გიორგი კლდიაშვილმა საქალაქო სასამართლოში სარჩელი შეიტანა და მისი უკანონო დაკავების გამო მორალური ზიანის ანაზღაურებას მოითხოვა.
საქმეში მოპასუხეებს საქართველოს მთავარი პროკურატურა, შინაგან საქმეთა სამინისტრო და ფინანსთა სამინისტრო წარმოადგენენ.
ცნობისთვის, დეკემბრში კლდიაშვილი ორი დღის მანძილზე მოთავსებული იყო წინასწარი დაკავების იზოლატორში მასზე რეგისტრირებული ცეცხლსასროლი იარაღის დაშლილ მდგომარეობაში ხელოსნიდან სახლისკენ უნებართვოდ გადატანის გამო.
გიორგი კლდიაშვილის დაკავება წარიმართა სისხლის სამართლის საპროცესო კოდექსის არსებითი დარღვევით. აღნიშნული უფლების დარღვევის გამო მნიშვნელოვანია დადგეს იმ პირთა პასუხისმგებლობის საკითხი, რომელთა ქმედებების შედეგადაც დაირღვა გიორგის კანონიერი უფლებები და თავისუფლებები.
დღესვე, კლდიაშვილმა განცხადებით მიმართა შსს-ს და მოუწოდა:
1. ოფიციალური ვებ-გვერდის მეშვეობით უარყოს გავრცელებული არასწორი ინფორმაცია („მსურს მოგახსენოთ, რომ საქართველოს შინაგან საქმეთა სამინისტროს მიერ გავრცელებული ინფორმაცია ლახავს ჩემს პატივს, ღირსებას და საქმიან რეპუტაციას და არის არასწორი. გავრცელებული განცხადებით საზოგადოებას არ მიეწოდა სრულყოფილი ინფორმაცია, რამაც შესაძლებელი გახადა არასწორი წარმოდგენა შექმნილიყო საქმის ვითარებასთან დაკავშირებით")
2. ოფიციალური ვებ-გვერდის მეშვეობით უზრუნველყოს ინფორმაციის განთავსება კლდიაშვილის უკანონო პატიმრობიდან გათავისუფლებისა და გამართლების შესახებ.
ხვალ კლდიაშვილი განცხადებით მიმართავს პროკურატურას, მისი უფლებების დარღვევის ფაქტებზე გამოძიების დაწყების მოთხოვნით.
