შინაგან საქმეთა სამინისტროს ანტიკორუფციული სააგენტოს თანამშრომლებმა, ჩატარებული ოპერატიულ-სამძებრო და საგამოძიებო მოქმედებების შედეგად, განსაკუთებით დიდი ოდენობით ქრთამის აღების ფაქტზე, ქალაქ თბილისის მერიის ზედამხედველობის სამსახურის აპარატის უფროსი 1972 წელს დაბადებული ჯოკია ბოდოკია დააკავეს.
უწყების ინფორმაციით, თბილისის მუნიციპალიტეტის მერიის ზედამხედველობის სამსახურის აპარატის უფროსმა ჯოკია ბოდოკიამ ერთ-ერთი კერძო კომპანიის წარმომადგენელს სასტუმროს მშენებლობის ნებართვის გაცემაში დახმარებისა და მშენებლობის პროცესში მფარველობის გაწევის სანაცვლოდ ქრთამის სახით მოსთხოვა სასტუმროს მშენებლობის ღირებულების 10 % – 180 000 აშშ დოლარი, საიდანაც წინასწარ ქრთამის სახით აიღო მოთხოვნილი თანხის ნაწილი – 50 000 აშშ დოლარი.
თანამშრომლის დაკავების ფაქტს თბილისის მერი დავით ნარმანია საგანგებო ბფირინგით გამოეხმაურა. მისი თქმით, მნიშვნელოვანია, რომ აღნიშნულ საქმეზე ობიექტური ჭეშმარიტება დადგინდეს და თბილისის მერია გამოძიებას ყველანაირად ხელს შეუწყობს.
ჯოკია ბოდოკიას დაკავებას უკვე მოჰყვა გამოხმაურებები. "ნაციონალური მოძრობის" წარმომადგენლები, რომლებიც ბოდოკიას ერიის ზედამხედველობის სამსახურის აპარატის უფროსად დანიშვას დიდი ხანია აპროტესტებენ, მიიჩნევენ, რომ ბოდოკია მარტო არ მოქმედებდა:
_ თვეების წინ ვაპროტესტებდით ჯოკია ბოდოკიას თბილისის მერიაში თანამდებობაზე დანიშვნას! ვაპროტესტებდით არა იმიტომ, რომ ნარმანიას უახლოესი მეგობარი და თანასოფლელი იყო, არამედ იმიტომ, რომ 2010 წელს მძიმე დანაშაულისთვის იყო ნასამართლევი!
არა მგონია ვინმე თვლიდეს ჯოკია ბოდოკიამ 180 000 აშშ დოლარი ქრთამის სახით დამოუკიდებლად აიღო და მისი უშუალო ხელმძღვანელობა – ზედამხედველობის სამსახურის უფროსი გეგი ნიჟარაძე და მისი მოადგილე დავით მედულაშვილი საქმის კურსში არ იყვნენ!
სამწუხაროდ, ეს ხალხი საშოვარზეა მოსული! მათ არ გააჩნიათ უკეთესი ხვალინდელი თბილისის არც ხედვა და არც უნარი, _ აღნიშნა ნიკა მელიამ.
თბილისის მერიაში დანიშვნამდე ბოდოკია თბილისის ვაკის საოლქო საარჩევნო კომისიაში "ქართულ ოცნებას" წარმოადგენდა.
როგორც გაირკვა, იგი თანამდებობაზე ჯერ კიდევ 2001-2003 წლებში მუშაობდა.
2003 წელს შევსებული ქონებრივი დეკლარაციის თანახმად 2 წლის განმავლობაში ფინანსთა სამინისტროს საფინანსო სამსახურის უფროსის თანამდებობას იკავებდა.
ამავე წელს შევსებული დეკლარაციის თანახმად 175 000 ლარად შეფასებულ ბინას თბილისში, შროშის ქუჩაზე დედამისი, მანონი ბოდოკია ფლობდა. მანონი ბოდოკიას სახელზეა 350 000 ლარად შეფასებული სახლი წყნეთში; 40 000 ლარად შეფასებული სასადილო; 10 000 ლარიანი საძინებელი; 11 000 ლარიანი როიალი და 50 000 ლარად შეფასებული სხვა ნივთები, რომლებიც დეკლარაციაში დაკონკრეტებული არ არის.
როგორც ირკვევა მანონი ბოდოკია იმ პერიოდში მოსწავლე ახალგაზრდობის სახლში პედაგოგად მუშაობდა და მისი წლიური ანაზღაურება 305 ლარსა და 54 თეთრს შეადგენდა.
2003 წელს მანონი ბოდოკიას საჩუქრად 1090 ლარის ღირებულების მობილური ტელეფონი და 1760 ლარის ღირებულების ოქროს სამაჯური აქვს მიღებული.
ამავე წელს ქალბატონმა მანონიმ 11 000 ლარად ღირებული ოქროს ყელსაბამი გაასხვისა.
