მარტვილის მუნიციპალიტეტის საკრებულოში, სადაც 28 თანამშრომელია, 2 თვის განმავლობაში 57 345 ლარის პრემია გაიცა.
უფრო კონკრეტულად კი, საკრებულოს თავმჯდომარე ალექსანდრე გაბისონიამ, რომლის შრომითი ანაზღაურება 2 650 ლარს შეადგენს, 2014 წლის დეკემბერში, პრემიის სახით 2 620 ლარი აიღო. ხოლო, 2015 წლის იანვარში, მისი პრემია ხელფასის ოდენობით განისაზღვრა (2 650 ლარი). ანუ, მარტვილის საკრებულოს თავმჯდომარემ, რომელიც სამუშაოს 2014 წლის 15 ივნისის ადგილობრივი თვითმმართველობის არჩევნების შემდეგ ასრულებს, ორ თვეში პრემიის სახით 5 270 ლარი აიღო. შესაბამისად, მისმა შემოსავალმა 2 თვეში 10 570 ლარი შეადგინა.
საკრებულოს თავმჯდომარის მოადგილე ვარლამ ქაჯაიამ, რომლის ხელფასიც 1 700 ლარით განისაზღვრება, 2014 წლის დეკემბერსა და 2015 წლის იანვარში, პრემიის სახით 1 700 ლარი მიიღო. ანუ, ჯამში 2 თვის განმავლობაში მისმა შემოსავალმა 6 800 ლარი შეადგინა.
საკრებულოს 5 კომისიისა და 8 ფრაქციის თავმჯდომარემ, რომელთა ყოველთვიური ანაზღაურებაც 1 350 ლარია, 2014 წლის დეკემბერში და 2015 წლის იანვარში, პრემიის სახით 1 350 ლარი მიიღეს. ანუ, ჯამში, 2 თვის განმავლობაში, თითოეული მათგანის შემოსავალმა 5 400 ლარი შეადგინა.
რაც შეეხება საკრებულოს 8 მთავარ სპეციალისტს, რომელთა ყოველთვიური ანაზღაურება 560 ლარით განისაზღვრება, 2014 წლის დეკემბერში პრემიის სახით ხელფასის ინდეტური თანხა – 560 ლარი მიიღეს, გამონაკლისი მხოლოდ 2 მათგანი იყო – შოთა კეკელია, რომელმაც პრემიის სახით 790 ლარი მიიღო და ლევან ლაშხია, რომელსაც პრემიად 1 120 ლარი ერგო.
2015 წლის იანვარში კი, მათი პრემიები ძირითადად 280 ლარით განისაზღვრა.
ჯამში, მთავარ სპეციალისტებზე 2 თვეში პრემიის სახით, 5 945 ლარი გაიცა.
მარტვილის საკრებულოს 3-მა განყოფილების უფროსმა, რომელთა ხელფასიც 790 ლარით განისაზღვრება, 2014 წლის დეკემბერში პრემიის სახით 790 ლარი მიიღეს, ხოლო 2015 წლის იანვარში, 2 მათგანის პრემია 395 ლარი იყო, ერთის კი ისევ 790 ლარი. ანუ, ჯამში განყოფილების უფროსებზე 2 თვის განმავლობაში 3 950 ლარის პრემია გაიცა.
რაც შეეხება საკრებულოს აპარატის უფროს გურამ წოწორიას, მისი ხელფასი 1 000 ლარია. მან 2014 წლის დეკემბერშიც და 2015 წლის იანვარშიც პრემიის სახით 1 000 ლარი მიიღო. ანუ, ჯამში 2 თვეში მასზე 2 000 ლარის პრემია გაიცა, 2 თვეში მისმა შემოსავალმა კი 4 000 ლარი შეადგინა.
