საქართველოს პრეზიდენტი გიორგი მარგველაშვილი, გუშინ, პარლამენტში ანგარიშით წარსდგა. პრეზიდენტის საკანონმდებლო ორგანოში გამოსვლას დეპუტატთა ნაწილი და დიპლომატიური კორპუსი ესწრებოდა. რაც შეეხება მინისტრთა კაბინეტს, მათ ანგარიში არ მოუსმენიათ.
გიორგი მარგველაშვილის პარლამენტში გამოსვლას, პოლიტიკურ წრეებში არაერთგვაროვანი შეფასებები მოჰყვა. საპარლამენტო უმცირესობის დეპუტატებმა კი პრეზიდენტს, არასწორი ინფორმაციის ფლობაზე მიუთითეს.
უფრო კონკრეტულად კი საქმე ეხება პრეზიდენტის გამოსვლის იმ ნაწილს, სადაც მან რუსეთის ფედერაციის მიერ აფხაზეთთან და ცხინვალის რეგიონთან/სამხრეთ ოსეთთან ხელშეკრულებების გაფორმების გამო პარლამენტის მიერ მიღებულ რეზოლუციასა და ფარულის მოსმენების შესახებ კანონზე ვეტოს დაძლევაში უმცირესობისა და უმრავლესობის გაერთიანებაზე ისაუბრა.
პირველ შემთხვევაში მარგველაშვილმა განაცხადა – "გასულ წელს, რუსეთის შეიარაღებულმა ძალებმა გააგრძელეს მანიპულირება მავთულხლართებით. რუსეთის ფედერაციის მიერ აფხაზეთთან და ცხინვალის რეგიონთან/სამხრეთ ოსეთთან ხელშეკრულებების გაფორმების გამო, ჩემი მიმართვის პასუხად, პარლამენტმა ეს აქტები ოკუპირებული ტერიტორიების ანექსიისკენ გადადგმულ ნაბიჯად შეაფასა. ეს შეფასება ჩვენმა პარტნიორებმაც გაიზიარეს და საერთაშორისო მასშტაბით კიდევ ერთხელ დაგმეს რუსეთის აგრესია".
რეალურად კი, მოვლენები შემდეგნაირად განვითარდა – გასული წლის, ნოემბრის მიწურულს, "ქართული ოცნების" საპარლამენტო უმრავლესობამ 36 ხმით 33-ის წინააღმდეგ ჩააგდო "ნაციონალური მოძრაობის" მიერ ინიცირებული რეზოლუციის პროექტი "ოკუპირებული აფხაზეთისა და ცხინვალის რეგიონის რუსეთის ფედერაციის მიერ ანექსირების მცდელობის შესახებ".
პროექტის ინიცირება ნაციონალურმა მოძრაობამ მანამდე მოახდინა, ვიდრე მოსკოვი სეპარატისტულ აფხაზეთთან 24 ნოემბერს ხელს მოაწერდა "მოკავშირეობისა და სტრატეგიული პარტნიორობის" შესახებ ახალ ხელშეკრულებას, რომელსაც თბილისი "ანექსიის მცდელობად" აფასებდა.
როგორც საპარლამენტო უმცირესობის დეპუტატი გიორგი კანდელაკი "გურია ნიუსთან" ამბობს, რეზოლუციის მთავარი ღერძი, ფაქტის ანექსიად შეფასებასთან ერთად ისიც იყო, რომ მთავრობას ემუშავა და რუსეთზე დაკისრებული სანქციების მიზეზებში, ეს ანექსიაც მოხვედრილიყო, რათა მომხდარის საერთაშორისო მნიშვნელობა ამაღლებულიყო.
ცნობისთვის, უმრავლესობა აღნიშნულ საკითხთან დაკავშირებით, მხოლოდ იმით შემოიფარგლა, რომ განცხადება გაავრცელა, სადაც დაგმო რუსეთის "მცდელობა მოახდინოს ოკუპირებული აფხაზეთის ანექსია".
რაც შეეხება მომდევნო საკითხს, ფარული მოსმენების შესახებ კანონზე დაძლეულ პრეზიდენტის ვეტოს, გიორგი მარგველაშვილმა განაცხადა – "პირველად ვეტო სწორედ მაშინ გამოვიყენე, როცა ფარული მოსმენების კანონს პარლამენტი იღებდა. ჩემთვის გაუგებარია, რატომ ჩააგდო პარლამენტმა ჩემ მიერ შემუშავებული კანონის პროექტი. გაუგებარია ის, თუ რამ გააერთიანა უმრავლესობა და უმცირესობა, რომ ჩაეგდოთ ჩემი კანონის პროექტი."
მოცემულ შემთხვევაში, ამბავი შემდეგნაირად განვითარდა – პრეზიდენტმა აღნიშნული კანონის პროექტთან დაკავშირებით ვეტოს უფლება ორჯერ გამოიყენა. პირველად მან ეს 31 ოქტომბერს გააკეთა, რადგან არ დაეთანხმა პარლამენტის გადაწყვეტილებას, რომელმაც ფარული მოსმენების შესახებ ახალი რეგულაციების მისაღებად 1 ნოემბრამდე განსაზღვრული ვადა ვერ დაიცვა და გადაწყვეტილების მიღება ოთხი თვით გადაავადა. პრეზიდენტმა ეს ვადა ერთ თვემდე შეამჭიდროვა და რეგულაციების მიღება კანონმდებლებს 1 დეკემბრამდე მოსთხოვა. მაშინ დეპუტატებს პრეზიდენტის ამ შეთავაზების გაზიარება მოუწიათ და შესაბამისად, ვეტოს დაძლევა აღარ უცდიათ.
29 ნოემბერს პრეზიდენტმა ამ უფლებით კიდევ ერთხელ ისარგებლა, თუმცა პარლამენტმა შეძლო და მეორე დღესვე, 82 ხმით 13 ხმის წინააღმდეგ, ანუ საჭიროზე ექვსი ხმით მეტით, პრეზიდენტის ვეტო გადალახა.
მაშინ, "ნაციონალურ მოძრაობას" პრეზიდენტის ვეტოს დაძლევაში მონაწილეობა არ მიუღია. ამას დეპუტატები წინასწარ აანონსებდნენ კიდეც და აღნიშნავდნენ, რომ მიუხედავად იმისა, თუ რამდენი გასაღები იქნებოდა და ვის დაურიგდებოდა ისინი, უკანონო მოსმენები გაგრძელდებოდა, რადგან ე.წ. სერვერი შსს-ში რჩებოდა.
ზოგადად პრეზიდენტის გამოსვლას პარლამენტში, უმცირესობა სუსტს უწოდებს, ხოლო მისი მხრიდან ფაქტობრივი შეცდომების დაშვებას, გამბედაობის არ ქონას.
"ზოგადად, ამ გამოსვლის ძირითადი მოტივი ის იყო, რომ მოერიდა ან გამბედაობა არ ეყო მის მიერ ჩამოთვლილ პრობლემებზე პასუხისმგებელი გუნდი დაესახელებინა. იგივე მოხდა ამ შემთხვევაშიც, როცა ფაქტობრივი შეცდომები დაუშვა – ალბათ ვერ გაბედა ეთქვა, რომ მისი ვეტოს დაძლევა, მხოლოდ "ქართული ოცნების" მობილიზებით მოხდა", _ აღნიშნავს "გურია ნიუსთან" საპარლამენტო უმცირესობის დეპუტატი გიორგი კანდელაკი.
