ხუთშაბათს, საქართველოს პრემიერ–მინისტრი ირაკლი ღარიბაშვილი ჟურნალისტებს შეხვდა. პრესკონფერენციის დაწყებამდე, მთავრობის მეთაურმა გახორციელებულ რეფორმებზე _ გახსნილ საწარმოებზე, ეკონომიკურ მდგომარეობაზე, პოლიტიკურ ოპონენტებზე, ლარის კურსზე ვრცლად ისაუბრა და როგორც წესი, არც მედია დარჩენია გაუკრიტიკებელი.
პრემიერის განცხადებით, არაერთი სოციალური პროექტი გახორციელდა რეგიონებში და ხალხმა მეტ–ნაკლებად ამოისუნთქა.
თუმცა, ასე არ ფიქრობს ქალაქ ოზურგეთში მცხოვრები გიული ტორონტაძე, რომელიც ავარიულ სახლში ცხოვრობს და ხელისუფლებას დახმარებას დიდი ხანია, სთხოვს. ქალბატონ გიულისთან ჩვენი ჟურნალისტები _ ჟანა მეგრელიშვილი და გიორგი გირკელიძე იმყოფებოდნენ. მათ მიერ მომზადებული სიუჟეტი, რომელიც ტორონტაძის ყოველდღიურობას ასახავს G-News TV-ის ყოველკვირეულ გადაცემაში _ "კვირის თემა" გასულ პარასკევს გავიდა.
გადაცემაში ირაკლი ღარიბაშვილის პრესკონფერენციის ის მონაკვეთიც გავიდა, სადაც პრემიერი "ნაციონალურ მოძრაობას" სექტას უწოდებს და ამბობს, რომ აქციის ორგანიზებისთვის პარტიამ რამდენიმე მილიონი დახარჯა:
_ "ნაციონალებს" ჰქონდათ უფლება, ჩაეტარებინათ აქცია ძალით და ფულით მოგროვილი ხალხით, თუმცა, ამ ხალხმა უნდა გაიგოს, რომ "ნაციონალურ მოძრაობას" არავითარი შანსი არ აქვს, რომ რაიმე პროცესები შეაფერხოს, _ განაცხადა პრემიერმა, რომლის თქმით, ეს იყო სასაცილო აქცია, სადაც აღნიშნეს, რომ "თურმე 10 000 კაცი განაწყენდა და მთავრობა უნდა გადადგეს".
რატომ უნდა გადადგეს მთავრობა ან არ რატომ არ უნდა გადადგეს, დაურიგეს თუ არა ფული ნაციონალებმა იმ ადამიანებს, რომლებიც 21 მარტის აქციაზე იმყოფებოდნენ, გამარჯვების ვის რა შანსი აქვს მომავალ არჩევნებზე _ ამ და სხვა მნიშნელოვან თემებზე გადაცემაში ჩოხატაურის მუნიციპალიტეტის საკრებულოს დეპუტატებმა _ "ნაციონალური მოძრაობის" წევრმა მამია ბარამიძემ და "კოალიცია "ქართული ოცნების" წევრმა გოჩა ჯიქიამ ისაუბრეს. საუბარი პირობითად, რადგან დებატები ურთიერთბრალდებების და შეურაცხყოფის ფონზე წარიმართა.
_ "ნაციონალური მოძრაობა" ისე მოქმედებს, როგორც სექტა. არის რაღაცნაირი დაჯგუფება, რომელსაც წინხედვა არ აქვს. ტრიალებს ერთ ღერძზე, იმ დანაშაულებრივ წრეზე, რომლითაც მან ცხრაწლიანი პერიოდი განვლო და იგივე მეთოდებით მოქმედებს დღესაც, _ აღნიშნა ჯიქიამ, რომლის განმარტებით, "ნაციონალური მოძრაობა" გაბრაზებულია და ამიტომ ითხოვს მთავრობის გადადგომას.
_ მე მათ ვეკითხები, რატომ უნდა გადადგეს? _ ოპონენტს მიმართა ჯიქიამ.
_ ბატონი გოჩას ლოგიკა ჩემთვის გაუგებარია. ეჭვი მაქვს, რომ არც კი იცით, სიტყვა _ "სექტა" რას ნიშნავს. ეჭვი მაქვს, რომ იგივე გოჩას და მის პოლიტიკურ მიმდევრებს "ნაცმოძრაობა" ჰგონიათ კიდევ ხელისუფლებაში. "ქართული ოცნება" ვერ ჩამოყალიბდა, როგორც მმართველი გუნდი. რაც შეეხება მთავრობის გადადგომას _ იმიტომ უნდა გადადგეს, რომ ამ მთავრობამ არ იცის, როგორ მართოს ქვეყანა; ამ მთავრობის ხელში ხუთი მილიარდი ლარი საქართველოს ეკონომიკას დააკლდა; ამ მთავრობის ხელში გაირღვა ბიუჯეტი; ამ მთავრობის ხელში, 2003 წლის შემდეგ, პირველად ვსაუბრობთ სეკვესტრზე; ამ მთავრობის ხელში ფუფუნებაზე არიან გადასული ჩინოვნიკები; ამ მთავრობის ხელში გაუფასურდა ლარი და ეს არგუმენტები საკმარისი იმისთვის, რომ ამ ადამიანებმა აიღონ პასუხისმგებლობა და გადადგენ. მე არ ვამბობ, რომ ისენი უნდა გადადგნენ და "ნაციონალები" უნდა მოვიდნენ. ჩვენ გუნდს, 2012 წელს, ქართველმა ხალხმა უთხრა, რომ ოპოზიციაში უნდა გადასულიყვნენ. მოვა, ალბათ, დრო და "ნაციონალური მოძრაობა" მოვა ისევ მმართველ ძალად, მაგრამ ახლა ჩვენ ვამბობთ, რომ უნდა გადადგეს მთავრობის ის წევრები, რომლებიც ამ ქვეყანაში გარკვეულ პოლიტიკურ ამინდს ქმნიან, _ აღნიშნა ბარამიძემ.
ჯიქიას თქმით, ტყუილების კასკადზე პასუხის გაცემა მართებული არ არის:
_ ყველაფერი სინდის–ნამუსზე გადის, რაც ახლა ბატონმა მამუკამ თქვა, _ ჯიქიას ამ კომენტარმა ბარამიძის გაღიზიანება გამოიწვია და ოპონენტს კორექტულობისკენ მოუწოდა.
_ ასე პოლიტიკური დებატები არ გამოვა. ეგეც არ იცით თქვენ. მთავრობის წევრმა დებატიც არ იცით, _ აღნიშნა ბარამიძემ.
ჯიქიას თქმით, ეს ის რეჟიმია, რომლითაც "ნაციონალური მოძრაობა" მოქმედებს.
_ ვიცით, რომ ანერვიულებული ხართ, ვიცით, რომ პოლიტიკურად გაკოტრებულები ხართ. თქვენ მოგივიდათ პოლიტიკური სეკვესტრის პოლიტიკური ინფლაცია და აქედან გამომდინარე ნერვიულობთ, _ ბარამიძეს მიმართა ჯიქიამ.
"ქართული ოცნების" წარმომადგენელის თქმით, "ნაციონალურმა მოძრაობამ" გაძარცვა ქვეყანა და ამ დაგროვილი კაპიტალით არიან "ქართულ ოცნებაზე" ძლიერები:
_ თქვენ რაღაც დოზით ამ მთავრობას უნიათოს უწოდებთ _ ამაში შეიძლება დაგეთანხმოთ, რადგან ყველაფერი შეგრჩათ, რაც ჩაიდინეთ _ ძალადობა, ხალხის დაშინება, სიკვდილი, სისხლი, უკანონო დაპატიმრებები. ამიტომაც საუბრობთ ასე, _ თქვა ჯიქიამ, რაზეც ბარამიძემ უპასუხა, რომ ისინი ხელისუფელებაში არიან და ყველა მსგავსი ფაქტის გამოძიება შეუძლიათ.
ჯიქიამ მთავრობის გაკეთებულ საქმეებზე, ჩოხატაურში გახორციელებულ პროექტებზე და ხელისუფლების მინუსებზეც ისაუბრა. საკრებულოს მმართველი ძალის დეპუტატის თქმით, ნამდვილად არის პრობლემა ის საკითხი, რომ დღეს დამნაშავეები მუშაობენ თანამდებობებზე:
_ ეს საქმეები ნამდვილად გამოსაძიებელია და მე ამაზე ბევრჯერ მისაუბრია. საუბრის შედეგი არის ის, რაც არის და ეს ძალიან ცუდია. მე ვეთანხმები, ვადასტურებ, რომ დანაშაულებრივი სისტემა ჰქონდა შექმნილი "ნაციონალურ მოძრაობას" და ის ადამიანები დღესაც მუშაობენ _ ზოგი ძალოვან სტრუქტურაში, ზოგიც საკრებულო–გამგეობებში და ა.შ. ეს არის მწარე რეალობა, რომელსაც მე ყოველთვის ვაპროტესტებდი.
_ გამგეობა–საკრებულო ახსენეთ… დღეს ხელისუფლებაში, თანამდებობებზე დამნაშავეები მუშაობენ?
_ მე ვამბობ იმ ადამიანებზე, რომლებიც იმ დროს "ნაციონალების" დაძახილზე დარბოდნენ, ასრულებდნენ უკანონო დავალებებს. ასეთი ადამიანები, რა თქმა უნდა, ბევრია ჩვენს გვერდით. თანამდებობებზე დამნაშავეები მუშაობენ _ გაიხედ–გამოიხედეთ და დაინახავთ… ამის გამო პროტესტი ყოველთვის არის საზოგადოებაში.
_ საკრებულოში არიან დამნაშავეები?
_ საკრებულოში არჩეულები არიან და მოდით, ამაზე ნუ ვისაუბრებთ.
_ გამგეობაში?
_ დიახ, გამგეობაში არიან ასეთი ადამიანები.
_ კონკრეტული გვარები შეგიძლიათ დაასახელოთ?
_ არა, არ გვინდა.
_ ბატონო გოჩა, თქვენ ხართ საკრებულოს დეპუტატი და ასეთ ხმამაღალ განცხადებებს როცა აკეთებთ, როცა ამბობთ, რომ გამგეობაში დამნაშავეები მუშაობენ, მათი ვონაობის დასახელებასაც არ უნდა მოერიდოთ.
_ ეს ყველამ ძალიან კარგად იცის. იციან, ვინ იყო იმდროინდელი პროკურორი, პოლიციელი, მოსამართლე. არ გვინდა კონკრეტულ ადამიანებზე საუბარი.
ჯიქიამ 21 მარტის აქციაზეც ისაუბრა და აღნიშნა, რომ იქ წასულ ადამიანებს ფული დაურიგეს. მისივე თქმით, ამის შესახებ დადასტურებული ინფორმაცია აქვს, თუმცა, ფაქტები არ გააჩნია:
_ ეს ადამიანს არ უნდა აკადრო _ ვიღაცა ვიღაცას ფულს უხდის და ასე მიყავს აქციზე, _ მიმართა ბარამიძემ ოპონენტს, რაზეც ჯიქია გაღიზიანდა და აღნიშნა, რომ "ნაციონალებმა" კადრებაზე ისაუბრონ, მინიმუმ, სირცხვილია.
ცხარე დებატებში ოპონენტებმა აუდიტის სკანდალურ დასკვნაზეც ისაუბრეს. დასკვნა, რომელიც გასულ წლის ბოლოს გამოაქვეყნა აუდიტის სამსახურმა და რომელშიც წერია, რომ ჩოხატაურის მუნიციპალიტეტის გამგეობაში დოკუმენტაციას ფანქრით ავსებენ, დღემდე განხილვის თემაა. მამია ბარამიძე რამდენიმე თვეა დასკვნის საკრებულოზე განხილვას ითხოვს, თუმცა, ამ დრომდე უცნობია, როდის მოხდება განხილვა. ჯიქია ამბობს, რომ მალე და აღნიშნავს, რომ დასკვნა მის ფრაქციაში _ "ქართული ოცნება-რესპუბლიკელები" ამ დრომდე არ განუხილავთ.
G-News TV-ის ყოველკვირეული გადაცემის _ "კვირის თემა" სრული ვერსიის ნახვა შეგიძლიათ აქ.
