"გაერთიანებული დემოკრატიული მოძრაობის" ერთ-ერთი ლიდერი დიმიტრი ლორთქიფანიძე, ბიზნესმენ ბესო ხარძიანის მკვლელობის მოტივებზე და იმ საიდუმლოებაზე საუბრობს, რომელსაც იგი, მისი თქმით 2012 წლიდან დღემდე მალავდა.
ის კიდევ ერთხელ იმეორებს იმ გვარებს, რომელიც ბოლოს, გაზეთ "კვირის პალიტრასთან" მიცემულ ინტერვიუში ხარძიანმა დაასახელა. მისი თქმით ეს პიროვნებები ხარძიანს ბიზნესის განვითარების კუთხით წინ აღუდგნენ და მისი დაკავების დამკვეთებიც იყვნენ. ეს პიროვნებები იყვნენ: უდესიანი, ქურასბედიანი და შიხიაშვილი.
ლორთქიფანიძე ასევე საუბრობს, 2012 წლის ოქტომბერში ლალი მოროშკინასთან ერთად ციხეში ბესო ხარძიანთან შეხვედრის ფაქტებზე, სადაც მან განაცხადა, რომ ნარკოტიკული საშუალება ჰეროინის შემცველი ფხვნილი პირში ჩააყარეს და აიძულეს წყალი დაელია.
ამის შესახებ პარტიის ერთ-ერთმა ლიდერმა გადაცემა "იმედის კვირაში" ისაუბრა.
"შემდგომ იგი მიიყვანეს იზოლატორში და სასტიკად უსწორდებოდნენ 6 თვის განმავლობაში, სცემდნენ ყოველ დღე. აქვე უნდა ვთქვა, რომ მის მიმართ იგეგმებოდა ზუსტად იგივე სცენარი, იგივე ანგარიშსწორება, როგორითაც გაუსწორდნენ სერგო თეთრაძეს. დიახ, აპირებდნენ მის გაუპატიურებას. ესაა ბესო ხარძიანის სიტყვები და მე არ ვარ ერთადერთი, ვინც ეს სიტყვები მოისმინა.
მან პირდაპირ განაცხადა, რომ ეს შეუკვეთა უდესიანმა. აქ შეკვეთაში იგულისხმებოდა მისი დაპატიმრების ფაქტი, რასაც შემდგომში უნდა მოჰყოლოდა მისი ბიზნესების აქციების გადაცემა"- განაცხადა ლორთქიფანიძემ.
ის ასევე საუბრობს 2012 წლის ოქტომბერში ერთ-ერთ პატიმართან შეხვედრაზე, რომელსაც 18 წელი ჰქონდა მისჯილი და რომელიც საშიში რეციდივისთვის არაერთხელ იყო ნასამართლევი. ლორთქიფანიძის განცხადებით, ადმინისტრაცია ამ პიროვნებას ბინძური საქმისთვის იყენებდა.
"ამ ადამიანმა თქვა, რომ მან ადმინისტრაციისგან მიიღო დავალება და იყო ეჭვი, რომ ეს დავალება მოდიოდა გარედან, მას უნდა დაემყარებინა მასთან ისეთი კონტაქტი, რომ ხარძიანს ეთამაშა მასთან და უნდა ეთამაშა რესტორანზე. საბოლოოდ აღმოჩნდა, რომ ამ პიროვნებამ მას ეთამაშა არა პურ-მარილზე რესტორანში, არამედ შენობა-ნაგებობაზე, რესტორანზე.რომელიც შეფასებულია 800 000 ლარად და თუ მას ამის გადახდის შესაძლებლობა არ ჰქონდა, მას შეეძლო იმ აქტივებით გადაეხადა, რომელსაც ფლობდა აქციების სახით და ასე აღმოჩნდა 43% აქციებისა იმ პირების ხელში, რომლებიც დღესაც განკარგავენ ამ ბიზნესებს"- განაცხადა ლორთქიფანიძემ.
