება-აღშფოთების გამოხატვით, რომ იზღუდება მედია და დემოკრატია“, _ განაცხადა ვოლსკიმ.
ვოლსკის მოსაზრებით, წარმოდგენილ კანონპროექტში საინტერესო მიმართულებებია გამოკვეთილი. მისი თქმით, სიმართლეს არ შეესაბამება ოპონენტების მიერ წამოყენებული ბრალდებები, რადგან კანონპროექტი დემოკრატიის, სიტყვის თავისუფლების შეზღუდვას, ბიზნესის ხელშეშლას არანაირად არ ითვალისწინებს.
"მე მიმაჩნია, რომ მნიშვნელოვანია იყოს სწორი ინფორმაცია იმაზე, რა პროცესი მიმდინარეობს, საზოგადოებამ უნდა გაიგოს, რომ არაფერიც არ იზღუდება, ევროსტანდარტი გვთხოვს რეგულაცია დავაწესოთ რეკლამაზე, რომელიც კონცენტრირებული უნდა იყოს არა ტელევიზიის ხელმძღვანელობის შეხედულებით, არამედ გარკვეული პირობით, როდესაც არ ზიანდება მაყურებლის ინტერესი, ესაა მთავარი.
როდესაც ამაზე ვსაუბრობთ, ისეა წარმოდგენილი, რომ თითქოს არსებობს ერთი ტელევიზია, რომელიც გარშემორტყმულია მტრული ძალებით და ცდილობენ როგორმე შეარყიონ და ბიზნესი წაართვან.
თითქოს არ იყოს ყველაზე მდიდარი, წარმატებული და განვრცობადი და ამ ჩაგვრის პირობებში უხდებათ საცოდავებს მოღვაწეობა.
აქ ითქვა – უბედურება იყო 2012 წლის ოქტომბერშიო, სულ გაიწყვიტა შუბლზე ძარღვი ადამიანმა და თქვა, და ის ყველაფერი, რაც ხდებოდა – მედიის დატერორება, ადამიანების დატერორება, სიცოცხლის, ჯანმრთელობის ხელყოფა, ეს არაფერი არ არსებობდა და სწორედ ახლა გვაქვს ამ ვითარებასთან საქმე“, – განაცხადა გიორგი ვოლსკიმ.
მისივე განცხადებით, "მთავარი ამოცანა, რომელიც ამ კამათის დროს ჰქონდა ჩვენს ოპონენტებს და გთხოვთ ყურადღებით გაეცნოთ, ვინც დაინტერესებულია კანონპროექტით და საერთაშორისო საზოგადოების წარმომადგენლებმაც, საელჩოებმა დაინტერესება უნდა გამოიჩინონ ამ კონკრეტული საკითხის მიმართ"
_ ვინაიდან, როგორც ჩანს ამ თემაზე კიდევ არაერთხელ მოგვიწევს საუბარი. აქედან გამომდინარე ბატონ ზურაბს ვთხოვ, რამოდენიმე მთავარი თემა არა მარტო ამ ტრიბუნიდან, არამედ განცხადების სახით მომზადდეს თუ რასთანა გვაქვს საქმე, ვინ არის იმ პოზიციაზე, რომ საზოგადოებას ჰქონდეს არასწორი ინფორმაცია ამასთან დაკავშირებით, კონკრეტულად რა რიტორიკასთან გვაქვს საქმე და რეალობა რაში მდგომარეობს. ამაზე განმარტებითი ბარათი მომზადდეს არა მარტო კომიტეტში განსახილველად, რომელიც სპეციფიკურ ტერმინოლოგიას შეიცავს, არამედ საზოგადოების გასაგებადაც და უნდა გამოქვეყნდეს ტელევიზიაში და მედიაში.
კიდევ ერთი მნიშვნელოვანი საკითხი, არცერთი მედიასაშუალება არ არის არანაირი საფრთხის ქვეშ 2012 წლის შემდეგ და არც იქნება“, – განაცხადა გიორგი ვოლსკიმ.
პარლამენტარებმა, დღის ბოლოს, კანონპროექტს მეორე მოსმენით უყარეს კენჭი, რომლის დროსაც ხმები შემდეგნაირად გადანაწილდა: 63 მომხრე, 30 წინააღმდეგი.
„მაუწყებლობის შესახებ" კანონში დაგეგმილი ცვლილებები ძალაში მიმდინარე წლის 1 აპრილიდან შევა.
