ქართველი პარლამენტარები თურქეთში მინი ფეხბურთის ჩენპიონატში მონაწილეობას მიიღებენ, რის გამოც დღეს დღეს პარლამენტში პლენარული სხდომა არ ჩატარდება.
უკვე ცნობილია, რომ ერთმანეთს უნგრეთის, თურქეთის, პოლონეთისა და საქართველოს პარლამენტის წევრებისგან დაკომპლექტებული გუნდები შეხვდებიან.
პარლამენტის დეპუტატ შოთა ხაბარელი, რომელიც გუნდს ხელმძღვანელობს ამბობს, რომ ქართული მხარე 13 კაციანი დელეგაციით იქნება წარმოდგენილი.
"მე გახლავართ დელეგაციის ხელმძღვანელი. ვითამაშებთ მინი ფეხბურთს, თუმცა ცოტა მოზრდილი სტადიონია. რვა კაცით დაკომპლექტებული გადის პირველი შემადგენლობა და მასში იქნება ორი ფეხბურთელი დავით ლორთქიფანიძე და თემურ ჩხაიძე. იქნება ზურაბ ზვიადაურიც. ვფიქრობ, რომ კარგი ნაკრები გამოვა. საქართველო ამ ტურნირში პირველად იღებს მონაწილეობას. აღნიშნულ გუნდში ,,ნაციონალური მოძრაობიდან" არავინ იქნება, თუმცა შეთავაზება ჩვენ მათ გავუგზავნეთ", _ განაცხადა ხაბარელმა ჟურნალისტებთან.
"გურია ნიუსის“ მიერ მოპოვებული ინფორმაციით, დიმიტრი ხუდაძე თავდამსხმელი იქნება, თემურ ჩხაიძე – ნახევარ დაცვა, გუნდში კი მათთან ერთად პარლამენტარები დავით ლორთქიფანიძე და ზაქარია ქუცნაშვილი ითამაშებენ. გუნდი სულ 8 მოთამაშისგან შედგება,რადგან ეს მინი ფეხბურთია. შესაბამისია სტადიონიც, 60/40-ზე. გუნდს ორი მეკარე ჰყავს, ზურაბ ზვიადაური და გიორგი გოზალიშვილი, რომლებიც საქართველოს კარის დაცვაში ერთმანეთს შეენაცვლებიან.
როგორც პარლამენტის დეპუტატმა თემურ ჭკუასელმა "გურია ნიუსთან“ საუბრისას აღნიშნა, დაზუსტებით იცის, რომ ინგლისისა და თურქეთის გუნდები თამაშობს.
"მე რაც დაზუსტებით ვიცი, ინგლისის და თურქეთის საპარლამენტო გუნდები ნამდვილად თამაშობენ. მეც შემომთავაზეს, მაგრამ რომელი ფეხბურთელი მე ვარ და თან არც ასაკი მიწყობს ხელს. შევთავაზე, ისე წამოგყვებით და ინგლისთან რომ წააგებთ აბაულას ვიმღერებ-მეთქი. თუმცა, დამარწმუნეს, რომ მოიგებდნენ და დავრჩი“, _ აღნიშნა ჭკუასელმა "გურია ნიუსთან“ საუბრისას.
საპარლამენტო-საფეხბურთო დელეგაცია ოფიციალური ვიზიტით თურქეთში უკვე გაემგზავრა.
