"ხვალ თუ მოგინდა ევროკავშირზე უარი თქვა, იტყვი კიდეც. ეს არის თავისუფალი მსოფლიო. ყოველთვის უნდა ვიცოდეთ, საით მივდივართ და ავირჩიოთ. მაგრამ იქ, რუსეთთან, დაბრუნების შემთხვევაში, არჩევანი აღარ არის. ეს არის სივრცე, სადაც არანაირი არჩევანი ჩვენთვის აღარ იქნება", – ასეთია "გურია ნიუსის" რესპონდენტის პასუხი კითხვაზე – თუ საქართველო აირჩევს გზას რუსეთისკენ, ანუ რას დაკარგავს და/ან მიიღებს საქართველო რუსეთთან ალიანსით?!
"გურია ნიუსის" წამოწყება, რომელიც აღნიშნულ თემაზე მასალების სერიას ითვალისწინებს, საზოგადოებას საკითხზე პოლიტიკური თუ სამოქალაქო სექტორის წარმომადგენლების მოსაზრებებს სთავაზობს.
ამჯერად, ჩვენი რესპონდენტი საქართველოს საგარეო საქმეთა ყოფილი მინისტრი, პარტია "საქართველოს გზის" საპატიო თავმჯდომარე, სალომე ზურაბიშვილია.
სალომე ზურაბიშვილი: "პრორუსულობა და რუსეთის ორბიტაში დაბრუნება იმიტომ კი არ არის ცუდი, რომ ევროპისგან დახმარებას და ა.შ. დავკარგავთ. არამედ, იმიტომ, რომ ეს, მე-19 საუკუნიდან დაწყებული ჩვენი წარსულისთვის, ზურგის შებრუნება იქნება. იმ ყველაფრისთვის, რისთვისაც ჩვენი წინაპრები იბრძოდნენ. ეს იქნებოდა 21-ე საუკუნეში კოლონიალურ დამოკიდებულებაში დაბრუნება, რაც სრულიად წარმოუდგენელია. ჩვენ შეიძლება სხვა რამეზე ვთქვათ უარი, მაგრამ ჩვენს თავზე უარი ვთქვათ და ვარჩიოთ მონად ყოფნა და მეტადრე ისეთი განუვითარებელი ქვეყნისა, როგორიც რუსეთია, იმდენად წარმოუდგენელია, რომ არგუმენტების წამოყენებაც კი არასაჭიროა.
თუ საქართველო აირჩევს გზას რუსეთისკენ, თავისუფლებას დავკარგავთ და ვისაც არ აქვს გაგება იმის, თუ რას ნიშნავს თავისუფლება, თვითმყოფადობა, მაშინ რაზე ვლაპარაკობთ? თუ ამდენი არ გვესმის, რომ მთავარია თავისუფლება გვქონდეს, რა ტრადიციები და რა სადღეგრძელოები და რა ილია?!
ეს არ არის არჩევანი, რომ ევროპას, ამერიკას ან რუსეთს დავემონოთ. ჩვენ უნდა გავთავისუფლდეთ იმისგან, რომელიც ჩვენი აქვე დამპყრობელია, რომელმაც რეალურად დაგვამონა და დღესაც ტერიტორიების ოკუპანტია. დანარჩენი მსოფლიო ჩვენთვის ღიაა. ჩვენი არჩევანია, რამდენად დავუახლოვდებით ევროკავშირს. არასდროს არ ვყოფლივარ მომხრე, რომ მაინცდამაინც ევროკავშირის წევრობა იყოს რაღაც მანტრა. ყოველ წუთში უნდა გავიაზროთ, თუ რისი მომტანია ეს, იქ ჩვენი ადგილი როგორი იქნება, რამდენად საჭიროა ქვეყნისთვის, მისი ეკონომიკური განვითარებისთვის…
ეს არ ნიშნავს, რომ იმ ოჯახის წევრობაზე უარს ვამბობთ. იმ ოჯახში ვართ, რადგან ჩვენ კულტურულად ევროპელები ვართ. ამავდროულად, სხვა ღირებულებებიც გვაქვს, მაგრამ ევროპელობა ჩვენში დევს. ეს არის მთავარი.
დანარჩენი – რა კავშირები იქნება და როგორ გაფორმდება ეს, ჩვენი არჩევანია. სწორედ იმიტომ, რომ ჩვენ ავირჩიეთ პარტნიორობა თავისუფალ მსოფლიოსთან, სადაც ყველაფერი თავისუფალია. ხვალ თუ მოგინდა ევროკავშირზე უარი თქვა, იტყვი კიდეც. ეს არის თავისუფალი მსოფლიო. ყოველთვის უნდა ვიცოდეთ, საით მივდივართ და ავირჩიოთ. მაგრამ იქ, რუსეთთან, დაბრუნების შემთხვევაში, არჩევანი აღარ არის. ეს არის სივრცე, სადაც არანაირი არჩევანი ჩვენთვის აღარ იქნება".
