საქართველოს მთავრობამ ამ დღეებში განიხილა მიმდინარე წელს ლანჩხუთის მუნიციპალიტეტში განსახორციელებელი სავარაუდო ინფრასტრუქტურული პროექტების ნუსხა და როგორც გამგეობის ინფრასტრუქტურისა და არქიტექტურის სამსახურის უფროსმა, ლევან ჩხაიძემ განაცხადა, ყველა ის პროექტი თავისი სავარაუდო ღირებულებით, რომელიც წარმოდგენილი იყო, მთავრობამ მოიწონა.
სავარაუდო თანხა, რომელიც წელს ლანჩხუთის მუნიციპალიტეტის ინფრასტრუქტურულ პროექტებს მოხმარდება 7 მილიონ 507 ათას ლარს შეადგენს. აქედან უმეტესი წილი სუფსა-გულიანის გზის რეაბილიტაციას მოხმარდება. ამ სამუშაოებს უშუალოდ მუნიციპალური განვითარების ფონდი განახორციელებს და 2 წელიწადში სავარაუდოდ 4 მილიონ 387 ათას ლარს დახარჯავს. დანარჩენი თანხა ქალაქსა და თხუთმეტივე ადმინისტრაციულ ერთეულზე განსახორციელებელ პროექტებზე გადანაწილდება.
პირველ ეტაპზე საქართველოს მთავრობამ საპროექტო დოკუმენტაციისა და საექსპერტო მომსახურებისთვის ლანჩხუთის მუნიციპალიტეტს 244 022 ლარი გამოუყო, რომელსაც საკრებულო უახლოეს დღეებში ასახავს ბიუჯეტში. შემდგომ მოხდება პროექტების რეალური ღირებულებების დადგენა და ამის შემდეგ უშუალოდ სამუშაოების შესრულების ჯერიც დადგება.
ინფრასტრუქტურის კუთხით წელს უშუალოდ ქალაქ ლანჩხუთის ცენტრის კეთილმოწყობისთვის დაახლოებით 723 ათასი ლარი უნდა დაიხარჯოს. ლევან ჩხაიძის თქმით, ამ თანხით იგეგმება სკვერების, ტროტუარებისა და შენობების ფასადების განახლება. ასევე მოხდება დუმბაძისა და წმინდა ნინოს ქუჩების რკინა-ბეტონის სანიაღვრე არხების კეთილმოწყობა (სავარაუდო ღირებულება-220 000 ლარი). დაახლოებით 175 ათასი ლარი მოხმარდება გორგასლის ქუჩის ერთი ნაწილის მოასფალტებას და რკინა-ბეტონის არხების მოწყობას.
ოთხ ადმინისტრაციულ ერთეულში განხორციელდება საბავშვო ბაღების რეაბილიტაცია. კერძოდ მაჩხვარეთში, ჯურუყვეთში, ღრმაღელეში სოფელ წყალწმინდაზე (სავ. ღირ. 200-200 ათასი ლარი) და აკეთში (სავ. ღირ. 156 ათასი ლარი). ამის გარდა მაჩხვარეთში და აკეთში წყლის სისტემების რეაბილიტაციაცაა დაგეგმილი, შესაბამისად 43 000 და 44 000 ლარის ოდენობის სავარაუდო ღირებულებებით.
წყლის სისტემების აღდგენა კიდევ 6 ადმინისტრაციულ ერთეულში განხორციელდება. საამისოდ, ჩიბათში, სოფელ ჭალაზე 170 ათასი ლარი, ნიგვზიანში 150 ათასი ლარი, ნიგოითში (სოფელი ჭყონაგორა) 122 ათასი ლარი, ნინოშვილში 100 ათასი ლარი, აცანაში 60 ათასი ლარი და შუხუთში 60 ათასი ლარი უნდა დაიხარჯოს.
სუფსის ცენტრის კეთილმოწყობისთვის დაგეგმილია დაახლოებით 185 ათასი ლარის სამუშაოების განხორციელება, ხოლო გრიგოლეთის საწვრთნელი ბაზის ადმინისტრაციული შენობის რეაბილიტაციისთვის- 150 ათასი ლარის. გვიმბალაურის ადმინისტრაციულ ერთეულში 42 ათასი ლარით მოხდება შიდა გზების შეკეთება, ხოლო გამგებლის მშობლიურ მამათში შიდა გზებზე მოეწყობა რკინა-ბეტონის სანიაღვრე არხები და დაიგება ასფალტის საფარი. ამ პროექტის სავარაუდო ღირებულება 120 ათასი ლარით განისაზღვრა.
