ქალაქ ოზურგეთის მუნიციპალიტეტის საკრებულოს დეპუტატმა, "ლეიბორისტული პარტიის" წევრმა ნატა შარაშენიძემ, ლეიბორისტული პარტიის წევრებმა მირზა ჩხიკვიშვილმა და დავით მამალაძემ, დემოკრატიული ჩართულობის ცენტრში პრესკონფერენცია გამართეს.
საკრებულოს დეპუტატი ნათია შარაშენიძე ქალაქ ოზურგეთის მერს საჯარო ინფორმაციის დამალვაში სდებს ბრალს.
"ინფორმაცია, რომელიც 25 მარტს, მე გამოვითხოვე ქალაქ ოზურგეთის მერიიდან, არის კონფიდენციალური. ვითხოვდი, კანონით დადგენილ ვადებში მოეცათ სახელობითი სია იმ ადამიანების, ვისზეც გაიცემა ბიუჯეტიდან ერთჯერადი სოციალური დახმარებები. ამ ინფორმაციით მე მსურდა საბიუჯეტო თანხების გაკონტროლება, ვინაიდან მქონდა ინფორმაცია, რომ ერთჯერადი დახმარებები გაიცემა "ქართული ოცნების" აქტივისტებზე და მერის ბეგის სიორიძის აქტიურ მხარდამჭერთა ოჯახებზე. ჩვენი ეჭვი ამასთან დაკავაშირებით დადასტურდა კიდეც, რადგან ქალაქ ოზურგეთის მერიამ აღნიშნული ინფორმაცია არ მომცა, ის გასაიდუმლოებულია. მათ არ აწყობდათ გახმოვანება და გაკონტროლება. ქალაქ ოზურგეთის მერი მალავს საბიუჯეტო თანხების განკარგვასთან დაკავშირებულ ინფორმაციებს", _ აღნიშნა შარაშენიძემ.
მისივე თქმით, როგორც საკრებულოს დეპუტატს, წვდომა არ აქვს საბიუჯეტო თანხების გაკონტროლებაზე.
"მინდა ხაზი გავუსვა იმ გარემოებას, რომ მე ვარ საკრებულოს დეპუტატი და არა ჟურნალისტი, მე წვდომა უნდა მქონდეს საბიუჯეტო თანხებზე გაკონტროლებისთვის, ჩემთვის ხელმისაწვდომი უნდა იყოს ქალაქ ოზურგეთის მერიაში ნებისმიერი ინფორმაცია."
ქალაქ ოზურგეთის მერიის პრესსამსახურში აღნიშნავენ, რომ "საქართველოს ზოგადი ადმინისტრაციული კოდექსი" საქართველოს კანონის 28-ე მუხლის თანახმად ,,საჯარო ინფორმაცია ღიაა, გარდა კანონით გათვალისწინებული შემთხვევებისა და დადგენილი წესით პერსონალურ მონაცემებს, სახელმწიფო ან კომერციულ საიდუმლოებას მიკუთვნებული ინფორმაციისა" ამავე კოდექსის 2-ე მუხლის 1-ლი ნაწილის "ნ" ქვეპუნქტის თანახმად ,,საიდუმლო ინფორმაცია არის საჯარო დაწესებულებაში დაცული, აგრეთვე საჯარო დაწესებულების ან მოსამსახურის მიერ სამსახურებრივ საქმიანობასთან დაკავშირებით მიღებული, დამუშავებული, შექმნილი ან გაგზავნილი ინფორმაცია, რომელიც შეიცავს პერსონალურ მონაცემებს, სახელმწიფო ან კომერციულ საიდუმლოებას". აქედან გამომდინარე, ნათია შარაშანიძის მიერ მოთხოვნილი ინფორმაცია არ წარმოადგენს საჯარო ინფორმაციას. რაც შეეხება მის აბსურდულ განცხადებებს, ქალქის მერი ამასთან დაკავშირებით კომენტარს არ გააკეთებს."
