რა თანხები დაიხარჯა 2013-2014 წლებში ომბუდსმენის აპარატიდან
საქართველოს სახალხო დამცველმა უჩა ნანუაშვილმა 2014 წელს ხელფასის სახით, 70 745 ლარი მიიღო, მისმა მოადგილემ, პაატა ბელთაძემ – 60 873 ლარი; თანამშრომლებმა კი, საერთო ჯამში 1 216 330,00 ლარი მიიღეს.
"გურია ნიუსმა“ სახალხო დამცველის აპარატიდან საჯარო ინფორმაცია 2013-2014 წლების ხარჯთაღრიცხვის (ხელფასების, პრემიების, მივლინებების და სატელეფონო ხარჯების შესახებ; იხ. თანდართული ფაილი) შესახებ 11 სამუშაო დღის წინ გამოითხოვა, თუმცა, ომბუდსმენის აპარატმა ინფორმაცია არასრულად, დაჯამებული სახით მოგვაწოდა.
ხელფასები და პრემიები
"გურია ნიუსისთვის“ საქართველოს სახალხო დამცველის აპარატიდან გამოგზავნილი ინფორმაციის თანახმად, საქართველოს სახალხო დამცველის ყოველთვიური ხელფასი 2013-2014 წლებში 5650 ლარს შეადგენდა, ხოლო სახალხო დამცველის მოადგილის თანამდებობრივი სარგო 4800 ლარი იყო.
აქედან გამომდინარე, საქართველოს სახალხო დამცველის, უჩა ნანუაშვილის მიერ 2013 წელს მიღებულმა თანამდებობრივმა სარგომ 67 800,00 ლარი შეადგინა. ამავე წელს კი ომბუდსმენმა პრემიის სახით 13 382,00 ლარი მიიღო.
რაც შეეხება საქართველოს სახალხო დამცველის მიერ 2014 წელს მიღებულ შემოსავალს, მისმა თანამდებობრივმა სარგომ 70745,00 ლარი შეადგინა.
საქართველოს სახალხო დამცველის მოადგილის მიერ 2013 წელს მიღებულმა თანამდებობრივმა სარგომ 57600,00 ლარი, ხოლო პრემიის ოდენობამ -13844,00 ლარი შეადგინა. 2014 წელს კი, პაატა ბელთაძემ ხელფასის სახით 60873,00 ლარი მიიღო.
ომბუდსმენის აპარატის ცნობით, 2014 წლის განმავლობაში სახალხო დამცველზე და სახალხო დამცველის მოადგილეზე პრემია არ გაცემულა.
რაც შეეხება ომბუდსმენის აპარატის თანამშრომლებზე 2013 წელს გაცემული ხელფასის ოდენობას, (თანამდებობრივი სარგო) ჯამში ამ თანხამ 1 065 588,00 ლარი შეადგინა, ხოლო პრემიების ოდენობამ – 20 5160,00 ლარი;
2014 წელს კი, ომბუდსმენის აპარატის თანამშრომლებზე ხელფასის სახით 1 216 330,00 ლარი გაიცა. პრემია კი, აპარატის არცერთ თანამშრომელს არ მიუღია.
სამივლინებო ხარჯები
რაც შეეხება სამივლინებო ხარჯებს, "გურია ნიუსისთვის“ მოწოდებული ინფორმაციის თანახმად, 2013 წელს სახალხო დამცველის მივლინებებისთვის აპარატმა 7354,70 ლარი, ხოლო 2014 წლის განმავლობაში – 7421,12 ლარი დახარჯა.
სახალხო დამცველის მოადგილის სამივლინებო ხარჯები კი ასე გამოიყურება: 2013 წელს – 2774,35 ლარი, ხოლო 2014 წლის განმავლობაში – 5780,52 ლარი.
საქართველოს სახალხო დამცველის აპარატის თანამშრომლების მიერ 2013 წელს გაწეულმა სამივლინებო ხარჯმა კი, 26 623,52 ლარი, ხოლო 2014 წელს – 32 135,78 ლარი შეადგინა.
გარდა ამისა, სახალხო დამცველის აპარატიდან სამივლინებო თანხები თანამშრომლებისთვისაც გამოიყო. 2013 წელს ამ თანხამ 26 623,52 ლარი, ხოლო 2014 წელს – 32 135,78 ლარი შეადგენდა.
სატელეფონო ხარჯები
რაც შეეხება სატელეფონო ხარჯებს, სახალხო დამცველმა 2013-2014 წლებში 26357 ლარი დახარჯა. აქედან 2013 წელს 13 621,00 ლარი, ხოლო 2014 წლის განმავლობაში -12 736,00 ლარი.
2013-2014 წლებში კი, სახალხო დამცველის მოადგილის მიერ გაწეული სატელეფონო ხარჯის ოდენობამ 5990 ლარი შეადგინა, აქედან 2013 წელს 2188,00 ლარი, ხოლო 2014 წლის განმავლობაში – 3 802,00 ლარი დაიხარჯა.
სატრანსპორტო ხარჯები
გარდა ამისა, 2013-2014 წლებში, ომბუდსმენის აპარატმა თანხები სატრანსპორტო ხარჯებისთვისაც გამოყო.
2013 წელს სახალხო დამცველის მიერ გაწეული სატრანსპორტო ხარჯის ოდენობამ 10 012,00 ლარი შეადგინა, ხოლო 2014 წლის განმავლობაში – 9 630,00 ლარი.
რაც შეეხება სახალხო დამცველის მოადგილის სატრანსპორტო ხარჯებს, ასე გამოიყურება: 2013 წელს – 10 205,00 ლარი, ხოლო 2014 წლის განმავლობაში – 10 581,00 ლარი.
საქართველოს სახალხო დამცველის აპარატის თანამშრომლების მიერ 2013 წელს გაწეულმა სატრანსპორტო ხარჯმა 37 345,00 ლარი, ხოლო 2014 წელს – 53 777,00 ლარი შეადგინა.
საქართველოს სახალხო დამცველის აპარატის მიერ გაწეულმა მთლიანმა სატელეფონო ხარჯმა 2013 წლის განმავლობაში 6 698,70 ლარი, ხოლო 2014 წლის განმავლობაში – 7 139,90 ლარი შეადგინა.
ცნობისთვის, სახალხო დამცველის აპარატის 2014 წლის დამტკიცებული ბიუჯეტი (წლიური) 2 380,00 ლარი, 2013 წელს კი, 2 100.00 ლარი იყო.
